Read Lamnso Fəə 39 Bible Online

Fəə 39 - Lamnso bible

Fəə 39

¹Fo làv wo vé‑eè wìyìn shó və̀y, vé‑eè lì wo wù səə́ne moo yúv, à wo wù səə́ne moo yòm, à wo wù baŋ ji rèm, e fèr ndzə̀y se juujùŋ si shó ji see jeéy se dzə̀ Aaron lòo yiì lim rə́ e Nyùy kirə̀ʼ, wù wàa màʼ. A vé‑eè fèr réŋréŋ mo NYÙY TÀR‑iì suuyin e Mooser ji á wàá fer.

²Vé‑eè fèr shiŋkèéy shé kikum e ndzə̀y ye á baan e làv wo fəvír woo fèm, e tsə̀m e làv woo kisha ke mbàm ke baar kí wùn à wo wù səə́ne moo yúv, à wo wù səə́ne moo yòm, à wo wù baŋ ji rèm.

³Vé‑eè dzə̀vtì *kisha ke mbàm ke baar kí dzə́vtin, kí vèmèn, é bo á sanri làv fo fo, wo vé‑eè tatin wùn à wo wù səə́ne moo yúv, à wo wù səə́ne moo yòm, à wo wù baŋ ji rèm, e nèn bònen tsə̀m é ndzə̀y ye vé‑eè baan e làv wo fəvír woo fèm.

⁴Shiŋkèéy shé kikum shin shi‑iì kér vimbar vibaà é mbèʼ si, ve ví táti ŋkuv yee fó bàm wùn à yee fó mbìy.

⁵Kinsiŋ ke kí ghár shiŋkèéy shé kikum kin ki‑iì dzə̀, aá fér e víwun vee vifá ve á fèrìn kikúm shó vi, kiwó ke lìm ki wáa dzə sa kíwun, aá fér réŋréŋ mo NYÙY TÀR‑iì yòŋèn e Mooser.

⁶Á nèn lì *síbaŋ yee oniks e baà, e nàŋsín, e sàŋ yír sé wón Isray vee nshòv sibaà e ghvə̀m sho mo wìr fèr yii sáŋ nsáŋtí, e nèn fiì síbaŋ rəy e kisha ke mbàm ke baar kí,

⁷e làʼtí e vimbar veé mbèʼ se shiŋkèéy shé kikum ji ŋkùvtu wón Isray, réŋréŋ mo NYÙY TÀR‑iì suuyin e Mooser ji á ku yiì.

⁸Á kfən fèr sa kifin keé nsaŋ, e nàŋsín, e tsə̀m e víwun vee vifá ve á kì lìmèn shiŋkèéy shé kikum shó vi.

⁹Vé‑eè fèr, e bvə̀nén vibar vibaà, mfìʼ se vibàr si wáa dzə réŋréŋ ntàm kiwo e mòʼón mòʼón, mbìv sidzə̀m.

¹⁰Á nèn tùúy *síbaŋ shó ŋgoo sikweè, a ŋgoo mbìy dzə̀ rubi wùn à topar, à garnet.

¹¹Ye yì batin wáa dzə emeral wùn à safiri, à daymon,

¹²e ŋgoo yee taár nèn à dzə̀ jasin wùn à aget, à amatist,

¹³bo ye yì meen ji kweè wáa dzə beril wùn à oniks, à jespa, aá tuúy síbaŋ sin sidzə̀m, e fiì e kisha ke mbàm ke baar kí.

¹⁴Síbaŋ e dzə̀me‑eè dzə̀ nshòv sibaà e ghvə̀m, aá náŋsín, e sàŋ yír sí shó, a dzə̀ sé wón Isray ji ŋkùvtu rǎm Isray yee nshòv sibaà e ghvə̀m.

¹⁵Á nèn kfə̀n fèr shàŋ kifìn keé nsaŋ e kisha ke mbàm ke baar kí, kíwun kíwun, e tòy moo kfəə̀,

¹⁶e nèn nàŋsín vinta vibaà, e kfə̀n fèr andzə̀ŋgwáŋ abaà, kifá kidzə̀m ki wáa dzə kisha ke mbàm ke baar kí, e nèn tàŋ e kifìn keé nsaŋ kìy e kor see fó yuv.

¹⁷Vé‑eè wòvsín ashàŋ vee kisha ke mbàm ke baar kí vee abaà é shuù se andzə̀ŋgwáŋ vee abaà viy,

¹⁸e lì shuu se shàŋ, e tàŋ e vinta vee vibaà ve ví dzəə̀n é vimbar veé mbèʼ se shiŋkèéy shé kikum fó mbìy.

¹⁹Á nèn kfə̀n fèr andzə̀ŋgwáŋ ámóʼó abaà e kisha ke mbàm ke baar kí, e tsəə̀mé e kor se kifìn keé nsaŋ, a dzə̀ see fó sar, á wáa dzə e ghaa shiŋkèéy shé kikum.

²⁰Á kfə̀n‑eè fèr sá ámóʼó vee andzə̀ŋgwáŋ abaà e kisha ke mbàm ke baar kí, e tsəə̀mé e shiŋkèéy shé kikum fó mbìv tsə̀n vimbar vee vibaà, a vé‑eè tsəə̀mé a dzə̀ é ghaa kinsəʼ e mbìv kùy kinsiŋ ke á bonen, e tsə̀m kiy ji á wáa kur shiŋkèéy shé kikum shó fo mbìy.

²¹Á nèn lì kfəə̀ wo wù səə́ne moo yúv, e wòvsín andzə̀ŋgwáŋ ve á dzəə̀n é kifìn keé nsaŋ wùn à ve á dzəə̀n é shiŋkèéy shé kikum. Kifin keé nsaŋ ki nèn neèm fo mbìv kùy kinsiŋ ke á bonen, e tsə̀m kiy, e làa yòʼ dzə́ə a bàyìn fo shiŋkèéy shé kikum. Vé‑eè fèr kidzə̀m réŋréŋ mo NYÙY TÀR‑iì yòŋèn e Mooser.

²²Á nèn fèr sa kikúm keé sar shiŋkèéy shé kikum, aá fér kidzə̀m e ndzə̀y ye nshòm səə́ne moo yúv.

²³Vé‑eè tòʼ shúu kilòŋ fó kintìntìn, e tsə̀m, wú táv, fo wú yiì a saàsì,

²⁴e kfə̀n fèr vitúʼtúʼ vé *grenadin e làv wo wù səə́ne moo yúv wùn à wo wù səə́ne moo yòm, à wo wù baŋ ji rèm, e tsəə̀mé e shùu kikum fó sar.

²⁵Á kfən fèr mbìír se ŋeerín sí e kisha ke mbàm ke baar kí kee wúntí kíwun, e tsəə̀mé sa e shùu kikum, a dzə̀ é nsàn se vituʼtúʼ fey.

²⁶Vé‑eè tsəə́me kitúʼtúʼ, á tsəə̀mé mbìír, e yiì bèy, e kaàrí shúu kikum, e tàr, réŋréŋ mo NYÙY TÀR‑iì yòŋèn e Mooser. Kikúm kin ki‑iì dzə̀ ke taà cù‑uù yíi a màʼ, e bó a yiì lim rə́.

²⁷Á kfən fèr vikúm ve da vi e ndzə̀y yee làv wo fəvír woo fèm ji vé Aaron wùn à vé won vəə́,

²⁸e kfə̀n fèr tán se ndzəmén sí e ndzə̀y yee shooy, e fèr sa asə̀là ve tsəmé vee fó sar, a kù dzə̀ e ndzə̀y yee shooy.

²⁹Á nèn fèr kikuúví e ndzə̀y yee làv wo fəvír woo fèm, e tsə̀m e làv wo wù səə́ne moo yúv, wùn à wo wù səə́ne moo yòm, à wo wù baŋ ji rèm, kù mo NYÙY TÀR‑iì suuyin e Mooser.

³⁰Á fèr sa kicí ké tan e kisha ke mbàm ke baar kí, kíwun kíwun, e fíʼ dìn ji ŋgaà tàn dzə̀ á wír woo jeéy. Vé‑eè nàŋsín, e sàŋ shó jii, «Á shòʼ ne jeéy ji wo NYÙY TÀR.»

³¹Á nèn lì kfəə̀ wo nshòm səə́ne moo yúv, e sə̀ə́y kicí kiy sho e tan ye ndzəméné fó mbìy, réŋréŋ mo NYÙY TÀR‑iì suuyin e Mooser.

³²Á bèy, wír veé Israyi nèn màysì lim yee bìʼ kibàn ké NYÙY TÀR e dzə̀m, aá ku yiì kifá kidzə̀m réŋréŋ mo NYÙY TÀR‑iì suuyin e Mooser.

³³Á nèn lì ndzə̀y sé kibàn wùn à vifá vee fó ghaŋ vi vidzə̀m, e wìy, e yèn Mooser sho. Ví‑iì dzə̀ jii, viŋgov wùn à vintàràŋ vi, à mbàŋ si, à vitóm vi, à viyiy vi,

³⁴à vikfə́vsì vee fó yuv ví, ve yì‑iì dzəə̀n gúrí wùn à juv nyàm ndzə̀v, à raŋe,

³⁵ŋkùv mensàŋ wùn à vintoòr və́ ví, à nsər ŋkùv ye dzəə̀n kirə́ʼ ké kiman,

³⁶kidàŋ wùn à vifá və́ ví vidzə̀m, à kibán ke cù ki,

³⁷kitiir ke làm ke á fèrìn e kisha ke mbàm ke baar kí, kíwun kíwun, wùn à lam sə́ sí, à meŋgvə́r mvə mè, à vifá və́ vímóʼ ví vidzə̀m,

³⁸*kíy cù kilay wo vé‑eè fèrìn e kisha ke mbàm ke baar kí, à meŋgvə́r me yoʼ mè, à kiláy ke rəʼtìn kí, à ndzə̀y se á sə́ti shúu kibàn ké NYÙY TÀR shó si,

³⁹kíy cù woo kisha kee *brons wùn à kintaàr kfə́ kí, ke yì‑iì dzəə̀n sá brons, à vintoòr və́ ví, à vifá və́ vímóʼ ví vidzə̀m, à màkìghìn wo mendzə̀v me á su virə́ʼ shó wùn à kiyiy kfə́ kí,

⁴⁰ndzə̀y se sí kiŋ maàndzə wùn à vitóm ve kày vi, à viyiy vév ví, à ndzə̀y se sí sə́ti shúu kày wo wú nəə e maàndzə si, aàkfə̀ə́ wùn à viŋkùm vi, à vifá vidzə̀m ve á yíi a yiì lim se kibàn ké NYÙY TÀR shó vi,

⁴¹e lì ndzə̀y se á bonen, e nàŋsín ji atàá cùu lóo yiì lim yév é kirə̀ʼ ké Nyùy, aá wáa màʼ, a sí dzə̀ jii, sé Aaron woo taà cù see jeéy, e bóo lì sé won və́ ve á yíi a lìm sa ji atàá cù.

⁴²Wír veé Israyi kù‑uù yiì lim rə̀n e dzə̀m réŋréŋ mo NYÙY TÀR‑iì suuyin e Mooser.

⁴³Mooser nèn wày sí e vifa vidzə̀m, e yèn ji á fèr a vidzə̀m réŋréŋ mo NYÙY TÀR‑iì suuyin. Wù nèn səə̀vì áwune.