Read Lamnso Jov 12 Bible Online

Jov 12 - Lamnso bible

Jov 12

¹Á bèy, Jov nèn a bìnèr, a suúy jii:

²«Kimeŋnìn ki yòʼ dzə̀ ji a vèn sùúy kinyo, la wìr yòʼ kfə̀n kàr, vèn kpúkír, bo vifií ví mày ne fo wòŋ.

³Yii bèy, m kù kér sa vifií moo ven. Lá vèn yòʼ a lì mo ji wír wo wù yòʼ kiìn fo shùy tó. Á bèy, yòʼ kì méŋ la vinyo vìn feyì.

⁴«M kfə̀n ne ji kifá ke nshéʼmé ki fo ŋkar sém sí, mo wo mò‑oò mbaa Nyùy e kinyò, a wù yú tóŋ yém. M kfə̀n ne lèn ji kifá ke á wáa jàʼ, mo, a m tíy e suuyrú, dzə́ là shilóm.

⁵Vinyo ve wíri ví lóo ghan e mboʼ, áwune wàa jàʼ vé ŋgeʼe. A wìr tìn kiwuú a wù tín ne, à kfə̀n a tàʼ melaà vèn ŋgaàŋ à?

⁶Vé kimfaàsìi kù néŋ aáwuné melaʼ ji dèʼ, a wír ve á tínsin Nyùyi dzə́ là fan, a dzə̀ áwune vin ve á ghán aànyùyi.

⁷«Ké lèn ki, dzə́r e nyám si, é sí yéʼéy wò. Ku dzə̀r sá e menə́n mè, é mè naari wò kinyo.

⁸Dzə́r e kifá ke kí ŋaŋrì e nsay ki kidzə̀m, é kí yéʼéy wò. Dzə́r e sə́ seé rìbà ndzə̀v sí, é sí fó wò rán.

⁹Bó kifá kimòʼón fo vifá vìn vi yòʼ méŋ kinyo ke kí dzəə̀n. Ke kí méŋ ji yòʼ yii Nyùy vinyo vìn ki dzə̀ kiné kí?

¹⁰Dzəʼə̀m kifa kidzə̀me kù dzə̀ a dzə̀ e Nyùy kiwo, a kiyoy ke wìr msòŋ e dzə̀m ki kù dzə̀ e wun.

¹¹Bó vituʼùr ví yòʼ kù sháv jí sé a yuurí, réŋréŋ, kù mo kiliímé ki yùtí viyíkìr à?

¹²«Kiíyi shìíy aàránsisii, wìr yén vishiíy, wù wàa kiíy jeéyjeéy fó vinyò.

¹³Yii bèy, vifií wùn à vitaáví ví kù tàr a dzə̀ e Nyùy, a wù kù kiiy mvə́m se vinyò mo sí dzəə̀n.

¹⁴A Nyùy sàʼ kifá, a sáʼ wun, la wìr yòʼ bàʼrì. Wù wáy wír e sháŋ, bo wìr yòʼ dzə̀ shó wóo fəə́r ŋgaàŋ.

¹⁵A wù tìír wuú, bo kifá kidzə̀m ki yúm fo nsay. Wù sə́ʼə́r, bo yí lo, e kètì virə́ʼ.

¹⁶«Vifií wùn à vitaáví ví kù tàr a dzə̀ e Nyùy, a kù kì wun mo wù kér ŋgaà kimboʼtì, a kù kì wun mo wù kér wo á boʼtin.

¹⁷Wù lo, wù sə̀ vifií fo vé wòŋe, á kfə̀n áànjìʼ, lo, wù yiì, vé saʼa wàa yuŋsí yuŋsín.

¹⁸Nyùy lo, wù sù afon, e nèn kùr ndzə̀y sé vikwàn aáwuné sar.

¹⁹Wù lo, wù shòʼóy ndzə̀y fo atàá cùú wùn, e sə̀ʼə́r kóy vé saʼ ve tavkíné.

²⁰Kù dzə̀ wun wo wù yii sə́ti shúu wìr vee jwáʼ, yii, la ŋgày sé wìr si yòʼ a kiíy vinyo.

²¹Wù lo, wù ŋwày atǎr saʼ ŋwáyín, e bvə̀tì kikuúví fo antaví kinyè.

²²Wù lo, wù fə̀ə́r kilìtì keé ndzə vitsə̀ʼ fó meranén, e ghèm woŋ aŋkfə, ráné nə̀ə́ fó.

²³Wù kóʼor vitúm, lo fo bàm, wù laàr. Wù kuʼùr vitúm, lo fo bàm, wù sàʼtì.

²⁴Wù lo, wù jìŋèr afon veé kitu ke nsay, e yiì, á wàa ghan, a jan e kwaʼ.

²⁵Á lo, á wàa ghan e ndzə vitsə̀ʼ, a ghaà virə́ʼ gháan, a yií Nyùy, á wáa fenkír moo wír wo meluʼ mè koon.»