Read Lamnso Fəə 35 Bible Online

Fəə 35 - Lamnso bible

Fəə 35

¹Mooser kùm kfəə́ yeé Isray e dzə̀m, e sùúy aáwune jii, «Vèn yuúrí vinyo ve NYÙY TÀR yòŋèn ji vèn wáa yiì vi.

²Vèn kér a vishiíy ntuùfú vé a lìm lim yén. Ke kí meen ji saàmbà, bo dzə̀ á kishiíy ké bam, a dzə̀ kishiíy kee jeéy kí ke á meemè bìʼ NYÙY TÀR. A wìr yiì lim e kishiíy fóo fèy, bo á kù yúyri a ŋgaàŋ.

³Lá vèn yòʼ tòn a və́y e věn virə̀ʼ ve vèn dzə́ sho e kishiíy ké bam.»

⁴Mooser kfən sùúy e kfəə́ yeé Isray e dzə̀me jii, NYÙY TÀR yoŋ a ji

⁵wíri báʼtí, e fò á cu e NYÙY TÀR. Wìr wo wù koŋ, e fo cu e NYÙY TÀR, é wù fó *kisha ke mbàm ke baar kí wùn à ke fəvír kí, à kisha kee *brons ki,

⁶wùn à ndzə̀y yee làv wo fəvír woo fèm, à làv wo wù səə́ne moo yúv, à wo wù səə́ne moo yòm, à làv wo wù baŋ ji rèm, à ndzə̀y ye á fèrìn e wúy bvəyi,

⁷wùn à gúrí, à juv nyàm ndzə̀v, à vicí vé kibàʼrì vee *akaasia vi,

⁸wùn à meŋgvə́r me làm mè, à virə̀ʼtìn ve meŋgvə̀r wùn à vé kilay ví,

⁹à *síbaŋ yee oniks wùn à síbaŋ símóʼ sí se á yíi laʼtí e taà cù shiŋkèéy shé kikum[96], e kfə̀n laʼtí e wun kifìn keé nsaŋ[97].

¹⁰Wìr woo ŋgaà fèr e dzə̀m e věn mvəm ku wìy, a yiì lim ye NYÙY TÀR yòŋèn ji á wáa yiì e dzə̀m.

¹¹Á ku bàʼrì kibàn ké NYÙY TÀR, e fèr kikfə́vsì ke kibàn wùn à viŋgov və́ ví, à vintàràŋ vi, à mbàŋ si, à vitóm vi, à viyiy vi.

¹²Á fer sá ŋkùv mensàŋ wùn à vintoòr və́ ví, à nsər ye dzəə̀n kirə́ʼ ké kiman, à raŋ ye yí kiŋ fóo,

¹³e kfə̀n fèr kidàŋ wùn à vintoòr və́ ví, à vifá və́ ví, à kibán ke cù kee ké NYÙY TÀR kí.

¹⁴Á fer sá kitiir ke làm wùn à vifá və́ ví, à lam sə́ sí, à meŋgvə́r me làm mè,

¹⁵e kfə̀n fèr *kíy cù kilay wùn à vintoòr və́ ví, à meŋgvə́r me yoʼ mè, à kiláy ke rəʼtìn kí, à ndzə̀y se á sə́ti shúu kibàn ké Nyùy sho si,

¹⁶aá nèn fèr *kíy cù woo wó cù ye tonèné, e fèr kintaàr kfə́ e brons, e fèr vintoòr və́ wùn à kibér ke vifa və́ ví, à màkìghìn wo á wíy a sù wó wùn à wuú shó, e fèr sa kiyiy ke màkìghìn.

¹⁷Á fer sá ndzə̀y se sí kiŋ maàndzə wùn à vitóm və́ ví, à viyiy vév ví, à ndzə̀y se sí sə́ti shúu kày wo wú nəə e maàndzə kibàn ké NYÙY TÀR,

¹⁸e fèr viŋkùm ve kibàn ké Nyùy wùn à viŋkùm ve kày yeé maàndzə vi, aàkfəə̀ véví,

¹⁹e nèn fèr ndzə̀y se á yíi tsəm kijuŋ ji atàá cùu yií lóo dù ji á yii cu e mǒ kirə̀ʼ kee jeéy kí, aá maʼ. Kù dzə̀ ndzə̀y sin see jeéy se Aaron wùn à wóné yíi a màʼ, e bó a yiì cu.

²⁰Á bèy, wír veé Israyi nèn lò fo Mooser si, e dù, a baʼtí.

²¹Wìr dzə̀m wo wù‑uù kér shií, a shilív sə́ shí lum e kinyò fèn nèn lò, a wìy e vifá vi jeéy jeéy, a fo ji cu ye á wáa bàʼrì a *kibàn ké ntàsín shó, a fèr vifá veé kirə̀ʼ ké cù, e kfə̀n a fèr ndzə̀y sé atàá cù sho.

²²Á ku nèn a wìy bèy, à vilum, à vikìy. Wìr dzə̀m wo shilív sə́ shí‑iì lumè wáa wìy e vinta vi wùn aàyèreŋe, aàndzə̀ŋgwáŋé, aàshàŋe, à vifá ve sùsù ve á fèrìn e kisha ke mbàm ke baar kí, a cù NYÙY TÀR shó.

²³Wìr dzə̀m wo wù‑uù kér ndzə̀y yee làv wo fəvír woo fèm, à làv wo wù səə́ne moo yúv, à wo wù səə́ne moo yòm, à làv wo wù baŋ ji rèm, à ndzə̀y ye á fèrìn e wúy bvəyi, à ŋgaà gúrí, à ŋgaà jùv nyàm ndzə̀v ku nèn a wìy sa sho.

²⁴Wír ve yì‑iì dzə̀ á wàa ker kisha ke mbàm ke fəvír kí wùn à kisha kee brons ki wáa wìy sa, a fo cu sho e NYÙY TÀR. Wír ve vé‑eè kér kicí kee *akaasiàa wáa wìy sa sho ji á wáa yiì a lim símóʼ sí shó.

²⁵Vikìy adzə̀m ve vé‑eè kiìn móo tsəm vifáa kú a wìy e vifá ve áwune tsəmen e làv wo wù səə́ne moo yúv wùn à wo wù səə́ne moo yòm, à wo wù baŋ ji rèm, e kfə̀n a wìy e ndzə̀y se á baan e làv wo fəvír woo fèm.

²⁶Vikìy adzə̀m ve melív mev mè‑eè lumè, aá kfə̀n kì móo te làv e wúy bvəyi ku nèn a te.

²⁷Vilìmbìy vi wáa wìy kév e *síbaŋ se á yoŋ ji oniks wùn à símóʼ sí sá ji á láʼtí e taà cù shiŋkèéy shé kikum, e kfə̀n làʼtí e wun kifìn keé nsaŋ.

²⁸Á wáa wìy sa e virə̀ʼtìn vi wùn à meŋgvə́r me làm mè, à virə̀ʼtìn ve meŋgvə̀r me yoʼ mè, à kiláy ke rəʼtìn kí.

²⁹Á mo wír veé Isray adzə̀me‑eè wiy e vifá ve kibàʼrì ve NYÙY TÀR‑iì suuyin ji Mooser sə́ fo áwune ví. Aá wiy bèy, cu NYÙY TÀR shó e kishéʼrì ki, kù mo shilív shé wìr shi‑iì lumè.

³⁰Mooser nèn sùúy e wír veé Israyi jii, «Vèn leéy, e yèn mo NYÙY TÀR shoʼon ne Besalel woo wír woo rám Juda, wo tàr wov dzəə̀n Uri woo wan Hur.

³¹Wù bùʼ ne wun e Kiyoy ke wun woo Nyùy[98] ki, e fò wun kiwó ke fèr, wù wáa ker vifií vée lìm kfəə́ se lìm sidzə̀m.

³²A dzə̀ wù rə̀tì, e fèr vifá, ví wàa dzə jeéy, a fèr vifá ve á fer e kisha ke mbàm ke baar kí kidzə̀m, kìn dzə̀ ve á fer e kisha ke mbàm ke fəvír kí, kìn e kisha kee brons ki,

³³a sem tíy see síbaŋ, a fèr vifá ve sùsù sho, e kfə̀n a sem vicí, e bóo kfə̀n a yiì lim símóʼ sí sidzə̀m se wìr fèr yii limè.

³⁴NYÙY TÀR kfə̀n fò ne sa wun vifií vée yeʼéy wír ámóʼó lim see shooy, e kfə̀n fò sá vifií vee shooy e Oholiav woo wír woó ram Dan, a tàr wov dzə̀ Ahisamak.

³⁵NYÙY TÀR fò ne áwune vifií vé kfəə se lìm sidzə̀m se yii lim wír ve á sém vifá ve semén ví wùn à ve á sáŋ nsáŋtií, à ve á náŋsin, tsə́m ndzə̀y e làv wo wù səə́ne moo yúv wùn à wo wù səə́ne moo yòm, à wo wù baŋ ji rèm. Á kfə̀n kì sá móo ba ndzə̀y, bo taaka ndzə̀y yee làv wo fəvír woo fèm. Áwune dzə̀ ben, aá kì fer feyì. Á dzə̀ kibáʼtín fó yiì lim e dzə̀m.