Read Lamnso Fəə 37 Bible Online

Fəə 37 - Lamnso bible

Fəə 37

¹Besalel nèn fèr ŋkùv mensàŋ e kicí kee *akaasia ki, vida vi wáa dzə ntàm se kiwo sitàn, mbvə̀ʼ wáa dzə ntàm se kiwo sitaár, vida ve koʼón ví wáa dzə sa ntàm se kiwo sitaár.

²Mo wù fèrìn, e nèn lì *kisha ke mbàm ke baar kí, e làʼtí e wùn wó fo ndzə wùn à fó mvəm, kí sə́tí, e kfə̀n giìmè gháŋ si e kisha ke mbàm ke baar kí, e kaàrí, e tàr.

³Wù nèn fèr dzə́ŋ sikweè e kisha ke mbàm ke baar kí, sí wáa dzə e kiŋkar, e tùúy e kor se ŋkùv see sikweè, sibaà fó mbìv fen, sibaà fó mbìv fésə.

⁴Wù kfən fèr sa vintoòr e kicí kee akaasia ki, e làʼtí kisha ke mbàm ke baar kí é wùn wó, kí sə́tí,

⁵e nèn lì, e tsə̀nsí e dzəŋ seé virəv vé ŋkùv vee vibaà, ji á wáa toór sho.

⁶Wù nèn fèr nsər ŋkùv e kisha ke mbàm ke baar kí, kíwun kíwun, vida vi wáa dzə ntàm se kiwo sitàn, mbvə̀ʼ wáa dzə ntàm se kiwo sitaár,

⁷e kfə̀n dzə̀vtì kisha ke mbàm ke baar kímóʼ kí, e fèr vifá veé yuv vímóʼ ví shó vibaà, a ví kér vav si, ví wáa tiynín e kitu ke nsər ŋkùv fo mbvə̀ʼ si.

⁸A wù fér vifá vìn, ví wáa dzə kilàŋsìn wùn à nsər ŋkùv, kímóʼ kí é mbìv yìmòʼ, kímóʼ kí e yìmòʼ,

⁹ví wáa kìʼnìn, a kiy nsər ŋkùv, aá nán vav sév, e sàŋrì, sí wáa kfəvsí kirə́ʼ ké kiman kìn.

¹⁰Wù‑uù fèr sá kidàŋ e kicí kee *akaasia ki, vida vi wáa dzə ntàm se kiwo sikweè, mbvə̀ʼ wáa dzə ntàm se kiwo sibaà, vida ve koʼón ví wáa dzə ntàm se kiwo sitaár,

¹¹e nèn làʼtí kisha ke mbàm ke baar kee wúntí kíwun e wùn wó, kí sə́tí, e kfə̀n jùŋ shuu e kisha ke mbàm ke baar kí, e kaàrí, e tàr.

¹²Wù nèn kfə̀n fèr kikiŋ, kí kaárí kiyiy ke kidàŋ, e tàr, vikuʼùy ví wáa dzə̀ mbvə̀ʼ kiwo, e nèn kfə̀n lì kisha ke mbàm ke baar kí, e bàrír sho, e kaàrí, e tàr.

¹³Wù nèn fèr dzə́ŋ e kweè, a kù dzə̀ e kisha ke mbàm ke baar kí, e tùúy e kor see sikweè fo shwín sí‑iì dzə̀kìn.

¹⁴A wù tuúy a dzə̀ fó mbìv kùy e sar kiyìy mo dzə̀ sí ghàr vintoòr ve á toor kidàŋ sho.

¹⁵Vintoòr vìn vi‑iì dzə̀, aá fér e kicí kee akaasia ki, e làʼtí kisha ke mbàm ke baar kí é wùn wó, kí sə́tí.

¹⁶Wù nèn fèr vifá veé kidàŋ e kisha ke mbàm ke baar kí, kíwun kíwun, a ví dzə̀ jii, vikáŋ, aláŋ, vighín wùn aànsiŋ ve vé‑eè yíi a way meluʼ me cù shoo.

¹⁷Wù nèn fèr sa kifá ke á yíi a tiír lam si shó, kiyiy wùn à wún e dzə̀me wáa dzə kisha ke mbàm ke baar kí, kíwun kíwun, aá dzə́vtí dzə́vtin. Wù‑uù fèr, e nàŋsín vimboo wùn à vibuushì vé kifa vi, ví wáa dzə e wùn wó e kilàŋsìn, e virə̌ʼ virə̀ʼ.

¹⁸Kitiir kìn ki‑iì kér tám ntuùfú, e taár fo mbìv yee mòʼón, e taár fo yìmòʼ yee mbìv,

¹⁹a tám e mòʼón mòʼón fo woo ntuùfuú kér vibuushì vitaár, a ví dzə̀ moo kibuushì ké *almon mo kí fəən fó kirə̀ʼ ke boón kí, e nshwìnin wàn kighìn.

²⁰Kiwóŋrín kfə́ kí wáa dzə, a vibuushì vé almon vìy vi dzə̀ shó vikweè wùn à kirə́ʼ ke boón kí fó sar.

²¹Kirə́ʼ kidzə̀m fo tám see ntuùfú sí jàvìn fó kiwoŋrín, kimboo ki‑iì dzə̀ fó.

²²Kiwóŋrín wùn à tám si, à kifá ke boón kí‑iì dzə̀, aá dzə́vtí a dzə̀ kisha ke mbàm ke baar kí, kíwun kíwun, kitiir ke làm kìn kidzə̀m ki wáa dzə kilàŋsìn.

²³Vimfar ve á náŋsin akfəə̀ shó, á kù‑uù fèr sá e kisha ke mbàm ke baar kí, kíwun kíwun, e fèr wón vikaŋ və́ vee saàmbà réŋréŋ bey.

²⁴A kisha ke mbàm ke baar ke vé‑eè fèrìn kitiir ke làm kìn sho ki‑iì dzə̀ akilu nshòv sitàn e mtaár.

²⁵Wù nèn fèr sa kíy cù wo á yíi a tòn kiláy shó, a wù fér a dzə̀ e kicí kee *akaasia ki. Wú‑uù dzə̀ réŋréŋ mbìv sidzə̀m, à fó vidà ve wavín ví, à fó mbvə̀ʼ, a dzə̀ ji ntàm se kiwo sibaà sibaà, a vida ve koʼón ví dzə̀ ntàm se kiwo sikweè. Wù lòo fèr, e fə̀ə́r kór see sikweè, sí wáa jaʼtín e kitu ke kiy cù moo loŋ se nàʼ bèy.

²⁶Wù nèn lì kisha ke mbàm ke baar kee wúntí kíwun, e làʼtí e wùn wó, kí sə́tí kíy e dzə̀m, a dzə̀ jii, kiyiy, gháŋ si wùn à loŋ si. Wù nèn kfə̀n giìmè e kíwun kee kisha ki, e kaàrí, e tàr.

²⁷Wù nèn fèr andzə̀ŋgwáŋ abaà e kisha ke mbàm ke baar kí, e tùúy e wǔn kiy, a dzə̀ é sar kikìŋ kee fó yuv, e yiì bèy, mbìv sidzə̀m. Dzə̀ fo á yíi a wayrí vintoòr, a toór sho.

²⁸Vé‑eè sèm vintoòr vìn e kicí kee akaasia ki, e làʼtí kisha ke mbàm ke baar kí é wùn wó, kí sə́tí.

²⁹Wù kfən fèr meŋgvə́r me yoʼ mee jeéy ji me Nyùy, e fèr sa kiláy ke rəʼtìn kí, kee wúntí kíwun, a vifá vìn vi rəʼtìn moo vé ŋgaà wo wù fer biʼ se rəʼtìn sí bey.