Read Lamnso Fəə 33 Bible Online

Fəə 33 - Lamnso bible

Fəə 33

¹NYÙY TÀR suúy e Mooser jii, «Lò fó kirə̀ʼ fen vèn à wír ve wò‑oò yiìn, á fəə́ fó wòŋ Ejivi, a dù e wòŋ wo mò‑oò kàʼàn, e lìʼ ji m wíy fo e Abraham wùn à Aysi, à Jakov, à rám yéví.

²M yíi tsənsí nshìylav yem, é yì wáa dù fo věn mbìy, é m jum wír veé Kanan wùn à veé Amori, à veé Hiti, à veé Perisi, à veé Hivi, à veé Jebusi, e fə̀ə́r fo wòŋ Kanan.

³Vèn wáa dù rì e nsay ye vín nàʼ wùn à vilu vi tsəətìn sho tsə́ətin. Yii bèy, mómò, m yòʼ yíi a dù vèsən, bìʼ fo vèn dzə̀ wíri, aá táv kitú. A m lò, a dù vèsən, tàm é m yiì laàr ven é dzəə.»

⁴Wír veé Israyi yú sáʼka wo bi və̀n, e nèn kèʼ, a dìy, a ten fó kfə̀n a way vifá ve sùsù.

⁵A NYÙY TÀR kì sùúy ne e Mooser jii, «Suúy e wír veé Israyi jii, ‹Vèn dzə̀ antavkìtu. A kì dzə̀ ji m kì du vèsən shintàm, bo m lò laàr ven. Lèn, vèn shóʼtí vifá ve sùsù vi, é m yén ó ji m sà‑áà yée le e vèn á.› »

⁶Á bèy, e kèʼ fo ghan fen, la wír veé Israyi yòʼ kfə̀n dzə́ə a way vifá ve sùsù vi, é bo áwune wìy a lò fo Gwan Horev.

⁷Yì‑iì dzə̀ é ghan fóo fèy, wír veé Israyi‑iì lóo tam vibàn vév é kirə̀ʼ, Mooser lì kibàn kímóʼ kí, e fəə̀ fó kilaʼáy, e jàmér, e tàm jeéy. Tám bèy, wù wàa yòŋ ji kibàn ké kitar ke wùn Nyùy. Wìr‑iì lóo tàʼ ji wun mbaa NYÙY TÀR, wù nèn dù fo.

⁸Mooser‑iì lóo dù e kibàn fóo fèy, wìr dzə̀m fəə̀, e tìím e wun shùu kibàn, a kiy Mooser, e meé mo wù yíi nəə́ sho.

⁹Wù nəə, mbàʼ yeé njà kitom nèn sə̀y, a tiy e shùu kibàn, NYÙY TÀR nèn a suŋnín wùn Mooser.

¹⁰Wíri yií yén, a mbàʼ yeé njà kitom rə̀y sí tíy e shùu kibàn fey, wìr dzə̀m nèn gvə̀ʼtí, wìr wàa dìn ghvə́m e wun shùu kibàn.

¹¹Á mo NYÙY TÀR‑iì lo, wù wàa suŋnín wùn Mooser mo wìr wùn ŋkar rə yii fer kimfèr. Wùn wun súŋnin bèy, Mooser nèn kfə̀n é bàm é kilaʼáy. Yii bèy, a wánlè nsùm woo Joshua kù‑uù goʼ kfə́ é ghaa kibàn fey. Joshua və̀n‑eè dzə̀ ŋgaà sə Mooser, a dzə̀ wan Nun.

¹²Mooser kfən yiì lò, e sùúy e NYÙY TÀR jii, «M dzə̀ a m yú ke à suuyin e mò ji m tsəə́né á wír vìn, e dù sho e wòŋ fèy. Yii bèy, à yoʼ yiì, m kiíy wír wo à yíi tsənsí vèr wun, a wówò, wò‑oò yòŋ ne ji à kì á mo ji wir wò, aà koŋ a mo.

¹³A dzə̀ rú bey, é m kú a lon wò ji à ku yiì, é m kiíy kwaʼtì yé vinyò, e fíʼ kiíy wò, e kù a yiì a dzə̀ kinyo ke kí wáa gheén wò. Á kuumé sa ji yì‑iì shòʼ á wò kitúm kìn ji wír vé.»

¹⁴NYÙY TÀR bìnèr jii, «Mómò kitú kém, m yíi shem mbìy, e yiì, áà wáa ker rəsìn.»

¹⁵Mooser bínsí jii, «A kì dzə̀ ji bó à yòʼ kì yíi shem mbìy, bo kí kì ghèén ji lá à yòʼ yiì, é vèr lo fó kirə̀ʼ fen.

¹⁶Á yíi kiíy fo feé ji à koŋ mo, kfə̀n koŋ wír vé vìn, a bó à yòʼ dzəə́ du vèsən? Kifá ke kí yíi a dìn ji vèr dzə̀ jeéy fo vitúm veé kitu ke nsay vi, kí kù dzə̀ ji à yíi a dzə a vèsən.»

¹⁷NYÙY TÀR kfən sùúy e Mooser jii, «M kù yíi yiì réŋréŋ mo à kì lonen, bìʼ fo m koŋ wò, a m kì wò feyì ji wír wom.»

¹⁸Mooser nèn kfə̀n a lon NYÙY TÀR jii, «Ku yiì, é m yén vikuʼùy vé.»

¹⁹NYÙY TÀR bìnèr jii, «M yíi shaà e wò si e vikuʼùy vém ví vidzə̀m, e kfə̀n yòŋ yír yém yee Yahweh[89], áà yú mo yí dzəə̀n. M yíi rər mendzən me wìr wo m koŋ e rər, e sham wír wo m koŋ e sham.

²⁰Yii bèy, m yòʼ yíi màʼtì, áà yén sí yém, bìʼ fo bó yòʼ dzə̀ wìr yèn mo, e kfə̀n gòʼ e tin.»

²¹NYÙY TÀR nèn sùúy e Mooser jii, «Yuúrí, e yù, kirə́ʼ kímóʼ kí dzə̀ e mǒ ghaŋ fo dzə̀ à tìím é kilan.

²²À tiimè, vikuʼùy vém ví yií lóo shaà, é m wáy wò e nsàn kilan, e kìŋ wò e kiwó kém kí, e meé mo m yíi shaà.

²³M shaa, é m nèn shàʼàr kiwó kém, áà yén ndzə̀m yem. Yii bèy, a bó yòʼ dzə̀ à yèn sí yém.»