Read Lamnso Fəə 34 Bible Online

Fəə 34 - Lamnso bible

Fəə 34

¹NYÙY TÀR nèn lò, e sùúy e Mooser jii, «Sém viwaŋ ve tiy ví vibaà moo vé mbìy vi bey, é m yiì sàŋ nsər sém shó mo mò‑oo saŋen e vé mbìy vi, ve wò‑oo bvəʼəyin.

²Á dzə kibáʼtín kibvəə́shí kijàvndzə, e fíʼ koʼ, é wòsò tárnín é kitu ke Gwan Sinay.

³Lá à yòʼ kòʼ vèn wìr. Lá wìr yòʼ ràŋràŋ e wǔn gwan. Lá á yòʼ màʼtì, é bvə́y si wùn aànàʼa wáa yikír e sar gwan.»

⁴Mooser nèn sàn viwaŋ ve tiy vibaà moo vé mbìy vi bey, e bvəə̀shí kijàvndzə, e kòʼ shó e Gwan Sinay mo NYÙY TÀR‑iì yòŋèn e wun.

⁵NYÙY TÀR nèn sə̀y é mvə̀m mbàʼ, e tìím wùn wun, e yòŋ yír rə́ yee Yahweh[90].

⁶NYÙY TÀR shaà e Mooser mbìy, e yòŋ jii, «Mo woo Yahweh, mo woo Yahweh, Nyùy wo wù rə́r mendzən me wíri, shám áwune, a bó m yòʼ táv shwiiy kilòŋ. M din koŋ yém ye wiyí e wíri, kfə̀n yii kinyo ke m kàʼàn áwune shó.

⁷A m din koŋ yém e wíri, ŋgwàʼ si ansə̀kì ansə̀kì,[91] laysìn vinyo ve á buʼtì, kfə̀n laysìn shóʼór ye á shóʼor nsər sém, su njò yev. Yii bèy, a bó yòʼ dzə̀ m màʼtì ŋgaà jay, é wù boy. M fó ŋgeʼlàʼ e wóné bìʼ jay atàr vév, kfə̀n fó e wón woné, à wón wón woné.»

⁸Mooser yú jí Nyùy bèy, e kù nèn tsə̀m ndzəə́, e làʼ kitú fo nsay, e dìn ghvə́m e Nyùy.

⁹Wù wáa bùnrì jii, «Éè Tàr, aà fen yèn ji m ghèén wò, kii wò, Tàr, à kù a dù vèsən. Wír vìne tàv rú kitú feyì, ku làysìn ajay vér wùn à yii yér ye bií, e lì ver ji wír vé ŋkuuŋkùŋ.»

¹⁰NYÙY TÀR nèn sùúy e Mooser jii, «Yuúrí, e yù, m sí gwar *mensaŋ vèsən. M yíi yiì viŋgaʼnìn ve vinyò ve ví yòʼ‑oò yiì ne a dzə e kirə̀ʼ é kitu ke nsay, fə̀m é kitum kiné kí, é wír véné yén. Vèn à wír vén adzə̀me yíi yen lim ye beemén ye mo woo NYÙY TÀR yíi yiì bìʼ ven.

¹¹«Vèn lem kinyo ke m suuy e vèn lán ki. M yíi jùm wír veé Amor wùn à veé Kanane, à veé Hiti, à veé Perisi, à veé Hivi, à veé Jebusi, aá wáa leʼ ven.

¹²Vèn wáa yen fó gwàr mensaŋ vèn à wír veé kitum fo vèn dúu, fó lì aáwuné kitam, e jay dzə́ə.

¹³Vèn yíi kètì kíy sév sé cù, e bvəʼtí sə́y[92] se sí tíynin fo, e gwàtì wúr sé *Ashera wo dzəə̀n nyùy wov woo wiíy.

¹⁴Bó yòʼ dzə̀ vèn wìy a ghvəm nyùy wùmòʼ gheéy. Mo woo NYÙY TÀR dzə̀ Nyùy wo wù kíyri ven é ŋàŋ, a bó m yòʼ taʼ e yen vèn à nyùy wùmòʼ.

¹⁵«Lá vèn yòʼ gwàr mensaŋ vèn à wír veé nsay foo fène, fo áwune yií lóo taŋrí anyùy vév, lóo cù anyùy vee shooy, bí wír fo vèn, é wù du, e yì nyám ye á cuùn anyùy vév shó.

¹⁶Kímóʼ kí jii, a tàm vèn nèn lò, a tàʼ vikǐy won vén a dzə̀ fo wón véví mvəm. A kí kòóy bèy, bo á yíi lòo cù anyùy vév, é wón vén vee vilume wáa cù sa.

¹⁷«Lá vèn yòʼ fèr anyùy ji vèn wáa cù, a fə̀m dzə̀ woo tòn e kisha ki.

¹⁸«Vèn wíy a yiì *Ŋkǎʼ Kiban kee là Nyaà. Vèn wíy a yi kibán kee là nyaà vishiíy saàmbà e ŋwee woo *Abiv mo mò‑oò suuyin e vèn, bìʼ fo dzəə̀n ŋwee woo shooy wo vèn‑eè loòn fó Ejiv.

¹⁹«Wón wíri vee vilum, kìn wón nyàm, à wón nàʼa, à wón bvəy vee vilume ve dzəə̀n dzə́ə mbìyi sì vém adzə̀m.

²⁰Vèn wíy a tin wan kimbèʼbìy wo mbìy e wàn njiì. Lóo dzə, a bó á yòʼ‑óò tín, á tòy kilòŋ fó fo. Vèn wíy a tin wón vén mbìyi vee vilum adzə̀m. Lá wìr yòʼ wìy e mǒ si e wóo kisáŋ.

²¹«Vèn wáa lìm líme vishiíy ntuùfú, lóo dzə e kee saàmbà ki, vèn meèmè. Lá vèn yòʼ lìm lim e kishiíy fóo fèy, kìn dzə̀ é ghan se á shev súm, kìn é ghan se á káv vifá.

²²Vèn wíy a yiì *Ŋkàʼ woó bǎm Ŋgàm si[93] e ghan se vèn kèʼèn, a tin sáŋ yee *wit, e kfə̀n a yiì *Ŋkǎʼ Màysì Ŋkavìn a dzə̀ é ghan se á màysìn ne vifá ve kavín ví vidzə̀m.

²³Vilum vén adzə̀me wíy a wìy e mǒ kirə̀ʼ ké cù akàŋ ataár e kiya, a yiì ŋkàʼ bìʼ mo woo NYÙY TÀR, Nyùy wìr veé Isray.

²⁴M wíy jùm vitúm fo věn mentsə̀m, e dzə̀sì nsay yen, é yì kuʼ, vèn wíy lóo koʼ akàŋ ataár e kiya ji á cu NYÙY TÀR woo Nyùy won, é la wìr yòʼ a siimé nsay yen.

²⁵«Vèn lóo see nyám, lóo yiì cu e mensə́ mvə mè, lá kibán ke nyaà kí yòʼ a dzə fo. Vèn yí *Ŋkǎʼ Yáʼayshaà[94], lá vèn yòʼ biìmé ji ndzə bvəə́shí, a jàv, a nyàm ye vé‑ee seen, e yiì cu sho dzə̀ə́.

²⁶Vèn káv vifá ve mbìy vee věn nsay, vèn shàv ve juŋ vi, e wìy sho e mǒ lav, mo woo NYÙY TÀR woo Nyùy won. Lá vèn yòʼ nàá wan bvəy, e vín yè woví.»[95]

²⁷NYÙY TÀR nèn sùúy e Mooser jii, «Sáŋ jí sìn si é nsay, bìʼ fo m gwàrìn ne mensaŋ vèsən à wír veé Israyi, a dzə̀ é kitu ke ji sìn.»

²⁸Mooser dzə̀ʼə̀m wùn NYÙY TÀR fó kishiíy mkweè, à vitsə́ʼ ví mkweè, a bó wù yòʼ yí kibán, a bó wù yòʼ nó mendzə́v. Wù nèn sàŋ ntò se mensàŋ e viwàŋ ve tiy fey, a dzə̀ nsər se Nyùy see ghvə̀m.

²⁹Mooser yiì lò, e sə̀y fó Gwan Sinay, a wù kér viwaŋ ve tiy ve ntò se *mensàŋ si‑iì dzəə̀n shó e wun kiwo, vishí və́ ví wáa njàʼkìr, a bó wù yòʼ kì ji mo wun duùn, e sùŋnín wùn Nyùy bèy, ví wàa lò, a njàʼkìr.

³⁰Aaron wùn à wír veé Israyi yén Mooser, e lòo leéy, e yèn a vishí və́ ví njaʼkìrì, e nèn a fàn fó koʼtí e ghaŋ wo.

³¹Mooser jàŋ áwune, Aaron wùn à vilìmbìy ve wíri ví kfə́n é bàm, e yèn wun. Mooser nèn sùŋnín wùn áwune.

³²Fo bàm, wír veé Israyi kóʼtí sá e wun mentsə̀m, Mooser naàrì áwune nsər sidzə̀m se NYÙY TÀR kì foon e wun e kitu ke Gwan Sinay.

³³Mooser màysì, e sùŋnín aáwune, e nèn sə̀tí vishí və́ e kintìm ki.

³⁴Wù‑uù lóo nəə́ e kibàn ji wun súŋnin wùn NYÙY TÀR, wù nèn kù tsə̀ʼ kintìm fo wun vishi, e dù, e meé e ghan se wù yíi fəə. A dzə̀ ji wù fəə́, lóo yòŋ kinyo ke NYÙY TÀR suuyin ji wù yoŋ e wír veé Israyi,

³⁵áwune kù nèn yèn a vishí və́ ví njaʼkìrì, bo Mooser kfən sə̀tí e kintìm ki, e dù, e meé mo wù yíi kfən e bàm ji wun súŋnín á wùn NYÙY TÀR.