Read Lamnso Fəə 40 Bible Online

Fəə 40 - Lamnso bible

Fəə 40

¹NYÙY TÀR nèn sùúy e Mooser jii,

²«Wíy lóo dzə e kishiíy ké mbìy ki fó ŋwee mbìyi[100], à nèn nàn kibàn kém ké ntàsín, é kí tiím é yuv.

³Kí tiimè, à wày ŋkùv wo ntò se *mensàŋ si dzəə̀n shó e mvəm wó, e nèn kìŋ fó e raŋe.

⁴Áà nèn lì sa kidàŋ, e wày é kibàn, e tìír vifá və́ é kitu wo, e nèn wìy sa e kitiir ke làm ki, e tìír lam si shó.

⁵À yíi tiír *kíy cù kilay wo à fèrìn e *kisha ke mbàm ke baar kí, a dzə̀ é mbìy ŋkùv mensàŋ, e kfə̀n keèrì sa ndzə̀y sé a sətí shúu kibàn shó.

⁶«Ké *kiy cù woo wó cù ye tonèné, à yíi tiír e maàndzə, e ŋkìʼnìn shuù wo wú nəə e kibàn,

⁷e tiír màkìghìn wo á su virə́ʼ shó e nsàn kiy cù wùn à kibàn kí, e way mendzə́v shó.

⁸Wáyí, à nèn nàŋsín kay yeé maàndzə, e tìír, é yí kiŋ fó, e nèn kfə̀n keèrì ndzə̀y se sí sə́ti shúu kày wo wú nəə e maàndzə.

⁹«À maysì, à nèn lì meŋgvə́r me yoʼ, e yòʼ kibàn kém shó, e kfə̀n yòʼ vifá vidzə̀m ve ví dzəə̀n é mvəm wó, é kibàn wùn à kifá keé mvəm wó kidzə̀m ki wáa dzə jeéy ji kifá kém.

¹⁰À yíi yoʼ sa kíy cù woo wó cù ye tonèné, à vifá və́ ví vidzə̀m, é wú wáa dzə jeéy ji kifá kém ŋkuuŋkùŋ.

¹¹Áà nèn yòʼ sá màkìghìn wo á su virə́ʼ shó, à kiyiy kfə́ kí, é wù wáa dzə jeéy ji kifá kém.

¹²«Á bèy, áà nèn kòʼór Aaron wùn à wón və́ vee vilume é shùu *kibàn ké ntàsín, e sù áwune e mendzə́v mè,

¹³e nèn màʼ ndzə̀y se á fèrìn ji see jeéy e Aaron wùn, e yòʼ wun, é wù wáa dzə jeéy ji wír wom, e fíʼ a lìm fo mò ji taà cù.

¹⁴Áà nèn kòʼór wón və́ fó mentsə̀m, e màʼ vikúm ve da ve fəvír ví aáwuné wùn,

¹⁵e yòʼ áwune mo à yoʼon tàr wov, aáwune fíʼ a lìm fo mò ji atàá cù. Mo à yíi yoʼ áwune ji atàá cù, kù dzə̀ mo rám yéví wíy a lìm ji atàá cù, e ŋgwàʼ sí ŋgwàʼ si.»

¹⁶Mooser ku nèn yiì vinyo vìn vidzə̀m, kù mo Nyùy tàr‑iì suuyin e wun.

¹⁷Kibàn ké NYÙY TÀR kí nèn tìím e yuv é kishiíy ké mbìy ki fó ŋwee mbìyi e kiya ke kí‑iì meen ji baà, e kèʼ mo vé‑eè loòn fó Ejiv[101].

¹⁸Mooser‑iì tòmbìy neèr viyiy ve kibàn, e tìír vintàràŋ sho, e wàyrí mbàŋ si, e kfə̀n tìír vitóm.

¹⁹Wù nèn sàŋrì ndzə̀y é kitu ke vintàràŋ, e sàŋrì kikfə́vsì e kitu wo, kù mo NYÙY TÀR‑iì suuyin e wun.

²⁰Wù nèn lì viwaŋ ve tiy ve vé‑eè saŋen ntò se mensàŋ sho, e wày é ŋkùv, e wàyrí vintoòr ve ŋkùv, e bóo sətí ŋkùv e nsər ye dzəə̀n ji kirə́ʼ ké kiman.

²¹Wù nèn lì ŋkùv mensàŋ və̀n, e dù, e tìír e kibàn, e keèrì raŋ ye yí wáa kìŋ ŋkùv mensàŋ, kù mo NYÙY TÀR‑iì suuyin e wun.

²²Wù nèn lì kidàŋ, e dù sho e kibàn é mbìv yee fó mbìy ràŋ, e tìír e ghaa kirəv kee fó mbìv kùy,

²³e tìír kibán ke cù sho, kí wáa tiy e NYÙY TǍR si, kù mo NYÙY TÀR‑iì suuyin e wun.

²⁴Wù‑uù tìír kitiir ke làm e ŋkìʼnìn kidàŋ, e ghaa kirəv ké kibàn keé mbìv yee tsə́n,

²⁵e nèn sə̀ʼtì lam si, sí wáa ban e NYÙY TǍR si, kù mo NYÙY TÀR‑iì suuyin e wun.

²⁶Wù‑uù tìír kíy cù kilay wo vé‑eè fèrìn e kisha ke mbàm ke baar kí é mbìy ràŋ e mvə̀m kibàn ké ntàsín,

²⁷e tòn kiláy ke rəʼtìn kí shó, kù mo NYÙY TÀR‑iì suuyin e wun.

²⁸Wù nèn keèrì ndzə̀y é shùu kibàn.

²⁹Ké kiy cù woo wó cù ye tonèné, Mooser tiír é maàndzə, e ŋkìʼnìn shuù wo wú nəə e kibàn, e nèn tòn nyám sho ji cu, e kfə̀n yiì cu ye dzəə̀n yé vifa ve yi fo, kù mo NYÙY TÀR‑iì suuyin e wun.

³⁰Mooser‑iì tìír màkìghìn mendzə̀v me á su virə́ʼ shó e nsàn kibàn ké ntàsín wùn à kíy cùu, e nèn wày mendzə́v shó,

³¹me wùn à Aaron, à wón Aarone wáa sù wó wùn à wuú shó.

³²Áwune‑eè lóo nəə́ e kibàn ké ntàsín, lóo koʼtí e shùu kiy cù, á sù virə́ʼ réŋréŋ mo NYÙY TÀR‑iì suuyin e Mooser ji á kú a yiì.

³³Mooser kfə̀n‑eè tìír sá kay yeé maàndzə, yí kìŋ kibàn ké NYÙY TÀR wùn à kíy cùu. Wù nèn màysì, e keèrì ndzə̀y seé shùu kày wo wú nəə e maàndzə. Á mo Mooser‑iì màysìn lim yee bìʼ kibàn ké NYÙY TÀR ben.

³⁴Mbàʼŋkfəə́mé nèn gbù, e sə̀tí *kibàn ké ntàsín, rán NYÙY TÀRí rún é kibàn fó mvəm,

³⁵la Mooser yòʼ dzəə yù fóo nəə́ e kibàn bìʼ mbàʼŋkfəə́mé ye yì‑iì gbuùn, à rán NYÙY TÀR ye yí‑iì runen é kibàné.

³⁶Kí ku nèn a dzə bèy, e ghan sin se wír veé Israyi‑iì ghán e yuv. Mbàʼ‑aà yii lo fo kitu ke kibàn, bo áwune ŋáʼáy, a dù fomóʼó.

³⁷Lóo dzə, a mbàʼ yoʼ lò, áwune kù nèn a dzə fo, a shìy kishiíy ke yì wíy lò.

³⁸Fo ghan yév e dzə̀m, mbàʼ NYÙY TÀR‑iì lo, yì wàa dzə e kitu ke kibàn e shùy. Lóo dzə vitsə́ʼ, və́yí wàa ban e mvə̀m mbàʼ fèy, wír veé Israyi wàa yen.