Read Lamnso Fəə 8 Bible Online

Fəə 8 - Lamnso bible

Fəə 8

¹NYÙY TÀR nèn sùúy e Mooser jii, «Dù yèn Farao, e sùúy sho ji mo woo NYÙY TÀR suuy a jii, ‹Màʼtì wír vémé, aá du, e fíʼ cù mo.

²Aà tèn fó màʼtì, aáwune du, bo m yíi màʼ ŋgeʼ e wò wòŋ, é vishàm vi rún fó e dzə̀m.

³Ndzə́v yee Naayi yíi a dzə vishàm vishàm, a ví yíi a wìy, a nəə́ e wò ntoʼ, e kfə̀n a nəə́ e wò faáy kishiíyí, a koʼ e wò kàvàʼ,[20] e kfə̀n a nəə́ sa e wò kiy se kiban ke tonèn kí, a nəə́ e vikoŋ ve á tóv sho. Fo vé saʼ vée, à wìr dzə̀m, ví yíi a nəə́ sa aáwuné melav bèy.

⁴Ví yíi a liy, a koʼ e wò wùn, e kfə̀n a koʼ e wír vée wùn, a koʼ e vé saʼ vée wùn.› »

⁵NYÙY TÀR nèn sùúy e Mooser ji wù yoŋ, é Aaron ramsi á mbàŋ rə é kitu ke ndzəv ye leŋéné wùn à ye liiné, à visə̀m ví, e yiì, é vishàm vi fəə́, e sə̀ woŋ Ejiv.

⁶Aaron nèn ràmsì kiwó kfə́ é kitu ke ndzəv seé Ejiv, vishàm vi fəə́, e sə̀ woŋ Ejiv.

⁷Yii bèy, vé səm veé Ejivi ku nèn yiì sa réŋréŋ bey, e fə̀ə́r vishàm e dzəə ye áwune yii sénin sə́m sho, ví sə́ woŋ Ejiv.

⁸Farao nèn tòóy Mooser wùn Aaron, e sùúy jii, «A vèn bùnrì NYÙY TÀR, wù tsəʼ vishàm vìn fo vèr à wír vémé wùn, é m nèn màʼtì wír vén, aá du, e cù NYÙY TÀR.»

⁹Mooser bìnèr e Farao jii, «M yú fo fòn. Kù yíi suúy a fon ghán se m bunri Nyùy, e fò e wun, e kfə̀n bùnrì sa fo vé saʼ vəə́ wùn à wír vəə́ ji vishàm vi búŋ á fo ntoʼ, e kfə̀n bùŋ á fo wírí lav si, é ku jòʼsì veé ndzəv yee Naay.»

¹⁰Farao nèn yòŋ jii, «Bùnrì kibvəə́shí.» Mooser nèn biìmé ji m yíi yiì mo Fòn suuyin. Vishàm vi yíi màʼtì fon wùn à ntoʼ, e màʼtì vé saʼ və́, à wír vəə́, é joʼsi cáʼcáʼ veé ndzəv yee Naay. Kí kooy bèy, é Fòn nèn kìíy ji nyùy wùmòʼ yòʼ kfə̀n dzə̀ shó moo NYÙY TÀR woo Nyùy wor.

¹²Mo Mooser wùn Aaron màʼtìn Farao, Mooser dù, e tòŋ e NYÙY TÀR bìʼ vishàm ve wù‑uù fəərin ji wun maʼ á ŋgeʼ sho e Farao wùn.

¹³NYÙY TÀR nèn yiì mo Mooser‑iì lonen, vishàm vi kpúkír fó lav si wùn à fó maàndzə si, à fó kwaʼ.

¹⁴Á báʼtí é vikfər vikfər, fóo wáa shàŋ shàŋèn.

¹⁵Mo Farao yenen ji rəsìne wàa sì, wù nèn tàv kitú, e làa yòʼ yu Mooser wùn Aaron, kù mo NYÙY TÀR‑iì suuyin ne.

¹⁶NYÙY TÀR nèn kfə̀n sùúy e Mooser ji wù suúy á e Aaron ji wù ramsi á mbàŋ rə, e dzə̀v a kibvər sho, é kibvər keé wòŋ Ejiv kidzə̀m ki binkir á e mebvəm.

¹⁷Áwune nèn kù yiì mo Nyùy kì suuyin. Aaron ràmsì mbàŋ rə, e dzə̀v kibvər sho, mebvə́m mè nèn a koʼ e wírí wùn, a koʼ e nyám sí wùn. Kibvər keé wòŋ Ejiv kidzə̀m ki bìnkìr e mebvəm.

¹⁸Mè‑eè dzə̀ féyì e wírí wùn, a dzə e nyám sí wùn. Vé səm veé Ejivi nèn mùm ji vé‑éè báy á sa mebvə́m e dzəə ye áwune yii sénin sə́m sho, kí gháʼ.

¹⁹Vé səm vìyi nèn sùúy e Farao jii, «Kin ki dzə̀ vitaáví vé Nyùy.» Yii bèy, Farao ku tàv a dzə̀ kitú, e làa yòʼ yuurí kinyo kév, kù mo NYÙY TÀR‑iì suuyin ne.

²⁰NYÙY TÀR kfən sùúy e Mooser jii, «Lò é yuv kijàvndzə kijàvndzə, a shìy ghán se Farao yíi fəə, a dù e ndzəv sí. Wù wiy, à sùúy shó jii, ‹Màʼtì wír vémé, aá du, e fíʼ cù mo.

²¹Aà dzə̀ làa yòʼ màʼtì wír vém, aá du, bo m yíi tsənsí nyanyày vifə̀r,[21] é ví sum wò, e sùm vé saʼ vé, à wír vée, e run melav men medzə̀m. Vifə́r ví kù yíi run lav se wìr veé Ejiv, e sùm nsay Ejiv e dzə̀m.

²²Kishiíy kee shooy ki yíi gheén, é m kiŋ nsay Goshen[22] fo wír vémé dzə́, é la vifə́r ví yòʼ nə̀ə́ fo, áà nèn kìíy ji mo woo NYÙY TÀR kér a vitaáví é nsay Ejiv.

²³Kiŋgaʼnìn ke kinyò kìn ki bvəə́shi a dzə kibvəə́shí, aà bvəə́shí yen mo m din jeéyjeéy fo wír vémé wùn à vée.› »

²⁴NYÙY TÀR ku nèn yiì mo wù‑uù suuyin, e tsə̀nsí nyanyày vifə̀r, ví wìy e Farao ntoʼ, e wìy e vé sáʼ vəə́ melav. Vifə́r ví bívír woŋ Ejiv e dzə̀m.

²⁵Farao nèn tòóy Mooser wùn Aaron, e sùúy jii, «Vèn du ri, e cù Nyùy won a dzə̀ é wòŋàn.»

²⁶Mooser suúy jii, «Kí yòʼ dzə̀ tìítiy ji vèr cu Nyùy fèn, bìʼ fo nyám se vèr yíi a cù NYÙY TÀR woo Nyùy wor shó si dzəə̀n *kifàn fo wír veé Ejivi. A vèr lòo dzə, e yiì cu e vifá ve dzəə̀n kifàn fo wír veé Ejivi, áwune yén, la á yòʼ tsə̀mrí ver e tíyí, e yùyrí à?

²⁷Vèr kér fó dù ghán yee vishiíy vitaár e kirə̀ʼ ké woʼ kí, e cù NYÙY TÀR woo Nyùy wor mo wù yíi dìn e vèr.»

²⁸Farao nèn sùúy jii, «M yíi màʼtì, é vèn du, e cù NYÙY TÀR woo Nyùy won é kirə̀ʼ ké woʼ kí, a bèn dzə̀ ji bó vèn yòʼ du a kwaʼda. Vèn lón ri Nyùy, e fò e mò.»

²⁹Mooser nèn sùúy jii, «Fòn yén á rì, m sí maʼtì a wun, a dù. M du, e bùnrì NYÙY TÀR ji nyanyày vifə̀r vin ku màʼtì a fon wùn à vé saʼ vəə́, à wír vəə́ kibvəə́shí. Dzə̀ cáʼ ji lá Fòn yòʼ kfə̀n dzəə yiì sùŋnín a lám kisaŋe, e tèn fóo màʼtì wíri ji á du, e cù NYÙY TÀR.»

³⁰Mooser nèn màʼtì Farao, e dù, e bùnrì NYÙY TÀR.

³¹NYÙY TÀR ku nèn yiì mo Mooser kì lonen, e laàr nyanyày vifə̀r viy fo Farao wùn, wùn à fo vé saʼ vəə́ wùn, à fo wír vəə́ wùn, la kifə́r kí yòʼ bèr, fə̀m à kimòʼón sho.

³²Yii bèy, fə̀m é ghan fen, Farao ku kfə̀n tàv kitú, e làa yòʼ màʼtì wír veé Isray ji á du.