Read Lamnso Jov 11 Bible Online

Jov 11 - Lamnso bible

Jov 11

¹Á bèy, Tsofar woo wír woó Naamat nèn bìnèr e Jov jii:

²«A wìr lamrì e ŋàŋ, la á yòʼ kù bìnèr kinyo kfə́ a? Mo wù yíi bòy fo njò bìʼ fo wù súŋnin e ŋàŋ á?

³A dzə̀ kiyor ké keé ŋàŋ, kí sə̀tí shúu wíri a Jov? Jov, à kwaʼtì ji a dzə̀ à toònè Nyùy e lámé, la wíri yòʼ a saʼ wò à?

⁴À dzəv nsaŋ ji yéʼéy yée dzə̀ yee tìítiy, sévti ji à dzə̀ là jay e Nyùy si.

⁵La Nyùy kù sí ri sùŋnín à vèné, yée mvə̀ʼ shuu və́, e kù tir wò.

⁶Wù ku dìn wò vifií ve ru ví, ve ví yii dzə́ e kilìtì. Vifií ve ru ví kù yii kér mbìv sibaà. Jov, kú a kiíy ji bó Nyùy yoʼ màʼ ŋgeʼ e wò mo kì dzə̀ wù màʼ.

⁷«A dzə̀ à shoòshí, e yèn mo vinyo ve Nyùy vi shoon, e mèé à? A dzə̀ à tàr, e yèn fo vifií vé Nyùy woo Ŋgaà Vitaàví Vidzə̀m vi duùn, e sèéy à?

⁸Vifií vé Nyùy vi kùy, e shaà yúv, a dzə̀ à yeè le lèn, e bóo kiíy? Ví shoò, e shaà woŋ aŋkfə, a dzə̀ à kìíy ké ji ka lèn?

⁹Aá kì fiʼ vifií vé Nyùy, ví dàr, e shaà kitú ke nsay kidzə̀m, e kùʼ, e shaà vikuʼùy vé rìbà ndzə̀v.

¹⁰A wù koò wír, e tìír e lav nsaʼ, kìn wù wày é sháŋ, a dzə̀ jìvír la wun.

¹¹Wù kì vé kimboʼtìi adzə̀m, yén kinyo ke bi ke wìr msòŋ yii kidzə̀m, kù kív kicí.

¹²Á wíy lòo sìn, a kimbèʼbìy kí dzəə́ ne wán a dzə̀ wír, bo kiyúŋ kí sí kér sa vifií.

¹³«Aà lòo dzə, e wày shilív a dzə̀ e Nyùy wùn, bo à yíi a toŋ, a kàn a dzə̀ wun.

¹⁴Wáa dzə, aà yií ne kinyo ke bi kí, à tsə̀ʼ, e neèr kwaʼda. Lá à yòʼ fò kintóʼ, é yii ye bií nəə́ e wò lav.

¹⁵Rúrú, bo à yíi a dzə là nsem, a yu fóo nàn sí, a dzə là kinyo ké a fàn, a bó yòʼ dzə̀ kifá ki sə̀ʼ wò.

¹⁶À wíy làysìn ŋgeʼ sé sidzə̀m, é sí shaa fo wò vifii moo ndzə́v ye yí léŋé.

¹⁷Dzəʼə̀m yée wíy a ban moo shúy, é ŋgeʼ sé si binkir é vijùŋ, mo ndzə ye sənér bìnkìr e ye ranén.

¹⁸Bó à yòʼ wíy a fàn kifá, bìʼ fo à kér fo à tiir vifií. Nyùy wíy a kìŋsìn wò, áà wáa meèmè, a bó yòʼ dzə̀ kifá ki sə̀ʼ wò.

¹⁹À wíy a neŋ, a bó wìr yòʼ wíy a bemér wò. Wíri kù wíy a beè wò anín, a buʼ wó ji à sə́ áwune.

²⁰Yii bèy, a wír ve bií yòʼ wíy a ker fó neèr shwín. Dzəə̀ ye a dzə̀ áwune wìy bàʼàr ŋgeʼ sho yòʼ dzə̀ə́. Bó áwune yòʼ kfə̀n tiir vifií é kinyò, e shaà ji kpúu li áwune.»