Read Lamnso Fəə 15 Bible Online

Fəə 15 - Lamnso bible

Fəə 15

¹Mooser wùn à wír veé Israyi nèn a yòv luŋ, a sùyrì NYÙY TÀR. Vé‑eè yov jii: «M yíi a yòv luŋ, a sùyrì NYÙY TÀR, wù sò e viwìr vi. Wù màʼ nyamŋkoʼ, à ŋgaà koʼ e rìbà ndzə̀v.

²NYÙY TÀR dzə̀ vitaáví vém, a dzə̀ yòv wom. Wù lò ne, e lùŋèr mo. Dzə̀ wun Nyùy wom, a m yíi a burí wun, Nyùy wo tàr wor ghvə́mé, a m yíi a wùʼsì wun.

³NYÙY TÀR dzə̀ wir rə̀r, yír rəə́ dzə̀ Yahweh[29].

⁴Wù màʼ *viténtén vé rər vé Farao e rìbà ndzə̀v, mànjòŋ və láy. Rìbà Ndzə̀v wo Baar[30] sə́n amfòómé Farao ntayi.

⁵Ndzə́ví súm áwune, á sə́y fó sar moo kilán.

⁶«Éè NYÙY TÀR, kóy wó yìyí kér vitaáví ve wiy ví. Éè NYÙY TÀR, kóy wó yìyí tee vé vibàné.

⁷Vikùʼùy vé ve vifòn vi maʼ aŋgaà vé vibàn, dòʼshwiiy wò kóʼó, wù tòn áwune moo jíy.

⁸À kì fèr yúy, ndzə́ví rún, e fùmén, ye leŋéné tiím é kikfər, rìbà ndzə̀v távtí fo wù shoon, e jòʼsì.

⁹Ŋgaà vibàn dzə̀v nsaŋ jii, ‹M yíi jùm áwune, e koo. M yíi jàv káv wóv, e lì mbìv ye m koŋè. M yíi shoʼ nyùy yem, e laàr áwune e kiwó kém kí.›

¹⁰À ló ké, e fèr shwér fo wò shuù, ndzə́ví súm áwune, á sə́y é màndzə̀v moo ŋgòʼ kishà.

¹¹«Éè NYÙY TÀR, dzə̀ la moo wò aànyùyí mvəm? À dzə̀ ké Ŋgaà wo Ranén, a vikuʼùy vé vi dzə̀ jeéy. A dzə̀ yiì la viŋgaʼnìn ve vinyò ve ví kér viwìr moo wò?

¹²Wò‑oò nàn kóy wó yìyí, nsay mèy aŋgaà vér vibàn.

¹³À kù wíy a dìn koŋ yé ye wiyí, a tsəəné wír ve wò‑oò tinen fo aŋgaà vév vibàné. À kù wíy kìŋsìn áwune e vitaáví vé vi, e dù sho e wò kirə̀ʼ ké dzə ke ranén kí[31].

¹⁴Vitúm vi wíy yu, a yàʼ, tímé wíy kpu wír veé Filistia.

¹⁵Wúné wíy beemé afon veé Edom, vilìmbìy veé Moav vi wíy a yàʼ. Melív mè wíy seèm wír veé Kanan, aá weey.

¹⁶Kindzə́m kí wíy toʼnín áwune, aá wáa fàn, a yàʼ. Éè NYÙY TÀR, bìʼ kóy wó vitaavií, áwune kù wíy a sov fo moo kilán, e meé mo wír vée wíy shaà, wír, ve wò‑oò tinen fó vikwàn.

¹⁷Éè NYÙY TÀR, à kù wíy lì áwune, e dù sho, e dzə̀ʼə̀r e wò gwan, kirə́ʼ ke à naŋsin ji ké ke dzə,[32] ŋgày bùnrì ye bomen wò e wó yée.

¹⁸NYÙY TÀR kù wíy a saʼ vifon ghán sidzə̀m, e dù, e mày.»

¹⁹Vé‑eè yov bèy, bìʼ fo NYÙY TÀR‑iì yiìn, rìbà ndzə̀v sùm wír Farao. A vé‑eè nə̀ə́, NYÙY TÀR siìr ndzə́v, yí kuúy nyám se ŋkoʼ, à vé koʼo adzə̀m, e tàtí viténtén. Yii bèy, a wír veé Israyi kì tòsín kév rìbà ndzə̀v a dzə̀ é nsay ye yumér.

²⁰Miriam woo jemèr Aaron‑eè dzə̀ *ŋgaà ntum Nyùy. Wù nèn lò, e lì shinshùm[33], vikìy adzə̀me lì sa sév e wun bàm, wùn áwune wáa kùm, a cèŋ.

²¹A Miriam tóri yòv, aáwune kooy jii: Vèsən yov luŋ, a sùyrì NYÙY TÀR, wù sò e viwìr vi. Wù màʼ nyam ŋkoʼ wùn à ŋgaà koʼ e rìbà ndzə̀v.

²²Mooser nèn lì wír veé Isray fo Rìbà Ndzə̀v wo Baar, a dù sho e woʼ yeé Shur. Vé‑eè ghàn vishiíy vitaár e woʼ, aá yòʼ yén mendzə́v.

²³Á meé é Maraa, e làa yòʼ yu fóo no mendzə́v mee fó, bìʼ fo mè‑eè shíʼirì. Á kinyo ke kí‑iì yiìn, bo á shu yír yee fó ji Maraa[34].

²⁴Wíri nèn a bashí Mooser, a suúy jii, «Vèr yíi no ka?»

²⁵Mooser tóŋ e NYÙY TÀR, NYÙY TÀR dìn kicí e wun, wù màʼ e ndzəv, mendzə́v mè nèn bòŋ. Dzə̀ é kirə̀ʼ fen fo NYÙY TÀR‑iì tiirin kinyo kímóʼ kí aáwuné wùn, e fò nsər ye dzə̀ áwune wàa lèm, e taàsín áwune shó.

²⁶Wù‑uù sùúy jii, «Dzə̀ mo NYÙY TÀR, wo wù fer ayàsí vén. A vèn yiì a yu mo, a yiì vinyo vee tìítiy, a lèm nsər sém, a yiì vinyo ve m tiirin e věn wùn vidzə̀m, bo m yòʼ yíi màʼ ŋgeʼ yàsí e věn kitu ye mò‑oò màʼàn e wír veé Ejiví kitu.»

²⁷Áwune nèn lò fo fo, e dù e Elim, a ntòŋ sé ndzəv sí dzə̀ fó nshòv sibaà e ghvə̀m wùn à vicí vé ten ví msaàmbà. Á nèn tàm táv sí, e beè fo e ghaa ndzəv.