Read Lamnso Fəə 3 Bible Online

Fəə 3 - Lamnso bible

Fəə 3

¹Mooser‑iì dzə́ bèy, leey bvə́y se sə və Jetro wo yì‑iì dzəə̀n taà cù woó Midian. Wìy lòo dzə e kishiíy kímóʼ kí, wù lì bvə́y si, e tsəə̀né, e dù sho e woʼ, kù a kìʼ mbìv yee fo shùy yii nəə. Wù meé é Horev[10] wo yì‑iì dzəə̀n Gwan Nyùy,

²nshìylav NYÙY TÀR fəə́sín e wun si, a yì‑iì dzə̀ é mvə̀m kiliìmé ke və̀y wo wú‑uù shwí e kici. Wù‑uù yèn, a və́yí baári e kici, a bó kí yòʼ shwí, wù wáa ker gháʼ.

³Wù nèn sùúy jii, «M kù‑úù kóʼtí fó mentsə̀m, e yèn kiŋgaʼnìn ke kinyò kee ben, ke və́yí baári e kici, a bó kí yòʼ shwí.»

⁴NYÙY TÀR yén, a wù kóʼti fo mentsə̀m ji wun leéy, e nèn yòŋ fo mvə̀m kicì jii, «Mooser, Mooser.» Wù biímé jii, «Mo və̀ne.»

⁵Nyùy suúy shó jii, «Lá à yòʼ dzəə kòʼtí, e wìy fo mentsə̀m. Shóʼtí alábáʼ vée, bìʼ fo à sí tíy a dzə̀ e Nyùy kirə̀ʼ ke ranén kí.»

⁶Wù kfən sùúy sho jii, «M dzə̀ Nyùy tàr won, Nyùy Abraham, à wo Aysi, à wo Jakov.» Mooser yú bey, e nèn sə̀tí sí rə́, bìʼ fo wù‑uù fan fó shov sí Nyùy.

⁷NYÙY TÀR nèn sùúy jii, «M kù yén mo á nyavrì e wír vémé é Ejiv. M yù ne mo áwune tóŋ ji á sə́ áwune fo wír ve á nəʼsì áwuneé wo. M kì ŋgeʼ sév sidzə̀m.

⁸Á bèy, m nen sə̀y ji m boyir á áwune fo wír veé Ejiví wo, e fəə́r fo nsay foo fèy, e dù sho e nsay ye juŋ, nsay ye vín nàʼ wùn à vilu vi tsəətìn sho. A dzə̀ nsay ye wír veé Kanan wùn à veé Hiti, à veé Amori, à veé Perisi, à veé Hivi, à veé Jebusi dzə́ sho.

⁹Dzə̀ a m yú rú tóŋ wìr veé Isray, e kfə̀n yèn dzə́ə ye wír veé Ejivi táy áwune shó.

¹⁰M sí túm wò lèn fo Farao wùn, áà du, e fə̀ə́r wír vém veé Isray fo Ejiv.»

¹¹Yii bèy, Mooser bìnèr e Nyùy jii, «M dzə̀ kém la, é bo kí wáa dzə ji du mo, e yèn Farao, e fə̀ə́r wír veé Isray fo Ejiv?»

¹²Nyùy nèn sùúy jii, «M yíi a dzə wòsò. À yíi fəə́r wír veé Isray fo Ejiv, á cu mo é gwan fèn, é nèn a dzə kisəəm kee ji tùm á mo wò.»

¹³Mooser dzə́r e Nyùy jii, «A m dù, e yèn wír veé Isray, e sùúy aáwune jii, ‹Nyùy woo wo atàr vén tùm mo fo věn wùn,› á dzə́r jii, yír rəə́ sà dzə̀ la á, m bìnèr ji ka?»

¹⁴Nyùy suúy e Mooser jii, «Yír yémé dzə̀ ji DZƏ̀ MO WO DZƏƏ̀N MO. À yíi suúy e wír veé Israyi ji tùm á DZƏ̀ MO wò fo áwuné wùn.»

¹⁵Nyùy nèn kfə̀n sùúy e Mooser jii, «Suúy e wón veé Israyi ji tùm á NYÙY TÀR[11] wò fo áwuné wùn, wun woo Nyùy atàr vév vee Abraham, wùn à Aysi, à Jakov. Á mo yír yémé dzəə̀n, e wìy dù, e mày, aá kù wíy a yòŋ mo bey, ŋgwàʼ yìmòʼ e yìmǒʼ bàm.

¹⁶«Dù ri, e bàʼtí vilìmbìy ve wìr veé Isray vi, e sùúy aáwune ji NYÙY TÀR, Nyùy atàr vév, Nyùy Abraham, wun à Aysi, à Jakov kì wìy ne fo wò wùn, e sùúy a ji wun lèéy ne, e yèn á mo á nəʼsì áwune é Ejiv.

¹⁷Wù nen kàʼ ji wun yíi fəə́r a áwune fó ŋgeʼ yeé Ejiv, e dù sho e nsay ye vín nàʼ wùn à vilu vi tsəətìn sho, a dzə̀ fo wír veé Kanan wùn à veé Hiti, à veé Amori, à veé Perisi, à veé Hivi, à veé Jebusi dzə́.

¹⁸«Vilìmbìy ve wìr veé Isray vi yíi yu kinyo ke à suuyì, e biimé, é vèn áwune nèn dù, e yèn fon woó Ejiv, e sùúy e wun ji NYÙY TÀR, Nyùy wìr vee *Hibru kì wìy fo věn wùn. Vèn nén a lon wun lèn a ji wù maʼti, é vèn du ghán e woʼ, e fíʼ cù NYÙY TÀR woo Nyùy won, ghán ye yí yíi lì ven vishiíy vitaár, é bo á meé fó.

¹⁹M kì ji bó fòn woó Ejiv yòʼ yíi màʼtì ven ji á du, a bó wù yén ji kí tàv á ne.

²⁰M yíi lì vitaáví vém, e màʼ ŋgeʼ se biibí sí e wír veé Ejiví kitu, é bo wù maʼti ven, é vèn wáa dù.

²¹«M yíi yiì, é wír veé Ejivi ku ghvə̀m ven, vèn lóo lò, é la vèn yòʼ a lò e wó yéné e yúmér.

²²Wiíy e mòʼón mòʼón yíi dù fo ŋgaà və shweèsí, kìn fo wiíy wo wù bee e wun lav, e lon vifá ve sùsù ve á fèrìn e kisha ke mbàm ke baar kí, e lon ve á fèrìn e ke fəvír kí, à ndzə̀y sí, é vèn fó e wón vén vee vilum wùn à vee vikìyí, aá wáa dù sho. Á bèy, bo vèn kùúy ne káv wìr veé Ejiv.»