Read Lamnso Fəə 22 Bible Online

Fəə 22 - Lamnso bible

Fəə 22

¹«A wìr shòŋ nàʼ, kìn bvə́y, e seè, kìn wù fiìnè fiìnèn, bo wù kér fó làʼ nàʼ wo wù kì shoŋen və̀y anàʼ atàn, e làʼ bvə́y e bvə́y si sikweè.

²«A shòŋ lò, a kiv lav vitsə́ʼə́, á ndzə́n, wù kpú, bo ŋgaà yùyrí yoʼ jày.

³Yii bèy, a lò a dzə e shùy, bo ŋgaà yùyrí kér jay. Á ghínsín, e koò, bo shòŋ kù kér fó làʼ kifá ke wù kì shoŋen, e kfə̀n dzə̀sì. Wáa dzə, a wù yòʼ kér kifá, á fiìnè wun, e kùv shó.

⁴Wáa dzə, a nyàm ye wù kì shoŋen dzə̀ə́ e wun lèm e tin, á sə̀, é wù kfən làʼ e nyám si sibaà.

⁵«Wìr lem nyám e wun kwaʼ, kìn e wun súm vitiír vé *vayin, sí ján, e dù, e yì vifá fo wìr sum, bo wù kér fó tàʼ kfə́ə vifa vee shooy fo və́ woo súmé, a kù dzə̀ ve shavín ví, e fo e ŋgaà sùm.

⁶«Wìr ton və́y, wú koó, e bìvír vifá ve ví kúy e wùmǒʼ sum, kìn ve á kavin, e lèm, bo wù kér fó làʼ kilày ke kí kooyin.

⁷«A wìr lèm mbàm, kìn kifá e wìr, á shóŋ fo ŋgaà lèm lav, á koó shóŋ, bo shòŋ laʼ virə́ʼ vibaà.

⁸Yii bèy, á taʼ shóŋ ntéŋ, bo á kù li ŋgaà lèm, e dù sho e kirə̀ʼ ké cù, é wù yii kilìʼ fó ji wun yoʼ lì a mbàm see shooy.

⁹«Wíri lóo taŋ kifá, kìn dzə̀ nàʼ, kìn bvə́y, kìn ndzə̀y, kìn á táŋ a dzə̀ ka ke kí làyìn, á lì áwune vee abaà, e dù sho e kirə̀ʼ ké cù. Wo Nyùy dìnèn ji wù táŋ a taŋén, bo wù siir, e bóo kfə̀n làʼ ŋgaà kifa vifá vibaà.

¹⁰«A wìr fò kimbèʼbìy e wìr, kìn nàʼ, kìn bvə́y, kìn dzə̀ nyám yee ka ji wù lem, yì lo, e kpù, kìn yì lèm lémén, kìn á shòŋ é kwaʼ, la wìr yòʼ yèn,

¹¹bo ŋgaà lèm kér fó dù e kirə̀ʼ ké cù, e yiì kilìʼ ji nyaa wun, wun yoʼ shòŋ á nyam ŋgaàŋ, é ŋgaà nyàm biímé kilày kìy, é la ŋgaà lèm yòʼ làʼ kifá.

¹²Yii bèy, wáa dzə ji á kù kì shòŋ á fo ŋgaà lèm laʼ, bo wù laʼ ŋgaà nyàm e ye sən.

¹³A lò a dzə ji koò á nyám ye bi, wù kù wìy e vinsàr vi ji kisəəm, e làa yòʼ kfə̀n dzə́ə làʼ kifá. Bo kù sì ji koò á nyám ye bi.

¹⁴«Wìr lón nyam wìr, a lìm lim sho, yì lém, kìn yì kpù kpuún, a bó ŋgaà nyàm yòʼ kì dzə̀ fó si, bo wù fó ŋkùvtu.

¹⁵Kí wáa koóy bèy, a ŋgaà nyàm kì dzə̀ fó si, bo bó ŋkùvtu yòʼ dzə̀ə́. Wáa dzə nyám ye wù səən, e fò kifá, bo kifá ke wù kì foon kí sì vilaʼày bey.

¹⁶«A wìr lèvtí wánlè ŋgòn wo bó á yóʼ ne juùr, e lì, e shìíy sho, bo wù kér fó làʼ juu rə́, e way e lav ji wíiy və.

¹⁷A tàr à wàn woo wiíy tèn ŋkuuŋkùŋ fo wù wáy é lav, bo wù kù‑úù laʼ mbàm réŋréŋ mo júu wánlè ŋgòne yii dzə́.

¹⁸«Wìr woo wiíy lóo bay sə́m, á yùyrí.

¹⁹«Wìr neem e nyàm, á kù yùyrí ŋgaàŋ yúyrín.

²⁰«A wìr cù nyùy wùmòʼ, e shaà NYÙY TÀR, á kù laàr ŋgaàŋ láarin.

²¹«Lá vèn yòʼ a nyàvrì e kiŋgwìy ki, a sə̀tì wun. Vèn kuúmé ji vèn‑eè dzə̀ sá viŋgwìy e wòŋ Ejiv.

²²«Lá vèn yòʼ a nyàvrì e wiíy ŋkfə, kìn e wàn tsə̀.

²³A vèn lò, a nyàvrì aáwune, bo m yíi yu tóŋ yév, ye á yíi a toŋ e mò,

²⁴kilòŋ kí shwiiy mo, é m nèn yùyrí ven é shùu rər, é vikìy véné kfə́n ji vikǐy ŋkfə, é wóné kfə́n ji alàtàr.

²⁵«A wìr foòr mbàm e wìr wo dzəə̀n ŋgaà kitàn e vém vee wírí mvəm, lá wù yòʼ a ghiʼ ji wù fó á sa séʼ mo wír ve á foor mbàme yii yii.

²⁶A wìr sə̀ kikfə́vsì ke wùmòʼ ji wun koò á e kaa, wù kù siìr sho, é bo ndzə wáa ji,

²⁷bìʼ fo dzəə̀n màyshó və kifa ke a dzə̀ wù kfə̀vsí. Wù siì yíi kfəvsí ka, e bóo ker ŋgay mbuùné? A wù tòŋ e mò, bo m yíi yu tóŋ rə́, bìʼ fo m dzəə̀n ŋgaà shammèndzə̀n.

²⁸«Lá wìr yòʼ a kay Nyùy. Lá wìr yòʼ kuù sa wír wo wù sáʼ woŋ wóv.

²⁹«Lá vèn yòʼ a laatí fó a tay vifá ve vèn káv fo sum, moo meŋgvə́r, à meluʼ mè, a cù mo shó. «Vèn yíi a fo wón vén vee dzəə́ mbìyi vee vilum e mò.

³⁰Vèn fó sá wón nyàm vee dzəə́ mbìyi e mò, vé nàʼ, vé bvəy, aá dzə́ʼtí ne wùn à viyìy ví kishiíy saàmbà, lóo dzə e kee waamé kí, vèn nèn fò e mò.

³¹«Vèn kú a dzə wír vém, a dzə aránén. Lá vèn yòʼ mùm, e yì nyám fo ye yuyrin nyám ye bi. Vèn maʼti yee shooy a dzə̀ e jwí si.[55]