Read Lamnso Fəə 29 Bible Online

Fəə 29 - Lamnso bible

Fəə 29

¹NYÙY TÀR kfən sùúy e Mooser jii, «Kinyo ke à kù wíy yiì, e bóo lèm Aaron wùn à wón vəə́ ji atàá cù, aáwune fíʼ a lìm lim yém kí dzə̀ jii, à wíy tàʼ wan nàʼ wùn à wón viyaʼa abaà, vee là nsem,

²e kfə̀n tàʼ meŋkfəŋ me *wit me juŋ mè, áà nèn tòn kibán kee là nyaà e meŋkfəŋ mèy mè. À wíy tòn kibán kìn dzə́ə sitaár, é kímóʼ kí wáa dzə kee là meŋgvə́r, é kímóʼ kí wáa ker meŋgvə́r, e tòn kibér e mentuʼ, e bóo yoʼ e meŋgvə́r mè.

³À maysì, à wày é ŋkaà, e wìy sho wùn à wàn nàʼ woo lumèn, à wón viyaʼ vee abaà víyi ji cu.

⁴«Áà nèn lì Aaron wùn à wón vəə́, e wìy sho e mǒ shùu *kibàn ké ntàsín, e sù áwune e mendzə́v mè.

⁵Mo à suùn, à nèn lì ndzə̀y sé Aaron, e màʼ e wun wùn, e kèʼ fo kikum ke da ke fəvír kí, e dù e ke səənén kí, e lì shiŋkèéy shé kikum, e màysì e kifìn keé nsaŋ, e nèn kur kinsiŋ ke shiŋkèéy shé kikum ke á bonen, e tsə̀m kiy.

⁶À kù wíy kur sa tán ye ndzəméné é kitu wo, e sòv kicí ké tan shó, ke kí din ji dzə̀ á wír wom woo jeéy.

⁷Áà nèn lì meŋgvə́r me yoʼ, e cuùrì e wun kitu, e yòʼ wun.

⁸«À wíy lì sa wón və́, e màʼ vikúm ve da ve fəvír ví aáwuné wùn,

⁹e kur vikuúví, e nèn kur sa tán sév. Á mo à wíy yoʼ Aaron wùn à wón vəə́ bey, é wùn à rám yéví ku wìy a lìm fo mò ji atàá cù, e wìy dù, e mày.

¹⁰«À wíy koʼór wan nàʼ e shùu kibàn ké ntàsín, é Aaron wùn à wón vəə́ neer wó yév é kitu wo,

¹¹áà nèn seè fó, e mǒ si,

¹²e lì mensə́ memoʼ mè, e sə̀ʼ e wàn kiwo, e yoʼ loŋ se *kiy cù sho, e leér kibér e sar kiy cù.

¹³Áà nèn lì fóm se sí sə́ti vitó sidzə̀m, e kfə̀n lì kimbày ke bày, à ndzəʼ si wùn à fóm sə́ sí, e tàtí, e tòn e kiy cù.

¹⁴Yii bèy, áà ton jav nyàm wùn à jùv, à vitó vi, à jáŋe, à kibér ke kifa ki kidzə̀m a dzə̀ é shweesí. Kee shooy ki dzə̀ cu ajay.

¹⁵«Áà nèn lì kiyáʼ kee kimòʼón ki, é Aaron wùn à wóné neer wó yév é kitu wo,

¹⁶áà seé, e lì mensə́, e wàŋ é virəv vé kiy cù vee vikweè.

¹⁷Á kù wíy shètì nyam kiyaʼ yee shooy e vibàr vibàr, e sù vifá ve mvəm ví wùn à vikoy vi, e nèn baʼtí vibar wùn à kitú ki, e neèr vikoy wùn à vifá ve mvəm ví é kitu wo,

¹⁸e tatí, e tòn kidzə̀m e kiy cù. Dzə̀ cu NYÙY TÀR ye á ton e dzə̀m. Kù dzə̀ cu ye və́yí bin fo fo, kiyúy kfə́ kí rəʼtìn, boŋ mo féyì.

¹⁹«À wíy maysì kiyáʼ kímóʼ kí, é Aaron wùn à wóné neer wó yév é kitu wo,

²⁰áà nèn seè, e lì mensə́ mvə memoʼ mè, e kùm shóy kitùʼùr ké Aaron ke yìy kí shó, e kùm sa vituʼùr vé won və́ shó, e kfə̀n kùm sa aáwuné viyìy vé wo ve yìy ví, e kùm e viyìy vé wuù vé yìy ví, e nèn waŋ kibér e virəv vé kiy cù vidzə̀m.

²¹À wíy ŋèʼ mensə́ memoʼ mè fo kiy cù, e ŋèʼ sa meŋgvə́r me yoʼ, e waŋ vidzə̀m e Aaron wùn, e kfə̀n waŋ e wun ndzə̀y, e waŋ e wón vəə́ wùn, e waŋ sa aáwuné ndzə̀y. À yii bèy, bo à tsə̀ʼ ne Aaron wùn à wón və́ə, e lèm jeéy ji wír vém, e lèm sa ndzə̀y sév jeéy ji kifá kém.

²²«À wíy fətí fóm si fó kiyaʼ, e fəə́r kún wùn à fóm sə́ sí,[78] à fóm se mvəm sí, à kimbày ke bày ki, à ndzəʼ si sidzə̀m wùn à fóm sə́ sí, áà kfən fə̀ə́r sa kibiy ke yìy kí, bìʼ fo dzəə̀n kiyáʼ ke á yóʼ taà cù sho.

²³Áà nèn fə̀ə́r ntuʼ se kiban kee là nyaà fó ŋkaà kiban ye à kì foon e mò, ntuʼ e mòʼón mòʼón fo kfəə se kiban sidzə̀m, ke kí yòʼ kér meŋgvə́r, à ke à tovin wùn à meŋgvə́r mè, à ke á tònèn é mentuʼ, e yòʼ yóʼón e meŋgvə́r mè,

²⁴e way vifá vìn e Aaron wùn à wóné wo, aá nan é yuv e mò woo NYÙY TǍR si, ji sì á cu yém yee jeéy.

²⁵Áwune nanè, áà nèn sə̀ kidzə̀m fo áwuné wo, e dzə̀sì e nyàm ye á kì yíi tòn, e tòn kidzə̀m e kiy cù, é kiyúy kfə́ kí wáa rə̀ʼtìn, a bòŋ mo. Dzə̀ cu NYÙY TÀR ye və́yí bìnèn fó fo.

²⁶«À wíy shoʼ shúu shilív kiyaʼ ke á yóʼ Aaron sho və̀n jeéy, e nàn e yuv ji cu ye á foon e mò bey, é yee shoon yee mbìv nèn a dzə ye.

²⁷Á wíy lóo yoʼ taà cù, á kù a shoʼ shúu shiliv wùn à kibiy ki fó kiyaʼ ke cù, a fo ji cu yém yee jeéy, aá nèn fò áàtàá cùu.

²⁸Kù sì nsìysì wom bey ŋkuuŋkùŋ. Wír vémé yii cu kikòŋnìne, bo shúu shilív kiyaʼ wùn à kibiy ki dzə̀ ké atàá cù, bìʼ fo dzəə̀n yéem yee mbìv fó nyàm ye wír veé Israyi cu mo shó.

²⁹«Aaron wíy kpú, á lì ndzə̀y sə́ sé taà cù, e fò e njìlaʼ və, é wù maʼ é ghan se á yóʼó, aá kù wíy a yiì bèy e ŋgwàʼ sí ŋgwàʼ si.

³⁰Wan Aaron woo njìlaʼ və wíy lòo kèʼ lim rə́ ji taà cù wo wù nəə e kibàn ké ntàsín, a cù mo e mǒ kirə̀ʼ kee jeéy kí, é wù shiíy e ndzə̀y sin si é wùn kishiíy saàmbà.

³¹«Ké kiyaʼ ke à wíy yoʼ Aaron wùn à wón və́ə shó, à wíy lì nyám rə, e naá e kirə̀ʼ ké cù,

³²é Aaron wùn à wón vəə́ yí e mǒ shùu kibàn, aá kù yí e kiban ke kí berin é ŋkaà.

³³Kù wíy yi áwune vifá ve á manen ajay sho e ghan se á yoʼon áwune. Kù wíy a yi atàá cù cáʼ, bìʼ fo dzəə̀n vidzə̀ vém.

³⁴Ndzə wáa jàv, a nyàm bér, kìn bèr kibán, bo á tonè, é la wìr yòʼ dzəə yì, bìʼ fo dzəə̀n vidzə̀ vé NYÙY TÀR.

³⁵«À kù wíy yoʼ Aaron wùn à wón vəə́ bey kishiíy saàmbà mo m yòŋèn e wò.

³⁶Kishiíy kidzə̀m, à wíy a yiì cu yee bìʼ ajay e nàʼ woo lumèn, e fíʼ a man ajay vév, é kíy cùu wáa dzə sa e ránén. Áà nèn kfə̀n yòʼ kíy cù yóʼón, é wú wáa dzə ji kifá kém.

³⁷Ku wìy a yiì bèy, kishiíy kee saàmbà kidzə̀m, é kíy cùu nèn wìy a dzə jeéy ji kifá kém ŋkuuŋkùŋ. Kifá ki kumè, bo kí kù sì sá kifá kee jeéy kí.[79]

³⁸«Vifá ve à wíy a yiì cu sho e *kiy cù kishiíy kidzə̀m vi dzə̀ wón viyaʼ abaà vee kiyá kiyá.

³⁹A dzə̀ ji wan kiyaʼ kijàvndzə, wùmòʼ e ŋkuùr.[80]

⁴⁰Ké wàn kiyaʼ woo kijàvndzə ki wíy a dzə jii, à wíy tatí wùn à meŋkfəŋ me kpuún mè kilu e mòʼón, aá tóv e meŋgvə́r me *oliv me juŋ mè lita e fur,[81] e kfə̀n lì sa lita melùʼ me á yíi màʼ ji cu.

⁴¹Lóo dzə e ŋkuùr, áà wáa yiì sa bèy e wàn kiyaʼ wo wù bérí, e tatí wùn à meŋkfəŋ mè, à meluʼ mè réŋréŋ mo à kì yiìn kijàvndzə. Kee shooy ki dzə̀ cu ye və́yí bin fo fo, a kiyúy kfə́ kí rəʼtìn, boŋ mo.

⁴²Cu rə̀ne kù wíy a dzə e ŋgwàʼ sí ŋgwàʼ si mo rám sén sí wíy a dzə. Á wíy a tòn cu rə̀n e shùu *kibàn ké ntàsín, e mo woo NYÙY TǍR si. Dzə̀ fóo fèy, fo wòsò wíy a tarnín, é m wáa suŋnín wòsò.

⁴³Dzə̀ sá foo fèy, fo vèr à wír veé Israyi wíy a tarnín. M wiy fo, é vikuʼùy vém ví yii, é kirə́ʼ kee shooy ki kfə́n ji kém kee jeéy kí.

⁴⁴M wíy shoʼ kibàn ké ntàsín wùn à kíy cùu jeéy. A m wíy lèm Aaron wùn à wóné, aá wáa lìm lim yém ji atàá cù.

⁴⁵M wíy a dzə e wír veé Israyí mvəm, a dzə Nyùy wov.

⁴⁶Áwune wíy kiíy ji dzə̀ á mo NYÙY TÀR wo dzəə̀n Nyùy wov, wo m fəərin áwune fó wòŋ Ejiv ji m fíʼ a dzə aáwuné mvəm. Kù dzə̀ mo NYÙY TÀR, wo dzəə̀n Nyùy wov.