Read Lamnso Fəə 11 Bible Online

Fəə 11 - Lamnso bible

Fəə 11

¹NYÙY TÀR nèn sùúy e Mooser jii, «M sí lo, e wìy lèn e ŋgeʼ kinjòʼsìbàm e Farao wùn à wír veé Ejiví kitu. E bǎm kee shooy, é wù ku nèn màʼtì ven. A wù yíi a màʼtì ven bey, a jùm jùmèn ŋkuuŋkùŋ.

²Ku sùúy e wír veé Israyi jii, wìr mòʼón mòʼón, kìn dzə̀ wiíy, kìn dzə̀ lumèn, wàá lón á vifá ve sùsù ve á fèrìn e kisha ke mbàm ke baar kí, kìn e ke fəvír kí, fo ŋgaà və shweèsí.

³A NYÙY TÀR yií ne, wír veé Ejivi wáa ghvəm veé Isray. Mo Mooser‑iì dzəə̀n sá kisən ke wìr, vé saʼ Farao wùn à wìr dzə̀m woó Ejiv wáa ghvəm sa wun.»

⁴Mooser nèn sùúy e Farao jii, «NYÙY TÀR suuy jii, ‹Lóo yiì dzə moo ntìntìn vitsə̀ʼə́ bey, é m wáa ghanén e wòŋ Ejiv,

⁵é wón wìr veé Ejiv vee vilum ve dzəə̀n dzə́ə mbìyi yiì a kpukír. Aá yíi a kpukír, e kèʼ fo wo Farao wo wù dzə́ e kàvàʼ, e dù, e meé e wo wánlè wiíy woo kwàn wo wú jo kibán e tiy, e lì sa wón nyàm vee vilum vee dzəə́ mbìyi.

⁶Tóŋ ye tavíné yíi a dzə woŋ Ejiv e dzə̀m, a kfə́ə toŋ yee shoone yòʼ‑oò yiì ne a dzə, a bó yí yòʼ kfə̀n wíy a dzə.

⁷Yii bèy, fo wír veé Israyi, nyaáŋ yíi a dzə. Bó jwi yòʼ fə̀m yíi nyàm wír, a bó yì yòʼ yíi nyàm sa nyám sév. Á bèy, é vèn nèn kìíy ji mo woo NYÙY TÀR, m lì a wír veé Isray jeéy fo veé Ejivi.› »

⁸Mooser màysì, e yòŋ jii, «Vé saʼ vé, mo áwune dzə́ e taa fèy, á wíy səy adzə̀m fèn, e gvəʼtí e mǒ si, a lon, a suúy jii, m ku màʼtì a ven, e lì wír vém adzə̀m, a dù sho. Á suuy bèy, é m nèn lò.» Mooser nèn màʼtì Farao, a dù, a dòʼshwiíy sí kív wun kívín.

⁹NYÙY TÀR nèn sùúy e Mooser jii, «Farao kù yíi a ten fóo biimé kinyo ke vèn yíi a suúy, é m fiʼ yiì viŋgaʼnìn vém vé vinyò vímóʼ ví é wòŋ Ejiv.»

¹⁰A dzə̀ ji mo Mooser wùn Aaron‑eè yiìn ne viŋgaʼnìn ve vinyò vìn vidzə̀m e Farao si, NYÙY TÀR ku yiì, Farao kú a tav kitu, e làa yòʼ màʼtì wír veé Isray ji á lo fo wun wòŋ.