Read Lamnso Fəə 19 Bible Online

Fəə 19 - Lamnso bible

Fəə 19

¹Wír veé Israyi siíy, e lò fo Refidim, e wìy e woʼ yeé ghaa Gwan Sinay, e nèn tùy vibàn vév é sar gwan woo shooy. Vé‑eè mee fo e kishiíy fóo fèy, a sì ji ŋwee e baà.

³Mooser nèn kòʼ é gwan ji wùn Nyùy wàá tárnín. NYÙY TÀR yòŋ wun fo gwan, e sùúy sho jii, «Kinyo ke dzə̀ à kù sùúy e wír veé Isray ki kìne. Ku sùúy aáwune vee rám Jakovi jii,

⁴‹Vèn‑eè lo yèn kinyo ke mò‑oò yiìn e wír veé Ejivi e sí yéné, e kfə̀n yèn mo mò‑oò rə́si béʼ ven, é bo vèn wiy, e yèn mo fen. A mò‑oò béʼ ven réŋréŋ mo lùŋ wo wiy yii béʼ wón və́ e wun vàv bèy.

⁵Kí nén a dzə jii, a vèn yiì a yu jí yem kijuŋ, a lèm nsər se mensàŋ mem[49], bo vèn yíi a dzə vém vee wír. Kitú ke nsay kidzə̀m ki dzə̀ kém, yii bèy, a vèn yíi a dzə wír vém vee jeéy ve m shoʼon fo wìr dzə̀m mvəm.

⁶Vèn yíi a dzə kitúm kee jeéy kí ji kém, a dzə̀ ji kitúm ke atàá cù.› Á kinyo ke à yíi dù, e suúy e wón veé Israyi.»

⁷Mooser nèn sə̀y fó gwan, e kùm vilìmbìy ve wíri, e sùúy aáwune vinyo vidzə̀m ve NYÙY TÀR kì yòŋèn e wun.

⁸Wìr dzə̀m nèn bìnsí jii, «Vèr yíi a yiì vinyo vidzə̀m ve NYÙY TÀR suuyin.» Mooser nèn kfə̀n é bàm, e sùúy e NYÙY TÀR kinyo ke wíri kì binsin.

⁹NYÙY TÀR nèn sùúy e Mooser jii, «Yuúrí, e yù, m yíi wìy e kikfəm ke mbàʼ, e yen wò, é wíri fiʼ yù mo m súŋnin e wò, e nèn biìmé ji tùm á mo wò, e kèʼ fo lèn, e dù, e mày.» Mooser nèn kfə̀n a naàrì e NYÙY TÀR kinyo ke wíri kì suuyin.

¹⁰NYÙY TÀR suúy e wun jii, «Sə́y, e sùúy e wíri, aá báʼtí vitú vév lán wùn à kibvəə́shí, e *kfə̀mrí, é vèr áwune tárnín. Á ku sù ndzə̀y sév,

¹¹a dzə kibáʼtín é kishiíy ke kí meen ji taár, bìʼ fo yíi lòo dzə e kishiíy fóo fèy, é m sə́y é Gwan Sinay, é wìr dzə̀m yén mo.

¹²Ku raàr koónte, e kaàrí gwan sho, e tàr, é la wíri yòʼ soòrí. Suúy ji lá wíri yòʼ kòʼ á e gwan. Lá wìr yòʼ fə̀m mèʼ á mentsə̀m me gwan. A wìr mùm, e làʼ kiwuú kfə́ fó, bo wù kpù á ne.

¹³Á yòʼ yíi kùm ŋgaàŋ e kiwó ki. Á kù yíi tsəmrí e tíyí, e yuyrí. Kí búŋ fó bèy, bo á té wun e mvəne. Kù dzə̀ bey, à wìr, à nyàm sho, bó yòʼ dzə̀ kímóʼ kí gòʼ kitin. Yii bèy, á yií yú, aá tóŋ sóŋ, ntàm dár, bo dzə̀ wíri wàa koʼ lèn e gwan.»

¹⁴Mooser nèn sə̀y fó gwan, e sùúy e wíri ji á báʼtí á vitú vév, e fíʼ koʼtí e Nyùy si. Á nèn sù ndzə̀y sév.

¹⁵Wù nèn kfə̀n sùúy e wíri jii, «Vèn kú a dzə kibáʼtín é kishiíy ke kí meen ji taár, é la wìr yòʼ kfə̀n shìíy e wiíy.»

¹⁶Wáa dzə kijàvndzə ke kishiíy ke kí‑iì meen ji taár, kishèv ki wáa bàvkìr, a baykír e kitu ke gwan, a mbàʼŋkfəə́mé dzə́ʼ fo, a sóŋé tóŋ kitaátávín. Wìr dzə̀m wáa yàʼ e sar gwan.

¹⁷Mooser nèn lì wíri fó kirə̀ʼ ke vé‑eè bàʼrìn vibàn, a fəə sho ji á du, e tàrnín a wùn à Nyùy. Á fəə́, e dù, e tìím e ghaa gwan,

¹⁸a kindzə́ʼ ki sə́tí ne Gwan Sinay e dzə̀m, bìʼ fo NYÙY TÀR kì səʼəyin ne fo e mvə̀m və̀y, kindzə́ʼ ki wáa koʼ fo mo á kfə̀m və́y bey, gwan dzə̀m wáa sə̀ʼ kitávín.

¹⁹Sóŋé kú a toŋ, a tavkír tavkín, Mooser wáa suŋnín, Nyùy wáa bìnèr e wun.

²⁰NYÙY TÀR sə́ʼə́y é kitu ke Gwan Sinay, e tòóy Mooser e kitu ke gwan, wù kóʼ fó.

²¹Nyùy nèn sùúy e Mooser jii, «Sə́y, e kàntì wíri fo á wáa taŋ wún ji á kóʼ, e yèn mo, áàneéníne kpúkír.

²²A fèn dzə̀ atàá cù ve á yii cu mo, bo á kù kér fó baʼtí vitú vév, búŋ là bey, bo m maʼ ŋgeʼ aáwuné kitu.»

²³Mooser nèn sùúy e NYÙY TÀR jii, «Bó yòʼ dzə̀ wíri kòʼ é Gwan Sinay fèn, bìʼ fo wò‑oò kànèn ji á raŋ á koónte, e kaàrí gwan sho, e tàr, e màʼtì, é wù wáa dzə ji kirə́ʼ ké kee jeéy kí.»

²⁴NYÙY TÀR suúy jii, «Sə́y, lóo kfən, à lì Aaron, e wìy sho. Yii bèy, lá à yòʼ biimé, áàtàá cù wùn à wíri wáa taŋ wún ji á tósín, e kòʼ fo m dzəə̀n, fo wúné kin mo, é m maʼ ŋgeʼ aáwuné kitu.»

²⁵Mooser nèn sə̀y, e yèn wíri, e kàntì áwune.