Read Lamnso Fəə 30 Bible Online

Fəə 30 - Lamnso bible

Fəə 30

¹«À wíy fèr kíy cù wo á yíi a tòn kiláy shó, aà kù fer a dzə̀ e kicí kee *akaasia ki.

²Wú wíy a dzə réŋréŋ mbìv sidzə̀m fo vidà ve wavín ví wùn à fó mbvə̀ʼ, ntàm se kiwo sibaà sibaà, é vida ve koʼón ví wáa dzə ntàm se kiwo sikweè. À wíy fèr kór see sikweè, é sí fəə́kír moo loŋ se nàʼ bèy, e kitu ke kiy cù.

³À wíy laʼtí *kisha ke mbàm ke baar kí, kee wúntí kíwun e wùn wó, é kí sə́tí kíy e dzə̀m, kiyiy, gháŋ si, à loŋ si, áà nèn kfə̀n giìmè shuu, e kaàrí, e tar, kù e kisha kíwun ki.

⁴À wíy fèr andzə̀ŋgwáŋ abaà e kisha ke mbàm ke baar kí, e tuúy e wǔn kiy, a dzə̀ é sar kikìŋ kee fó yuv, e yiì bèy mbìv sidzə̀m. Dzə̀ fo á wíy a wayrí vintoòr, a beʼ sho.

⁵À wíy sem vintoòr vìn e kicí kee akaasia ki, e laʼtí kisha ke mbàm ke baar kí é wùn wó, é kí sə́tí.

⁶À wíy tiír kíy cù və̀n e mbìy ràŋ ye yí kìŋèn ŋkùv mensàŋ, é wú wáa tiy e mbìy kirə̀ʼ ké kiman ke kù dzəə̀n nsər ŋkùv, e kirə̀ʼ fóo fèy, fo wòsò wíy a tarnín.

⁷«Aaron kù wíy a tòn kiláy ke rəʼtìn kí é kiy cù fèn kijàvndzə kidzə̀m mo wù wìyìn, a naŋsín lam si.

⁸Wù kfə̀n wíy a tòn sa kiláy e ŋkuùr, a wù sí səʼ lam si. Kiláy kí kù wíy a shwi bèy e NYÙY TǍR si kishiíy kidzə̀m.

⁹Á yòʼ kér fó wìy a tòn kiláy ke sən kí é kiy cù fèn, a bó yòʼ dzə̀ sá á tòn nyam cù fo, kìn meŋkfəŋ, a bó á yòʼ maʼ sa meluʼ fo.

¹⁰Wíy lóo dzə̀ e kitu ke kiya, Aaron kù kfə̀mrí[82] *kíy cù kilay vən, a dzə̀ ji wù wíy a lì mensə́ me nyàm ye á yiìn cu ajay sho, a yoʼ e loŋ seé kiy cù fèn. Dzə̀ kíy cù NYÙY TÀR, a dzə̀ kifá kee jeéy kí ŋkuuŋkùŋ, a wú kér fó a dzə e ránén. Á kù wíy a yiì bèy, mo rám sí wíy a dzə.»

¹¹NYÙY TÀR kfən lò, e sùúy e Mooser jii,

¹²«À wíy lòo taŋ wír veé Isray e ghan sé kintaŋ, é wìr mòʼón mòʼón wáa fo kifá e NYÙY TÀR, e fíʼ tin kitú kfə́ é ghan se á taŋen wun. Á fó bèy, é la ŋgeʼ yòʼ dzəə wìy gbù e wírí kitu e ghan sé kintaŋ.

¹³A dzə̀ jii, wìr mòʼón mòʼón wo à wíy taŋ e ghan sé kintaŋ kù kér fó wìy fo kisha ke mbàm kintoʼnìn ke *shekel, aá kù fiʼ réŋréŋ mo shekel wo dzəə̀n wo cù yii dzə́ ji *gera mbaà fó shekel e mòʼón.

¹⁴Wìr dzə̀m wo à taŋen, e kèʼ fo kiya mbaà, kù kér fó fo cu NYÙY TÀR rən.

¹⁵Bó ŋgaà kav yòʼ wíy a fo, a bàŋrìn, a bó ghéʼncey yòʼ wíy a shoʼór kifá fo mbàm se á fó e NYÙY TÀR sin, e bóo tin kitú kfə́.

¹⁶À wíy a sə mbàm sìn fo wír veé Israyi, a lèm ji sé lìm yeé kibàn. M wíy a kuumé wír veé Isray bìʼ mbàm sìn, a teʼtín áwune fó ŋgeʼ.»

¹⁷NYÙY TÀR yòŋ e Mooser jii,

¹⁸«À wíy fèr màkìghìn e kisha kee *brons ki, é kiyiy ki wáa dzə sa kisha kee brons, e tiír e maàndzə e kintìntìn ke *kibàn ké ntàsín wùn à kíy cùu, e way mendzə́v me virə̀ʼ ve suùn ví shó.

¹⁹Dzə̀ fo Aaron wùn à wón vəə́ wíy a sù wó wùn à wuú.

²⁰Áwune wíy lóo nəə́ e kibàn ké ntàsín, á sù virə́ʼ é mendzə̀v fen. Á lóo dù e ghaa kiy cù ji á tonri nyám si, a cù mo shó, á kù sù sa bèy. Áwune lóo yiì bèy, é la á yòʼ dzəə kpùkír.

²¹Á kù wíy a sù wuú wùn à wóo, e fíʼ a dzə, e làa yòʼ kpukír. Wíy a dzə nsər ye Aaron wùn à kfə́ə rəə́ wíy a lèm, e wìy dù, e mày.»

²²NYÙY TÀR kfən lò, e sùúy e Mooser jii,

²³«À wíy lì virə̀ʼtìn ve ví bòŋèn é ŋàŋ, *mer woó mendzə̀v kilu ntuùfú, é *sinnamon wùn à *ken wáa dzə akilu ataár ataár,

²⁴vé *kaasia kilu ntuùfú, aá ku fìʼ vifá vìn vidzə̀m e shùu mfìʼ ye dzəə̀n yeé lav cù.[83] Á kfən lì meŋgvə́r me *oliv alita akweè[84], e shwìr wùn à virə̀ʼtìn vìn vi,

²⁵e fèr meŋgvə́r me yoʼ mee jeéy shó, é mè wáa rə̀ʼtìn moo me ŋgaà wo wù fer biʼ se rəʼtìn sí bey.

²⁶Ferì, áà nèn yòʼ *kibàn ké ntàsín shó wùn à ŋkùv mensàŋ,

²⁷à kidàŋ ki wùn à vifá və́ ví vidzə̀m, à kitiir ke làm ki wùn à və́ vee vifá vi, à *kíy cù kilayí,

²⁸à *kíy cù woo wó cù ye tonèné wùn à vifá veé ghaŋ wo vi vidzə̀m, à màkìghìn woo wo mendzə̀v, à kiyiy kfə́ kí.

²⁹Ku yòʼ bey, ji ví fíʼ a dzə jeéy féyì ji vé Nyùy ŋkuuŋkùŋ. Kifá ki kumè, kìn kùm wír, é wù ku nèn kfə̀n sá ji kifá ke siìn ké Nyùy.[85]

³⁰À yii bèy, áà nèn yòʼ sá Aaron wùn à wón vəə́, e lèm, aáwune wáa lìm fo mò.

³¹«À wíy yòŋ e wír veé Israyi ji mo rám sév sí wíy a dzə e ŋgwàʼ sí ŋgwàʼ si, meŋgvə́r mèn mè kù sí wìy a dzə a jeéy ji méem me yoʼ.

³²Áwune wáa yen a fo wìr yóʼ wír woo və̀y sho, e kfə̀n a yen sa fo wìr tátí kfəə́ se virə̀ʼtìn vìn, e fèr meŋgvə́r mvə shó. Dzə̀ meŋgvə́r mem mee jeéy, áwune ku nèn a ker a mee shoon jeéy.

³³Wìr wo wù wíy mùm, e fèr meŋgvə́r moo mèn bèn, kìn wù yòʼ a dzə̀ wír woo və̀y sho, bo á kù fəər ŋgaàŋ fo wír vémé mvəm.»

³⁴NYÙY TÀR nèn sùúy e Mooser jii, «À wíy lì virə̀ʼtìn vee jii, *stak, wùn à *onika, à *galbanum, e lì *frankinsen woo fèm, e lì vidzə̀m réŋréŋ,

³⁵e tatí, e fèr kiláy shó, é kí wáa rə̀ʼtìn moo ké ŋgaà wo wù fer kiláy ke rəʼtìn kí bey. Wáy shiŋgwáŋ shi shó, é kí fíʼ a dzə jeéy, e kfə̀n a dzə ji rèéŋ.

³⁶À wíy tsəy mbìv kilày yìmòʼ, é yì kfə́n é meŋkfə̀ŋ, áà ŋoʼ kímóʼ kí, e dù sho e *kibàn ké ntàsín, fo wòsò wíy a tarnín, e lèm e mbìy ŋkùv mensàŋ. Kin ki wíy a dzə kiláy kém kee jeéy kí féyì.

³⁷Wìr wáa yen fó wìy fèr kiláy kfə́ réŋréŋ ben. Vèn kù wíy a ker ji kifá kee jeéy kí ke á cuùn mo shó.

³⁸Wìr wo wù wíy mùm, e fèr bèy ji kfə́, bo á kù fəər ŋgaàŋ fo wír vémé mvəm.»