Read Lamnso Fəə 38 Bible Online

Fəə 38 - Lamnso bible

Fəə 38

¹Besalel nèn kfə̀n fèr sa kíy cù wo dzəə̀n wó cù ye tonèné, a wù fér a dzə̀ e kicí kee *akaasia ki. Wú‑uù dzə̀ kóy e ntàm se kiwo si sibaà réŋréŋ virə́v vikweè, vida ve koʼón ví wáa dzə ntàm se kiwo ntuùfú.

²Wù lòo fèr, e fə̀tí kór sə́ see sikweè, sí wáa jaʼtín e kitu wo moo loŋ se nàʼ bèy, e nèn tàtí kidzə̀m, e làʼtí kisha kee *brons e wùn wó, kí sə́tí.

³Wù kfən fèr kifá kidzə̀m keé ghaa kiy cù e kisha kee brons ki. Vifá moo vikáŋ wùn à viŋkwaà vi, à vighín ví, à vimbav ve nyàm vi, à vikáŋ ve á fəər káy se və̀y shó vi.

⁴Wù‑uù bà kintaàr kfə́ sá e kisha kee brons ki, e sìysì e sar kintìm, kí tímnín kíy cù e ntìntìn fo mvəm,

⁵e kfə̀n fèr dzə́ŋ si e kisha kee brons ki, e wàyrí e kor woo kweè e ŋkìʼnìn kintaàr ji á yíi a way vintoòr sho.

⁶Wù nèn fèr vintoòr vìy e kicí kee akaasia ki, e làʼtí kisha kee brons e wùn wó, kí sə́tí.

⁷Wù nèn wàyrí e dzəŋ se sí dzəə̀n é kòr se kìy cù e mbìv see sibaà ji á wáa toór sho. A kíy cùu dzə̀ virə́v virə́v, a wú dzə̀ kintosòŋ.

⁸Wù nèn fèr sa màkìghìn wo á wáa sù virə́ʼ shó, wù wáa dzə kisha kee brons, kíwun kíwun, à kiyiy kfə́ kí shó. Kisha kìn ki‑iì lò a dzə̀ fó vileèy vee kisha kee brons ki, ve vikìy ve vé‑eè lim e shùu kibàn ké NYÙY TÀRí‑iì shavin, e fò ji yév yee cu.

⁹Besalel nèn kfə̀n fèr kay e ndzə̀y se keerìn sí, yí gìm maàndzə wùn à kibàn ké NYÙY TÀR kí, a wù fér ndzə̀y se keerìn siy a dzə̀ e ndzə̀y yee làv wo fəvír woo fèm, a vida ve ndzə̀y seé mbìv yee tsə́n ví dzə̀ kóy nshòv sitàn e mbaà.

¹⁰A kayi kér vitóm mbaà wùn à viyiy vi, aá fér e kisha kee brons ki, viŋgov wùn à mbàŋ si wáa dzə ve á fèrìn e *kisha ke mbàm ke fəvír kí.

¹¹Vida ve ndzə̀y seé mbìv yee kuy vi wáa dzə sa kóy nshòv sitàn e mbaà. Vitóm wùn à viyiy vév ví‑iì dzə̀ mbaà mbaà, aá fér a dzə̀ e kisha kee brons ki, a viŋgov veé vitom wùn à mbàŋ si dzə̀, aá fér e kisha ke mbàm ke fəvír kí.

¹²Fo mbìv yee fo shùy yii nəə, ndzə̀y se keerìn sí‑iì dzə̀ kóy nshòv sibaà e ghvə̀m e kimbéʼ ki, vitóm vi wáa dzə e ghvə̀m wùn à viyiy vév ví.

¹³Fo mbìy kibàn, e mbìv yee fo shùy yii tó, mbvə̀ʼ kày wáa dzə sa kóy nshòv sibaà e ghvə̀m e kimbéʼ ki.

¹⁴Shúu kàyi‑iì dzə̀ é mbìv fóo fèy, a ndzə̀y sé kày si dzə̀ kóy e baà e ntàm se kiwo si ntuùfú mbìv sidzə̀m, vitóm vi wáa dzə vitaár vitaár mbìv sidzə̀m wùn à viyiy vév ví.

¹⁶Á kù‑uù fèr ndzə̀y se sí‑iì kaarin maàndzə e tàr sidzə̀m a dzə̀ e ndzə̀y yee làv wo fəvír woo fèm.

¹⁷Viyiy ve vitom ve kày vidzə̀m vi‑iì dzə̀, aá fér e kisha kee brons ki, a viŋgov veé vitom wùn à mbàŋ sév sí‑iì dzə̀ vee kisha ke mbàm ke fəvír kí, aá kfən nàŋsín vitú ve vitom sa e kisha ke mbàm ke fəvír kí. Vé‑eè tàŋsìn vitóm ve kày vidzə̀m e mbàŋ se á fèrìn e kisha ke mbàm ke fəvír kí, e kaàrí maàndzə, e tàr.

¹⁸Fo shùu kày, ndzə̀y se sí sə́ti fó si‑iì dzə̀ kóy e tàn fo medà, aá fér e ndzə̀y ye á baan e làv wo fəvír woo fèm, e tàtí wùn à wo wù səə́ne moo yúv, à wo wù səə́ne moo yòm, à wo wù baŋ ji rèm, e kfə̀n nàŋsín, e tsə̀m.

¹⁹Vitóm vee fó vi‑iì dzə̀ vikweè wùn à viyiy vév ví, aá fér viyiy e kisha kee brons ki, bo viŋgov veé vitom vi wáa dzə kisha ke mbàm ke fəvír kí, aá kfən nàŋsín vitú ve vitom sa e kisha ke mbàm ke fəvír kí.

²⁰Viŋkùm ve kibàn wùn à vé kày vi‑iì dzə̀, aá tón vidzə̀m a dzə̀ e kisha kee brons ki.

²¹Vifá ve kibàʼrì vi vìne, a dzə̀ vé kibàn ké NYÙY TÀR ke kí‑iì kér viwaŋ ve tiy ve ntò se *mensàŋ si‑iì dzəə̀n shó. Yì‑iì tàŋ wír veé ram Levi vifá vìn mo Mooser‑iì suuyin, a kilìmbìy kév kí‑iì dzə̀ Itamar woo wan Aaron woo taà cù.

²²Ŋgaà wo wù‑uù fèrìn kifá kidzə̀m ke NYÙY TÀR‑iì yòŋèn e Mooser nèn a dzə Besalel woo wír woó ram Juda, wo tàr wov dzəə̀n Uri woo wan Hur.

²³A wìr wo wù lim wùn wun‑eè dzə̀ Oholiav woo wír woó ram Dan, a tàr wov dzə̀ Ahisamak. Oholiav‑iì dzə̀ wir fèr, a wù kì móo saŋ nsáŋtí, e kfə̀n kìíy móo ba ndzə̀y e làv wo fəvír woo fèm, e tatí wùn à wo wù səə́ne moo yúv, à wo wù səə́ne moo yòm, à wo wù baŋ ji rèm.

²⁴Vidzəəsì vé kishà ke mbàm ke baar kí ke vé‑eè foon ji ké kibàʼrì ke kibàn ké NYÙY TÀR ví‑iì dzə̀ akilu nsə̀kì, aá ku fìʼ e shùu mfìʼ ye dzəə̀n yeé lav cù.

²⁵Vidzəəsì vé kishà ke mbàm ke fəvír kí ke wír ve vé‑eè taŋen áwuneé‑eè foon ví‑iì dzə̀ akilu kishóv mtaár e ghiì kweè aànsə̀kìi ataár (3,430), aá ku fìʼ e mfìʼ ye dzəə̀n yeé lav cù.

²⁶Yì‑iì fò vilum vee kèʼ fó kiya mbaà, a dù duùn fó mbìy, a vé‑eè dzə̀ wír kishóv mtàn e ghiì tàn aànsə̀kìi nshòv sitaár e ghiì ntuùfú (603,550). Wìr mòʼón mòʼón‑eè fó kintoʼnìn ke *shekel réŋréŋ mo mfìʼ shekel wo dzəə̀n woó lav cù yii dzə́.

²⁷Vé‑eè fèr viyiy ve kibàn ké NYÙY TÀR wùn à veé sar se vitom ve raŋe‑eè kér sho e kisha ke mbàm ke fəvír kiy ki, akilu kishóv ghií kweè aànsə̀kìi ataár (3,400), a kiyiy kimòʼón ki dzə̀ akilu nshòv sikweè e mtaár (34).

²⁸Ke kí‑iì berin kí nèn a dzə̀ akilu mtaár. Besalel lí kee shooy, e fèr viŋgov veé vitom sho, à mbàŋ se vitom si, e kfə̀n nàŋsín vitú ve vitom sho.

²⁹Kisha kee brons ke vé‑eè foon kí‑iì dzə̀ akilu nshòv sitàn e mbaà e ghiì kweè aànsə̀kìi abaà. (2,425).

³⁰Á lí, e fèr viyiy veé shuù wo wú nəə e kibàn ké cù, e kfə̀n fèr sa *kíy cù woo kisha kee brons ki shó, à kintaàr kfə́ kí, à vifá veé ghaa kiy cù fèn vi vidzə̀m.

³¹Á kfən fèr viyiy ve kày yeé maàndzə wùn à veé shùu kày vi shó, à viŋkùm ve kibàn ké Nyùy vi, à vé kày ye yí giìmèn maàndzə kibàné.