Read Lamnso Fəə 32 Bible Online

Fəə 32 - Lamnso bible

Fəə 32

¹Wír veé Israyi yiì lò, e yèn ji Mooser dù ne, e laàtí a e gwan, e làa yòʼ dzə́ə səy, áwune nèn bàʼtí e Aaron ghaŋ, a ghiʼ wun jii, «Shaà, e fèr nyùy[87], e fò e vèr, é wù wáa dànèr ver. Ké Mooser və̀y wo wù‑uù fəərin ver fó wòŋ Ejiv, bó vèr yòʼ kì kinyo ke kí kooyin wun.»

²Aaron suúy aáwune jii, «Vèn kati ri ayèreŋ vee *kisha ke mbàm ke baar kí fo vikìy véné vitùʼùr, à fo wón vén vee vikìy wùn à vee vilume, e wìy, e fò e mò.»

³Wìr dzə̀m nèn shòʼtí ayèreŋ vév vee kisha ke mbàm ke baar kí, e wìy, e fò e Aaron.

⁴Wù sə́, e tòn, e fèr wan nàʼ woo lumèn sho. Wíri yén, e nèn a ndzəʼ jii, «Éèy Isray, Nyùy wor éèy. Nyùy wo wù‑uù fəərin ver fó wòŋ Ejiv və̀ne.»

⁵Aaron yén bey, e nèn bòm kíy cù e wàn nàʼ və̀y mbìy, e fò sáʼ e wír veé Israyi jii, «Á bvəə́shi, a ker a ŋkàʼ wóo ghvəm NYÙY TÀR.»

⁶Wù yòŋ bèy, yì bvəə́shí, e jàv, wír veé Israyi wìy e nyám si, a yiì cu sho, ton se tonèn sí, seéri se á yíi kfər ji cu kikòŋnìn. Á yiì bèy, e nèn dzə̀ʼə̀m, a yi vitú vév, a no meluʼ, e yiì lò tsə̀ə́m ceŋ, a sheʼrí shibvə̀m.

⁷NYÙY TÀR nèn sùúy e Mooser jii, «Á səy cér, e yèn wír vé ve wò‑oò yiìn, á fəə́, e kòʼ fó wòŋ Ejivi. Áwune yiì ne joonè.

⁸Áwune kù lò ne, e màʼtì dzə́ə ye mò‑oò tirin áwune shó, e fèr wan nàʼ e kisha ki ji shibvə̀m, a ghvəm, a seerí nyám si, a cù sho. Jòkìnyàʼ, aá yii bèy, yoŋ ji dzə̀ á nyùy wov wo wù‑uù fəərin áwune fó wòŋ Ejiv.»

⁹Nyùy kfən sùúy e Mooser jii, «M kì ji wír vìne tàv kitú feyì.

¹⁰Leéy kinyo ke m lo, e yiì aáwune kí, lá à yòʼ jìvír mo. M shwìíy ne kilòŋ bìʼ áwune, a m kù‑úù laar áwune. M laarì, é m nèn yiì, é yé yee rámé wìy a dzə kitúm ke ghaʼán kí.»

¹¹Mooser yú bey, e kù nèn a lon NYÙY TÀR woo Nyùy və lónén, a suúy jii, «Éè NYÙY TÀR, à kì yíi a shwiíy kilòŋ rú bìʼ wír vé bèn à, wír ve wò‑oò fəərin fó wòŋ Ejiv e vitaáví vé ve ghaʼtín ví.

¹²A dzə̀ à wàa tàʼ rú ji wír veé Ejivi wìy sìíy, a nyè lám ji wò‑oò fəər wír vé fo Ejiv ji à laar áwune áàgwan, aá lay fó kitu ke nsay ŋkuuŋkùŋ à? Ku yàr kilòŋ ke shwiiyín kí, e kùvsín kwaʼtì yé yee ji à kù laar wír vée.

¹³Kuúmé aŋgàa lìm vé vee Abraham wùn à Aysi, à Jakovi. Kuúmé ji wò‑oò lìʼ, e kàn ké kee kitú ji à wíy kùʼùr a rám yév, é yí wáa dzə nyanyày moo mejiy meé yuv, áà kfən fò rám rən nsay ye wò‑oò kàʼàn atàr vév shó, é yì wáa dzə ji yéev ŋkuuŋkùŋ.»

¹⁴Á bèy, NYÙY TÀR nèn kùvsín kwaʼtì ye wù kì sí kérí ji wun laar a wír və́, e làa yòʼ dzə́ə laàr áwune.

¹⁵Mooser nèn sə̀y fó gwan, a wù sí kfə́n e bàm e viwaŋ ve tiy ví vibaà ve á saŋen ntò se *mensàŋ sho mbìv sidzə̀m, à fó mbìy, à fó bàm.

¹⁶Kù‑uù fèr NYÙY TÀR viwaŋ ve tiy vin, kfən sàŋ wun nsər se sí‑iì dzəə̀n shó.

¹⁷Joshua‑aà sə́y wùn Mooser, wù lò, e yù, a wíri rəə́me, e sùúy e Mooser jii, «M yú, a shirəə́ shi kóʼ fo vibàn vé kilaʼáy moo shé rər bey.»

¹⁸Mooser sháʼnín jii, «Àáy, rəə́ və̀ne yòʼ koó ji wó wìr ve á soon, wú yòʼ koó sa ji wó wìr ve á tònèn áwune. M yú rəə́ a dzə̀ wó yòv.»

¹⁹Mooser lòo meʼ fo mentsə̀m, e yèn shibvə̀m shee wan nàʼ shìy, e kfə̀n yèn, a wíri ceŋ, kaári, kí ŋáv wun, wù sán viwaŋ ve tiy ve wù‑uù béʼé e nsay, ví bvə́ʼə́y é sar gwan.

²⁰Wù nèn dù, e boò shibvə̀m she vé‑eè fèrìn shiy, e tòn, e jò, shí kfə́n é meŋkfə̀ŋ. Wù nèn lì, e shwìr é mendzə̀v, e kàn wír veé Isray, á nó.

²¹Mooser dzə́r e Aaron jii, «Wír vìne kì yèe le e wò, é bo à yii, aáwune jáy kfə́ə jay və̀n?»

²²Aaron bìnèr jii, «Tàr wor, lá à yòʼ shwìíy kilòŋ wòsò. À kì sá kijuujùŋ mo wír vìne dzəə̀n kibáʼtín fó yiì kinyo ke bi kí.

²³Áwune‑ee suúy e mò jii, m fer á nyùy[88], e fò aáwune, é wù wáa dànèr a áwune. Áwune yòʼ kì á kinyo ke kí kooyin Mooser və̀y wo wù‑uù fəərin áwune fó wòŋ Ejiv.

²⁴M nèn yòŋ aáwune jii, a fə̀m kér la yèreŋ, wù shòʼ, e fò á e mò. Áwune ku nèn shòʼtí, e fò, m máʼ e və̀y, e lòo sìn, a fəə́ ne wan nàʼ və̀n.»

²⁵Mo Mooser yenen ji Aaron màʼtì a ne wíri, á wáa yiì mo á koŋè, e shòór vitú aàŋgaà vév vibàné si,

²⁶wù nèn tìím e shùu kày, e dzəə ye yì nəə e kilaʼáy, e sàʼ jii, «Wìr wo wù ghvə́m a dzə̀ NYÙY TÀR, wù kfə́n fen.» Á bèy, wír veé ram Levi adzə̀me nèn bàʼtí e wun ghaŋ.

²⁷Mooser suúy aáwune jii, NYÙY TÀR woo Nyùy wìr veé Isray suuy a jii, wìr dzə̀m li á nyùy rə rə̀r e wun kiyeŋ, e ghànén a e nsàn se vibàn, e kèʼ fo shùu kày wúmóʼó, e dù e wúmóʼó, e yùyrí a afə́r və́ wùn à ŋkar sə́ sí, aàŋgàa shùu lav vəə́.

²⁸Wír veé ram Levìi ku nèn yùnín Mooser, e yùyrí wíri é kishiíy fóo fèy moo ansə̀kì ataár bèy.

²⁹Mooser suúy aáwune jii, «Vèn shòʼ ne vitú vén lán ji wír vee jeéy ji atàá cù ve á wíy a lìm fo NYÙY TÀR. Mo wìr mòʼón mòʼón fo vèn yuyrin ne wán və, e yùyrí fə́r və, bo NYÙY TÀR bùʼ ne ven lán e mbùʼmé və.»

³⁰Mooser bvəə́shí, e sùúy e wíri jii, «Vèn jày jay wo tavín féyì. Yii bèy, m kfə̀n‑éè kóʼ é gwan, e dù, e yèn NYÙY TÀR ji m sà‑áà lóo lon, é wù laysin ajay vén á.»

³¹Mooser nèn kfə̀n kòʼ é gwan, e tìím e NYÙY TǍR si, a lon wun, a suúy jii, «Éè NYÙY TÀR, wír vìne jày jay wo tavín féyì. Áwune fèr shibvə̀m e kisha ke mbàm ke baar kí, a ghvəm ji Nyùy.

³²Ku làysìn jay wov. Aà dzə̀ làa yòʼ làysìn, à fə̀ə́r yír yém fo wò ŋwàʼ wo à saŋen yír sé wìr vé sho.»

³³NYÙY TÀR bìnèr e Mooser jii, «M yíi fəə́r yír sí fó ŋwàʼ, a dzə̀ sé wìr ve á jayin kinyo e mò.

³⁴Ku yòʼ dù lèn, a tsəəné wíri, a dù sho e kirə̀ʼ ke mò‑oò suuyin ne e wò. Á kuumé ji nshìylav yem yíi a dù fo wò mbìy. Yii bèy, ghán sí yíi gheén, é m maʼ ŋgeʼ e wír vìné kitu, bìʼ jay wov.»

³⁵Á bèy, NYÙY TÀR nèn màʼ yàsí wo ghaʼán e wír vìne wùn, bìʼ fo vé‑eè ghiʼin Aaron, wù fèr shibvə̀m shee wan nàʼ.