Read Lamnso Jov 10 Bible Online

Jov 10 - Lamnso bible

Jov 10

¹«Vijuŋ vi yòʼ dzə̀ e mǒ dzə̀ʼə̀m. M yíi kwèr kinyo kidzə̀m ke m diyì, e fìʼtì kinyo kidzə̀m ke shilív shém shí ndzə́ʼ sho.

²M yíi a lon Nyùy jii, ‹Éè Nyùy, lá à yòʼ kù màʼ lòn e mǒ kitu máʼan. Ku yiì, é m kiíy kinyo ke à dzə wúu yém fó fo.

³Bo kí fèn boŋ wò bóŋen ji à wáa nyàvrì e mò, a ŋway lim yee wò wo, a tom a dzə̀ kinyo ke wìr wo wù méŋ wò à?

⁴À yii yén vinyo moo wir msòŋ a? À yii kiiy vinyo moo wir msòŋ a?

⁵Vishiíy vé vi tsə̀mér e kitu ke nsay moo vé wìr à? Ví tsə̀mér moo viyá ve wìr à,

⁶é bo à wáa ròn kinyo kém ke bi kí, a tàr ji à sà‑áà yén jay wom á?

⁷Ron bèy, kiiy ji bó m yòʼ kér njò, a bó wìr wo a dzə̀ wù fə̀ə́r mo fo wò kiwo yòʼ dzə̀.

⁸« ‹Kù‑uù bòm wò mo e wó yée, e fò mo mbom. À kfən lò, e bìnkìr, a laàr mo lèn à?

⁹Kuúmé ji wò‑oò lì a dzə̀ nsay mbóm, e bòm mo shó. À yíi lò, e bvəʼə́y mo, é m kfə́n é nsay à?

¹⁰Bó yòʼ‑oò wày wò mendzə́v mem e yè wor bvə̀m, e yiì, m wáa kuy fo à?

¹¹Wò‑oò fèr jav wùn e jùv sho ji ndzə̀y sém, e fiì gháŋ wùn à vighvə́r ví e mǒ wùn.

¹²À fò ne mo dzəʼə̀m, e dìn koŋ yé e mò, a géʼsín ye à géʼsin e mòó kìŋsìn ne dzəʼə̀m yém.

¹³« ‹Yii bèy, wò‑oò lìtì kinyo fo mò. A m kù kì ji à taáme fóo yiì kinyo e mò,

¹⁴a dzə̀ ji a m lò, a jay kinyo e wò, bo à yíi a way sí sho, a bó à yòʼ wíy màʼtì mo, é m boy fó njò.

¹⁵A dzə̀ ji m méŋ wò, lòné kù shòv mo. A dzə̀ ji m yii réŋ, bo bó yòʼ dzə̀ m fə̀m yù fóo nàn sí. Dzə̀rkìtu ghàʼ ne mo, ku yèn ri ŋgeʼ sém sí.

¹⁶A m fə̀m lò, a mùm ji m nan sí, bo à ŋáʼay e mǒ wùn moo kiŋgàr ke bvərə̀ʼ, e dìn e mò ji à shaà a vitaáví.

¹⁷À kù rúvti jay wom akàŋ akàŋ, a dòʼshwiíy wo wù kív wò bìʼ mo kù kúy kuyín. Bó yòʼ dzə̀ à bùŋ dzə́ə yée gìŋ mo e rə́r sí.

¹⁸« ‹Éè Nyùy, wò‑oò màʼtì ji á dzəə́ mo ben ji ka? Nyaa mǒ vèné, bo á kù‑uù tàŋ yè wor táŋén, la wìr yòʼ shòv mo é si.

¹⁹Bo kí kù‑uù dzə̀ ji bó kifá kímóʼ kí yòʼ ŋeʼ a ji mo. M kù‑uù yíi a fəə fo bvə̀m, aá wáa tosín sho tosín, e dù dzəə̀mè.

²⁰Bó vishiíy vém veé kitu ke nsay vi yòʼ dzə̀ vinín. Kii wò, ku màʼtì mo nyaáŋ, kìn wìr‑íì rəsin.

²¹Ku màʼtì, é m rəsin shishàr, e bó a dù fo bó kfə́nbàm yòʼ dzəə̀n, é m du áàŋkfəə́ wòŋ, woŋ, a wú sə́n ji cùm, beéme.

²²Kirə́ʼ, a kí sə́n, shaa ndzə vitsə̀ʼ, sə́n, beéme, a vinyo vi kù tovsìn tòvsìn fó. Ráne fə́m lóo dzə fo, yí kù kfə̀n ji ndzə vitsə̀ʼ.› »