Read Lamnso Fəə 27 Bible Online

Fəə 27 - Lamnso bible

Fəə 27

¹«À wíy fèr *kíy cù e kicí kee *akaasia ki, a wú wíy a dzə kóy e ntàm se kiwo si sibaà réŋréŋ virə́v vikweè, é vida ve koʼón ví wáa dzə ntàm se kiwo ntuùfú.

²À kù wíy fətí kór sə́ see sikweè, é sí jáʼám moo loŋ se nàʼ e kitu ke kiy cù, e tatí kidzə̀m, e laʼtí kisha kee *brons e wùn wó, é kí sə́tí.[72]

³À kù wíy fèr kifá kidzə̀m keé ghaa kiy cù e kisha kee brons ki. Vifá moo vikáŋ ve á wáy kibvə́ sho wùn à viŋkwaà vi, à vighín ví, à vimbav ve nyàm vi, à vikáŋ ve á fəər káy se və̀y shó vi.

⁴À wíy ba kintaàr kfə́ sá e kisha kee brons ki, e kfə̀n fèr sa dzə́ŋ si e kisha kee brons ki, e wayrí e kor woo kweè.

⁵Áà nèn sìysì kintaàr e sar kintìm, é kí fiʼ tìmnìn kíy cù e ntìntìn.

⁶À wíy fèr vintoòr və́ vibaà e kicí kee akaasia ki, e laʼtí kisha kee brons e wùn wó, é kí sə́tí,

⁷e nèn wayrí e dzəŋ se sí dzəə̀n é kor se kiy cù mbìv sibaà, aá wìy a toór sho.

⁸Kíy cùu wíy a dzə e virə́v virəv, a dzə kintosòŋ mo m dìnèn e wò e gwan fèn.

⁹«À wíy fèr kay e ndzə̀y yee làv wo fəvír, é yí gim maàndzə wùn à kibàn kém kí, é vida veé mbìv yee tsə́n ví wáa dzə kóy nshòv sitàn e mbaà.

¹⁰Yí wíy a ker vitóm mbaà wùn à viyiy vi, aá fér viyiy e kisha kee brons ki, é viŋgov veé vitom wùn à mbàŋ sév sí wáa dzə ve á fèrìn e *kisha ke mbàm ke fəvír kí.

¹¹«Vida ve ndzə̀y seé mbìv yee kuy vi wíy a dzə sa kóy nshòv sitàn e mbaà. Vitóm wùn à viyiy vév ví wíy a dzə mbaà mbaà, aá fér viyiy e kisha kee brons ki, é viŋgov veé vitom wùn à mbàŋ sév sí wáa dzə ve á fèrìn e kisha ke mbàm ke fəvír kí.

¹²Fo mbvə̀ʼ, e mbìv ye shùy yii nəə, é ndzə̀y se keerìn sí wáa dzə kóy nshòv sibaà e ghvə̀m e kimbéʼ ki, à vitóm vi e ghvə̀m wùn à viyiy vév ví.

¹³Fo mbìv yee fo shùy yii tó, é mbvə̀ʼ wáa dzə sa kóy nshòv sibaà e ghvə̀m e kimbéʼ ki.

¹⁴Shúu kàyi wíy a dzə e mbìv fóo fèy, a ndzə̀y sé kày si wíy a dzə kóy e baà e ntàm se kiwo si ntuùfú mbìv sidzə̀m, é vitóm vi wáa dzə vitaár vitaár mbìv sidzə̀m wùn à viyiy vév ví.

¹⁶«Ké shùu kày, ndzə̀y se sí sə́ti si wíy a dzə fo medà kóy e tàn, aá fér e ndzə̀y ye á baan e làv wo fəvír woo fèm, e tàtí wùn à wo wù səə́ne moo yúv, à wo wù səə́ne moo yòm, à wo wù baŋ ji rèm, e kfə̀n nàŋsín, e tsə̀m. Ndzə̀y see shooy si wíy a ker e vitom vikweè, a ví tíy e viyìy vikweè.

¹⁷«À wíy tàŋsìn vitóm ve kày vidzə̀m e mbàŋ se à fèrìn e kisha ke mbàm ke fəvír kí, é viŋgov vév ví wáa dzə sa kisha ke mbàm ke fəvír kí, é viyiy vév ví wáa dzə vee kisha kee brons ki.

¹⁸Vida ve maàndzə vi wíy a dzə kóy nshòv sitàn e mbaà, é mbvə̀ʼ wáa dzə kóy nshòv sibaà e ghvə̀m e kimbéʼ ki, é kayi wáa dzə fo vidà veé yuv kóy e kimbéʼ ki. Ndzə̀y se keerìn sí kù wíy a dzə se á baan e làv wo fəvír woo fèm, é viyiy vi wáa dzə kisha kee brons.

¹⁹Vifá vímóʼ ví vidzə̀m ve á lim kibàn shó vi kù wíy a dzə sa kisha kee brons moo viŋkùm ve kibàn wùn à vé maàndzə vi.»

²⁰Nyùy suúy e Mooser jii, «À wíy yòŋ, é wír veé Israyi wiy e meŋgvə́r me *oliv mee rèéŋ mè, áà wáa way e làm, é wú fíʼ a baarí ghán sidzə̀m.

²¹Aaron wùn à wón vəə́ wíy tiír kitiir ke làm e kibàn ké ntàsín[73] fó shwìr, é kí waá dzə e mbìy ràŋ ye yí kiŋ ŋkùv mensàŋ. Áwune kù wíy a naŋsín lam ghán sidzə̀m, é wú wáa ban, e kèʼ fo ŋkuùr e dù, e meé kijàvndzə. Isray kù wíy a lèm kinyo kìn e ŋgwàʼ sí ŋgwàʼ si, e wìy dù, e mày.»