Read Lamnso Fəə 36 Bible Online

Fəə 36 - Lamnso bible

Fəə 36

¹«Besalel wùn Oholiav kù yíi a fèr vifá vidzə̀m réŋréŋ mo NYÙY TÀR‑iì suuyin. Aá kù yíi a lìm wùn aàŋgàa fèr ámóʼó adzə̀m ve NYÙY TÀR‑iì foon áwune sá vifií vé lìm, aá fíʼ kiíy móo fèr vifá ve kibàn ké NYÙY TÀR vidzə̀m.»

²Mooser súŋnín bey, e nèn jàŋ Besalel wùn Oholiav, à wìr dzə̀m wo NYÙY TÀR‑iì foon wun vifií vé lìm, shilív shé ŋgaàŋ shi kfə́n a lùm sa, e sùúy aáwune ji á tsəə́m á lim.

³Mooser fó áwune vifá vidzə̀m ve wír veé Israyi kì wìyìn shó ji á baʼri á kibàn ké NYÙY TÀR shó. Wíri ku nèn kfə̀n a wìy aàfómo vév ámóʼó kijàvndzə kidzə̀m.

⁴Kí gháʼ, vé lìme tiír lim. Wìr fèr e dzə̀m màʼtì kifá ke a kù‑uù dzə̀ yiì wun bìʼ kibàn ké NYÙY TÀR,

⁵e dù, e yèn Mooser, e sùúy sho jii, wíri sí wiy e vifá vi, a ví kuʼ, shaasìn ve dzə̀ á wàa yiì lim ye NYÙY TÀR‑iì yòŋèn ji á wáa yiì.

⁶Mooser nèn fò sáʼ ji lá lùmèn kìn wiíy yòʼ dzəə fò á fómo ji wo kibàʼrì ke kibàn ké NYÙY TÀR. Sáʼ rə̀ne ghánén kibeey kidzə̀m. Á bèy, wíri nèn yàr, e làa yòʼ dzə́ə a wìy aàfómoó.

⁷A vifá ve vé‑eè foon ne vi‑iì kùʼnìn ne, e shaà ve yì‑iì dzə̀ á yiì lim rə̀n sho.

⁸Vé fèr ámóʼó nèn a fèr ndzə̀y seé wǔn kibàn ké NYÙY TÀR, a kù‑uù fer wír ve vé‑eè kiìn ne lim, e shaàsìn. Ndzə̀y sin si‑iì dzə̀ vintsə̀m e ghvə̀m, a dzə̀ ndzə̀y ye á baan e làv wo fəvír woo fèm, e tàtí wùn à wo wù səə́ne moo yúv, à wo wù səə́ne moo yòm, à wo wù baŋ ji rèm, aá tsə́m nshwìnin *kifa keé yuv ke kí kér vav si shó.

⁹Vintsə̀m vé ndzə̀y vidzə̀m vi‑iì kér mfìʼ e mòʼón, kóy saàmbà fo vidà, a mbvə̀ʼ dzə̀ kóy e fur.

¹⁰Áwune nèn tsəə̀mé vee vitàn e kilàŋsìn, ví kfə́n kiŋkàŋ kimòʼón, e yiì sa e vee vitàn vi réŋréŋ bey.

¹¹Á nèn wàyrí dzə́ŋ si é shuù se ndzə̀y see fó ghaŋ, e yiì bèy viŋkàŋ vee vibaà vidzə̀m, aá fér dzə́ŋ sìn e ndzə̀y se sí səə́ne moo yúv sí.

¹²Fo kiŋkàŋ ké ndzə̀y ké mbìy ki, vé‑eè wàyrí dzə́ŋ si mtàn, e wàyrí e kímóʼ kí sá bèy, dzə́ŋ sìy si wáa kìʼnìn.

¹³Á nèn nàŋsín viŋgov mtàn e *kisha ke mbàm ke baar kí, e wòvsín ndzə̀y sin sho, sí nèn kfə̀n simòʼón se dzə̀ sí lìm kibàn kifur.

¹⁴Á kfə̀n‑eè fèr vintsə̀m vé ndzə̀y vímóʼ ví nshòv mòʼón e ghvə̀m a dzə̀ e wúy bvəyi ji sí yíi a neŋ e kitu ke ndzə̀y seé wǔn kibàn.

¹⁵Vintsə̀m vee nshòv mòʼón e ghvə̀m vìn vi‑iì dzə̀ réŋréŋ vidzə̀m, kóy saàmbà e kimbéʼ ki fó vidà, kóy e fur fo mbvə̀ʼ.

¹⁶Vé‑eè tsəə̀mé vee vitàn kiŋkàŋ kimòʼón, e tsəə̀mé vee ntuùfú kiŋkàŋ kfə́ jeéy,

¹⁷e wàyrí dzə́ŋ si mtàn e kiŋkàŋ ke ndzə̀y ké mbìy ki, a dzə̀ é mbìv yee mòʼón, e wàyrí e kímóʼ kí sá bèy, ji á tátí á ké mbìy ki shó.

¹⁸Á nèn fèr viŋgov mtàn e kisha kee *brons ki, e wòvsín dzə́ŋ si shó, e tàtí viŋkàŋ vé ndzə̀y vee vibaà ji ví fer kibàn kifur.

¹⁹Vé‑eè fèr sá vikfə́vsì vímóʼ ví vibaà ve ví yíi a sətí kibàn fó yuv, aá fér kímóʼ kí e gúrí, e fèr kímóʼ kí e jùv nyàm ndzə̀v.

²⁰Á kfən fèr vintàràŋ ve tiirín ví e kicí kee *akaasia ki,

²¹a ví‑iì dzə̀ kóy e baà e kimbéʼ ki fó vidà, mbvə̀ʼ wáa dzə ntàm se kiwo sitaár.

²²Vé‑eè bèéy shóy sé kintàràŋ see sibaà fo vé‑eè yíi a tatí e viyìy, e bèéy bèy, vintàràŋ ve kibàn vidzə̀m.

²³Fo mbìv kibàn ye yì leey tsə́n, vé‑eè fèr vintàràŋ mbaà,

²⁴e fèr viyiy mkweè e kisha ke mbàm ke fəvír kí, a dzə̀ ve á yíi a wayrí e sar se vintàràŋ vee mbaà. Kintàràŋ ki‑iì kér viyiy vibaà mo virə́ʼ ve beeyín ví dzəə̀n.

²⁵Fo mbìv kibàn ye yì leey fó kùy, vé‑eè fèr sá vintàràŋ mbaà,

²⁶e kfə̀n fèr viyiy vee kisha ke mbàm ke fəvír kí mkweè, viyiy vi wáa dzə e sar kintàràŋ vibaà vibaà, vintàràŋ vidzə̀m.

²⁷Fo kirəv ké bàm kí, e mbìv yee fo shùy yii nəə, á nèn fèr vintàràŋ vee fó ntuùfú,

²⁸e kfə̀n fèr sa vintàràŋ vímóʼ ví vibaà, a dzə̀ veé buu se kibàn see fó bàm.

²⁹Vé‑eè fèr vin, ví táʼám fó sar, e tàtí fo yuv fo kfə́vi‑iì dzəə̀n, kù bey, buú see sibaà sidzə̀m.

³⁰Vintàràŋ veé kirəv ké bàm kí, ví nén a dzə waamé. Viyiy vee fó vi wáa dzə nshòv ntuùfú e ghvə̀m, aá fér e kisha ke mbàm ke fəvír kí, a ví dzə̀ vibaà vibaà, e sar kintàràŋ.

³¹Vé‑eè fèr sá mbàŋ se sí ghár vintàràŋ ve kibàn e kicí kee akaasia ki, sí wáa dzə nshòv sitàn e ghvə̀m, sitàn fo vintàràŋ veé kirəv keé mbìv yee tsə́n,

³²sitàn fo keé mbìv yee kuy, sitàn sa fo ké bàm kí, e mbìv yee fo shùy yii nəə.

³³Mbàŋ ye yì‑iì timnìn kirə́v dzə̀ kfə́, a yì kéʼ fó mbìy, e dù, e màysì fo bàm e fur.

³⁴Mo á fèrìn vifá vìn, e nèn lì kisha ke mbàm ke baar kí, e làʼtí e wǔn vintàràŋ, e kfə̀n làʼtí e wǔn mbàŋ si, kí sə́tí, e nèn fèr akfə́v ve á yíi a ghar mbàŋ si, aá ku fèr sa e kisha ke mbàm ke baar kí.

³⁵Á nèn fèr raŋ e ndzə̀y ye á baan e làv wo fəvír woo fèm, e tàtí wùn à wo wù səə́ne moo yúv, à wo wù səə́ne moo yòm, à wo wù baŋ ji rèm. Á kfə̀n‑eè tsə̀m nshwìnin kifa keé yuv ke kí kér vav si[99] shó.

³⁶Raŋ rə̀ne‑eè kér e vitom vímóʼ ví vikweè ve á fèrìn e kicí kee akaasia ki, e làʼtí kisha ke mbàm ke baar kí é wùn wó, kí sə́tí. Viŋgov və́ ví wáa dzə sa kisha ke mbàm ke baar kí, a viyiy ve vitóm vee vikweè vi tíy sho vi dzə̀ vee kisha ke mbàm ke fəvír kí.

³⁷Á nèn kfə̀n fèr ndzə̀y se á sə́ti shúu kibàn shó, aá fér sá e ndzə̀y ye á baan e làv wo fəvír woo fèm, e tàtí wùn à wo wù səə́ne moo yúv, à wo wù səə́ne moo yòm, à wo wù baŋ ji rèm, aá kfən nàŋsín e tsə̀m.

³⁸Á nèn fèr vitóm ve nshìy rə̀n vitàn e kicí kee akaasia ki, e làʼtí kisha ke mbàm ke baar kí é wùn wó, kí sə́tí. Á kfən fèr viŋgov e kisha ke mbàm ke baar kí, e fèr viyiy və́ vitàn e kisha kee brons ki.