Read Lamnso Fəə 28 Bible Online

Fəə 28 - Lamnso bible

Fəə 28

¹NYÙY TÀR kfən sùúy e Mooser jii, «Suúy ji á wiy á e Aaron woo ŋgàywìr yè, é wù wiy á wùn à Nadav, à Abihu, à Eleasar, à Itamar vee wón və́. Á ku fə̀ə́r áwune fo wír veé Israyí mvəm, aá fíʼ a lìm ji atàá cù vém.

²À wíy fèr ndzə̀y see jeéy, e fo e fər wò Aaron, é wù wáa ker viwìr, e kfə̀n a kìʼ kijuŋ.

³Bo kí dzə̀ jii, à kù wíy suŋnín e wìr dzə̀m wo m foon wun fómo fèr, é wù tátí, e fèr ndzə̀y sé Aaron sìn, áà fiʼ lèm wun ji taà cù wom.

⁴Ndzə̀y se áwune wíy fèr si dzə̀ jii, kifin keé nsaŋ[74] wùn à shiŋkèéy shé kikum[75] shí, à kikúm ke səənén kí, kikúm ke da ke fəvír kí, à tán ye ndzəméné, à kikuúví kí. Á mo áwune kù wíy fèr ndzə̀y sé Aaron woo fər wò, e fèr sé won və́, é sí kú a dzə ji see jeéy, aá fiʼ wìy a lìm ji atàá cù vém.

⁵A vifá ve á wíy fo e vé fèr vìne ví dzə̀ jii, làv wo á fèrìn e *kisha ke mbàm ke baar kí, à làv wo wù səə́ne moo yúv, à wo wù səə́ne moo yòm, à wo wù baŋ ji rèm, e lì ndzə̀y ye á baan e làv wo fəvír woo fèm.

⁶«Áwune wíy fèr shiŋkèéy shé kikum e ndzə̀y ye á baan e làv wo fəvír woo fèm, e nàŋsín, e tsə̀m e làv woo kisha ke mbàm ke baar kí wùn à wo wù səə́ne moo yúv, à wo wù səə́ne moo yòm, à wo wù baŋ ji rèm.

⁷Shí wíy a ker vimbar vibaà é mbèʼ si ve ví táti ŋkuv yee fó bàm wùn à yee fó mbìy.

⁸Kinsiŋ ke kí ghár shiŋkèéy shé kikum shin, aá fer, a kù dzə̀ e vifá ve á fèrìn kikúm shó vi, é kiwó ke lìm ki kú a dzə sa kíwun.

⁹«À wíy lì *síbaŋ yee oniks e baà, e saŋ yír sé wón Isray vee nshòv sibaà e ghvə̀m sho e kintuŋ mo vé‑eè dzəən áwune, aà kù sáŋ see ntuùfú e síbaŋ yímóʼó, e màysì see ntuùfú e yímóʼó.

¹¹Mo wìr fèr yii sáŋ nsáŋtí, bo dzə̀ mo á wíy saŋ yír sé wón Isray e síbaŋ yee bàá bey, e naŋsín, e tuúy, e fiì e kisha ke mbàm ke baar kí.

¹²Aá nèn làʼtí síbaŋ yee baà rən e vimbar veé mbèʼ se shiŋkèéy shé kikum ji kisəəm ké wón Isray. Aaron lóo beʼ yír sév e wun mbèʼ, é la mo woo NYÙY TÀR yòʼ dzəə wìy làysìn wír vém.

¹³«À wíy ba sa viyiy vibaà e kisha ke mbàm ke baar kí, e tsəəmé e vimbar fèy, e nèn fèr ashàŋ abaà e kisha ke mbàm ke baar kí ve á toyin moo kfəə̀, e tàŋ e viyìy foo fèy.

¹⁵«À wíy fèr kifin keé nsaŋ, e tsəm e kfə́ə vifa ve á kì lìmèn shiŋkèéy shé kikum shó vi, aá wìy a tàr kinyo kém shó.

¹⁶À wíy bvənín ŋkuv sibaà, é mfìʼ si wáa dzə réŋréŋ ntàm kiwo e mòʼón mòʼón mbìv sidzə̀m.

¹⁷«À wíy tuúy *síbaŋ shó ŋgoo sikweè. Ŋgoo mbìy wíy a dzə rubi wùn à topar, à garnet,

¹⁸é ye yì bátirì wáa dzə emeral wùn à safiri, à daymon,

¹⁹é ŋgoo yee taár wáa dzə jasin wùn à aget, à amatist,

²⁰é ŋgoo yee kweè wáa dzə beril wùn à oniks, à jespa, áà tuúy síbaŋ sin, e jùŋ e mòʼón mòʼón e kisha ke mbàm ke baar kí.

²¹Síbaŋ e dzə̀me wíy a dzə nshòv sibaà e ghvə̀m, áà náŋsín, e sàŋ yír sí shó, a dzə̀ sé wón Isray, é síbaŋ mòʼón mòʼóne wáa dìn rám Isray e kitu kitu.

²²«À wíy fèr shàŋ kifìn keé nsaŋ e kisha ke mbàm ke baar kí, kee wúntí kíwun, e toy moo kfəə̀,

²³e kfə̀n fèr andzə̀ŋgwáŋ abaà e kisha ke mbàm ke baar kí sá, e tàŋ e kifìn keé nsaŋ kìy e kor see fó yuv.

²⁴Áà nèn wòvsín ashàŋ vee kisha ke mbàm ke baar kí vee abaà é shuù se andzə̀ŋgwáŋ vee abaà viy,

²⁵e lì shuu se shàŋ, e tàŋ e vinta vee vibaà ve ví dzəə̀n é vimbar veé mbèʼ se shiŋkèéy shé kikum fó mbìy.

²⁶Áà nèn kfə̀n fèr andzə̀ŋgwáŋ ámóʼó abaà e kisha ke mbàm ke baar kí, e tsəə̀mé e kor se kifìn keé nsaŋ, a dzə̀ see fó sar, aá wáa dzə e ghaa shiŋkèéy shé kikum.

²⁷À wíy fèr sa ámóʼó vee andzə̀ŋgwáŋ abaà e kisha ke mbàm ke baar kí, e tsəəmé e shiŋkèéy shé kikum fó mbìv tsə̀n vimbar vee vibaà, áà tsəə́mé a dzə̀ é ghaa kinsəʼ, e mbìv kùy kinsiŋ ke á bonen, e tsə̀m kiy, ji á wáa kur shiŋkèéy shé kikum shó fo mbìy.

²⁸À yii bèy, áà nèn lì kfəə̀ wo wù səə́ne moo yúv, e wòvsín andzə̀ŋgwáŋ ve á dzəə̀n é kifìn keé nsaŋ wùn à ve á dzəə̀n é shiŋkèéy shé kikum, é kifin keé nsaŋ ki neem fó mbìv kùy kinsiŋ ke á bonen, e tsə̀m kiy, e làa yòʼ dzə́ə a bàyìn fo shiŋkèéy shé kikum.

²⁹«Á mo à kù wíy yiì bèy, Aaron lóo nəə́ e kirə̀ʼ kee jeéy kí, é wù wáa ker kifin keé nsaŋ ké a tàr kinyo sho, aá toóŋé ne yír sé kfəə seé Isray sho. Yír sév sí kù wíy a dzə e wun shùu shiliv ghán sidzə̀m, é la m yòʼ dzəə wìy làysìn wír vém.

³⁰À kù wíy lì sa Urim wùn Tumim[76], e way e kifìn keé nsaŋ foo fèy, Aaron lóo nəə́ e kirə̀ʼ kee jeéy kí, lóo tiím e mǒ si, é wù kú a ker e wun shùu shiliv. Kù dzə̀ vifá vìn ve wù wíy a lìm sho, e bó a kwàŋrì vinyo ve wìr veé Isray.

³¹«À wíy fèr kikúm ke səənén kí keé sar shiŋkèéy shé kikum e ndzə̀y se nshòm səə́ne moo yúv,

³²e tòʼ shúu kilòŋ fó kintìntìn, aá ku tsə̀m shúu kilòŋ, e fíʼ tavír, fo wú yiì a saàsì.

³³À wíy fèr nshwìnin vitùʼtúʼ vé *grenadin e làv wo wù səə́ne moo yúv wùn à wo wù səə́ne moo yòm, à wo wù baŋ ji rèm, e tsəəmé e shùu kikum fó sar. Lóo tsəəmé, à wàyrí mbìír see kisha ke mbàm ke baar kí

³⁴é nsàn se vituʼtúʼ, áà ku yiì bèy, e kaàrí sár kikum, e tàr.

³⁵Aaron wíy lòo yiì lim rə́ moo taà cù, é wù kú a màʼ kikúm kin. Mbìír sin si wíy lòo kùm, kìn dzə̀ é ghan se wù nəə e kirə̀ʼ kee jeéy, kìn se wù fəə́ fo mǒ si, é la wù yòʼ dzəə kpù.[77]

³⁶«À wíy fèr kicí ké tan e kisha ke mbàm ke baar kí, kíwun kíwun, e saŋ sho jii, ‹Á shòʼ ne jeéy ji wo NYÙY TÀR›,

³⁷e lì kfəə̀ wo nshòm səə́ne moo yúv, e səə́y sho e tan ye ndzəméné fó mbìy.

³⁸Aaron kù wíy a ker kicí ké tan kin e wun yírvishi, wír veé Israyi lóo cù mo, fə́m jáy kinyo, é la m yòʼ kìv njò yev. Kí kù wíy a dzə e Aaron yírvishi, é mo woo NYÙY TÀR ku sə̀ cu yév e dzə̀m.

³⁹«Áà kfən sùúy, aá bá kikúm ké Aaron ke da ki e làv wo fəvír woo fèm. Á bá, á yiì nsáŋtí shó, e kfə̀n fèr sa tán rə́ ye ndzəméné e ndzə̀y see shooy si, e kù naŋsín kikuúví kfə́, e tsəm tsəmén.

⁴⁰«Ké wón Aaron, à wíy fèr vikúm ve da ve fəvír ví wùn à vikuúví ví, à tán sí, áà ku fèr, aáwune fíʼ a ker viwìr, e kfə̀n a kìʼ ajuŋ.

⁴¹Á ferì, áà nèn lì sé Aaron woo fər wò, e màʼ e wùn wó, e màʼ sé won aáwuné wùn, e sòr áwune adzə̀m e meŋgvə́r me *oliv mè, e yòʼ, e lèm jeéy ji á wáa lìm a fo mò ji atàá cù.

⁴²«À wíy fèr sa asə̀là ve tsəmé vee lò fó mentìntìn, a meé e taŋ se shwin, aáwune wìy a way e sar ndzə̀y, fo vinshóʼ vév ví wáa yensín.

⁴³Aaron wùn à wón vəə́ kù wíy a way asə̀là vìn, e bó a nəə́ e mǒ *kibàn ké ntàsín, a wìy e mǒ kiy cù, a yiì lim yév yé atàá cù. Á kù wíy a yiì bèy, fóo lì njò, e kpukír. Kin ki dzə̀ nsər ye yì kù wíy a tiy fo bìʼ Aaron wùn à rám rə́ə.»