Read Lamnso Fəə 25 Bible Online

Fəə 25 - Lamnso bible

Fəə 25

¹NYÙY TÀR suúy e Mooser jii,

²«Yòŋ, é wír veé Israyi cu mo. Ku sə̀ cúu fo wìr mòʼón mòʼón mo shilív sə́ shí bánri wun ji wù fó e mò.

³Cu rə̀ne yíi a dzə jii, kisha ke mbàm ke baar kí wùn à ke fəvír kí, à kisha kee *brons ki,

⁴à ndzə̀y yee làv wo fəvír woo fèm, à làv wo wù səə́ne moo yúv, à wo wù səə́ne moo yòm, à làv wo wù baŋ ji rèm, à ndzə̀y ye á fèrìn e wúy bvəyi,

⁵gúrí wùn à juv nyàm ndzə̀v, à vicí vé kibàʼrì vee *akaasia vi,

⁶meŋgvə́r me làm wùn à virə̀ʼtìn ve meŋgvə̀r ví, à vé kilay ví,

⁷à *síbaŋ yee oniks wùn à síbaŋ símóʼ sí se á yíi laʼtí e taà cù shiŋkèéy shé kikum[65], e kfə̀n laʼtí e wun kifìn keé nsaŋ.[66]

⁸M taʼ ji áwune baʼri kibàn kímóʼ kí kee jeéy, ke m wáa dzə sho e wír vémé mvəm.[67]

⁹M lo, e dìn e wò e naáy naáy mo dzə̀ à bàʼrì, à vifá veé mvəm wó vi vidzə̀m.

¹⁰«À wíy fèr ŋkùv e kicí kee *akaasia ki, é vida vi wáa dzə ntàm se kiwo sitàn, é mbvə̀ʼ wáa dzə ntàm se kiwo sitaár, é vida ve koʼón ví wáa dzə sa ntàm se kiwo sitaár.[68]

¹¹À ferì, à lì kisha ke mbàm ke baar kí, e làʼtí e wùn wó fo ndzə wùn à fó mvəm, é kí sə́tí, e kfə̀n jùŋ shuu e kisha ke mbàm ke baar kí, e kaàrí, e tàr.

¹²À wíy fèr sa dzə́ŋ si sikweè e kisha ke mbàm ke baar kí, é sí wáa dzə e kiŋkar, e nèn tuúy e shwin see sikweè, é sí wáa dzə e wǔn ŋkùv sibaà sibaà.

¹³À wíy fèr vintoòr vibaà e kicí kee akaasia ki, e laʼtí kisha ke mbàm ke baar kí é wùn wó, é kí sə́tí,

¹⁴e nèn lì, e tsənsí e dzəŋ seé virəv vé ŋkùv vee vibaà, aá wáa toór sho.

¹⁵Vintoòr vi kù wíy gòʼ e dzəŋ sé ŋkùv, é la á yòʼ wìy shòʼ fó fo.

¹⁶M wíy fo wò viwaŋ ve tiy vibaà, aá sáŋ ne nsər se *mensàŋ sho, áà wáy é ŋkùv foo fèy.

¹⁷«Á wíy fèr nsər ŋkùv a dzə̀ e kisha ke mbàm ke baar kí, kíwun kíwun, é vida vi wáa dzə ntàm se kiwo sitàn, é mbvə̀ʼ wáa dzə ntàm se kiwo sitaár,

¹⁸e dzə̀vtì kisha ke mbàm ke baar kímóʼ kí, e fèr vifá veé yuv[69] vímóʼ ví vibaà wùn à vav sév sí, é ví wáa tiy e kitu ke nsər ŋkùv fo mbvə̀ʼ si.

¹⁹À kù wíy fèr vifá vìn, é ví wáa dzə e kilàŋsìn wùn à nsər ŋkùv, kímóʼ kí é mbìv yìmòʼ, kímóʼ kí e yìmòʼ.

²⁰Vifá vee vibaà vin vi wíy a kìʼnìn, a kiy nsər ŋkùv, aá nan vav sév, e sàŋrì, é sí wáa kfəvsí kirə́ʼ ké kiman kìn.

²¹À wíy lì viwaŋ ve tiy vee vibaà ve ntò se mensàŋ si dzəə̀n shó ve m wíy fo e wò, e way e ŋkùv, e sar kirə̀ʼ ké kiman.

²²Dzə̀ é shùu ŋkùv foo fèy fo wòsò wíy a tarnín. M wíy suŋnín e wò fo kintìntìn ke vifa vee vibaà ve ví dzəə̀n é kitu ke nsər ŋkùv mensàŋ, é m nèn a fo nsər sém sidzə̀m se dzə̀ à fò e wír veé Israyi.

²³«À wíy fèr sa kidàŋ e kicí kee *akaasia ki, é vida vi wáa dzə ntàm se kiwo sikweè, é mbvə̀ʼ wáa dzə ntàm se kiwo sibaà, é vida ve koʼón ví wáa dzə ntàm se kiwo sitaár.

²⁴À wíy laʼtí kisha ke mbàm ke baar kee wúntí kíwun e wùn wó, é kí sə́tí, e kfə̀n jùŋ shuu e kisha ke mbàm ke baar kí, e kaarí, e tar.

²⁵À wíy fèr sa kikiŋ, é kí kaárí kiyiy ke kidàŋ, e tàr, é vikuʼùy ví wáa dzə mbvə̀ʼ kiwo. Áà nèn lì kisha ke mbàm ke baar kí, e bàrír sho, e kaàrí, e tàr.

²⁶Áà kfən fèr dzə́ŋ e kweè, a kù dzə̀ e kisha ke mbàm ke baar kí, e tùúy e kor see sikweè fo shwín sí dzə̀kìn,

²⁷aà kù tuuy a dzə̀ fó mbìv kùy, e sar kiyìy mo dzə̀ sí ghàr vintoòr ve á toor kidàŋ sho.

²⁸À wíy fèr vintoòr e kicí kee akaasia ki, e laʼtí *kisha ke mbàm ke baar kí é wùn wó, é kí sə́tí, aá wìy a beʼ kidàŋ kìn sho.

²⁹À wíy fèr vikáŋ wùn aàláŋé, e kfə̀n fèr ansiŋ wùn à vighín ví, a dzə̀ ve á wíy a màʼ meluʼ me cù sho, áà ku fèr vifá vìn a dzə̀ e kisha ke mbàm ke baar kí, kíwun kíwun.

³⁰À kù wíy a lèm kibán ke cù e kidàŋ foo fèy, é kí wáa dzə e mǒ si ghán sidzə̀m.

³¹«À wíy fèr sa kifá ke á tiir lam si shó, aà kù fer e kisha ke mbàm ke baar kí, kee wúntí kíwun, é kiyiy wùn à wúné wáa dzə kisha ke mbàm ke baar ke dzəvtìn kí. À ferì, à nàŋsín, é vimboo wùn à vibuushì vé kifa vi wáa dzə e wùn wó e kilàŋsìn, e virə̌ʼ virə̀ʼ.

³²Kitiir kìn ki wíy a ker tám ntuùfú, e taár fo mbìv yee mòʼón, e taár fo yìmòʼ yee mbìv.

³³Tám e mòʼón mòʼón fo woo ntuùfuú wíy a ker vibuushì vitaár, a ví dzə̀ moo kibuushì ké *almon mo kí fəən fó kirə̀ʼ ke boón kí, e nshwìnin wàn kighìn.

³⁴Lóo dzə kiwóŋrín kfə́, é vibuushì vé almon vi wáa dzə sho vikweè wùn à kirə́ʼ ke boón kí fó sar.

³⁵Kirə́ʼ kidzə̀m fo tám si jàvìn fó kiwoŋrín, é kifá ke boón kin ki kú a dzə.

³⁶Kiwóŋrín wùn à tám si, à kifá ke boón kí wíy a dzə, aá dzə́vtí a dzə̀ kisha ke mbàm ke baar kí, kee wúntí kíwun, é kitiir ke làm kìn kidzə̀m ki wáa dzə kilàŋsìn.

³⁷«À wíy fèr lam sə́ saàmbà, e tiír sho, é sí fiʼ wìy a kàʼày mbìv yee fó mbìy.

³⁸À kù wíy fèr sa vimfar ve á náŋsin akfə̀ə́ làm sho, a dzə̀ e kisha ke mbàm ke baar kí, kíwun kíwun, e fèr wón vikaŋ və́ réŋréŋ bey.

³⁹À wíy lì kisha ke mbàm ke baar kí, kee wúntí kíwun akilu nshòv sikweè e mtaár,[70] e bóo fèr kitiir ke làm kìn sho, à vifá veé ghaŋ wo vi vidzə̀m.

⁴⁰À kù wíy fèr, é kí wáa dzə réŋréŋ ji kikúv ke kíwun ke m dìnèn e wò e gwan fèn.