Read Lamnso Jov 15 Bible Online

Jov 15 - Lamnso bible

Jov 15

¹Á bèy, Elifas woo wír woó Teman nèn a bìnèr e Jov, a suúy sho jii:

²«A dzə̀ fiì wàa suúy kinyo, a bó noshìndzə̀v yòʼ dzə̀ shó, a nàn wún kisáŋ, a fəə́r jí fo shuù, a dzə̀ shwér à?

³A dzə̀ wù lì a dzə̀ lám wo wú yòʼ kér mvə́m, a tunér kitú kfə́ shó a, mo wù yíi a fəə́r lám fó shuù, a dzə̀ wo bó yòʼ dzə̀ wú sə̀ wun a?

⁴Jov, à màʼ ne ghvə́m ye wìr kì yíi a ghvəm Nyùy. À sí yii, a wíri yòʼ kfə̀n tiir Nyùy fo mbìy.

⁵Kisúŋnìn ké ki kù dìn ne vinyo vé ve bi ví. Á nsàv ye à li lám kinshwìv, leerì wíri shó.

⁶Kù wày shuu wó wò e kinyò, bó yòʼ wày mo, a kù tòʼ shuu wó ji à gbù a ne nsaʼ.

⁷«À kwaʼ ji vé‑eè tòmbìy dzə̀ə́ a dzə̀ wò à? Mo Nyùy‑iì tòmbìy bòm a dzə̀ wò, e bó a fèr agwan a?

⁸À yú ne antaŋ ve Nyùy wùn à nsheèlav sə́ sí‑iì keerin dzəʼə̀m, e bà á? À kwaʼ ji jòʼ wò wo à fiirin a?

⁹Kinyo ke à kwaʼ feyì ji à kì, a bó vèr yòʼ kì kí dzə̀ kiné kí? Kinyo ke kiìn wò jeéyjeéy fó fo, a vèr yòʼ kì kí dzə̀ ka?

¹⁰Wír ve vitú vi fərin ne wùn à ŋgày sé wìr si kù dzə̀kìr e věr mvəm, wír, aá shaá tàr won fó viŋgày vé wìr.

¹¹«Dzə̀ ji rəər ye Nyùy rəər wòo yoʼ ghèén wò à, mo ntir ye wù tír wò ji wèe yòʼ gheen wò a?

¹²Ndzə̀ʼə́r ka tím yé? À dzəvtì ka fó si,

¹³e bó a shwiíy kilòŋ vèn Nyùy, a fam vinyo, é kfə́ə ji see bey si wáa fəə fo wò shuù?

¹⁴Wìr msòŋ á ka, e bó a dzə là shilóm, wír, aá dzəə́ dzəə́n, é bo wù wáa dzə là nsem?

¹⁵Ébéy, a Nyùy lòo dzə, a kòr shilív fo nsheèlav sə́ sí wùn, a yen vifá veé yuv, a ví yoʼ bùú lóm e wun si,

¹⁶bo ké wìr msòŋ kí dzə̀ kfə́ é le? Wír, a wù yii joonè, kuvrì kiŋkùvrì, nó vinyo ve bi ví é njà mendzə̀v.

¹⁷«Jov, yuúrí, e yù, m kér kinyo kée naàrì e wò. M yíi kwèʼ kinyo ke m yenen ne, e naàrì e wò.

¹⁸Dzə̀ kinyo ke afií yeʼeyin mo shó, a bó á yoʼ lìtì kinyo kimòʼón ke vé‑eè yuun fo atàr véví shuù.

¹⁹Kù dzə̀ atàr vév vin ve Nyùy‑iì foon nsay aáwune, a bó kiŋgwìy ki yòʼ‑oò lo bàv aáwuné mvəm.

²⁰Kú a kiíy ji wìr wo wù maʼ ŋgeʼ aámóʼó kitu kù kfə́r sóŋ, yú nyár kishiíy kidzə̀m. Kù dzə̀ mo wun wo wù nyavrì e wíri və̀n kù kfə́r sóŋ bey, e dù meé e ghan sé kpu.

²¹Wù lo, wù yù kiyor, a kí yor, bémer wun, wù lóo yen ji vinyo vi ghán e mboʼ, ashóŋé nèn nə̀ə́ wun.

²²Wù fan fó a ghan fo mensənér, fan ji á tèʼ ne wun ji á yúyrí.

²³Wù ghán ján janén, ji wun sà‑áà koóy kifá ke yi a, a wù kì jii, aá yèe le, e yèe le, bo kpúu kù sì á e wun vilòŋ.

²⁴Wúné beéme wun bìʼ nyár ye wù yú wùn à ŋgeʼ se wù yén si. Vinyo vìn vi gìm ne wun moo fon wo wù giimè kirə́ʼ e rə́r sí.

²⁵Vinyo vìn vi kooy wun bìʼ ŋkùm ye wù kamen, e taàmé Nyùy sho, taáme, din ji wun tàv, e shaà Nyùy woo Ŋgaà Vitaàví Vidzə̀m.

²⁶Wù guynìnè, taáme Nyùy e vindzə̀ʼ, taáme bèy, yéʼti e kintav ke ŋkeè ke wù kér e kiwo ki.

²⁷«Mo wù fə̀m yikin ne, e rùn rúnén, a juùr kishúv,

²⁸ŋkà se laʼ se wù dzə́ sho si yíi dù e vifə̀m. Lav sə́ sí yíi a dzə kisáŋ, a kimaysì kí kù dzə̀ ji sí kerkir, e mày.

²⁹Mbàm sə́ sí yòʼ wíy laatí. Bùʼ və yòʼ wíy tiytíy. Kéŋ rəə́ yòʼ wíy ràm e kitu ke nsay.

³⁰Wù yòʼ wíy bòy fo kpúu wo. Wù kù wíy a dzə moo kicí ke və́yí tònèn ne tám si, é Nyùy yoy yóyin, e fèér wun.

³¹Wù ku yàr fó a boʼtí kitú kfə́, a tiír vifií é vinyò ve ví yòʼ kér mvə́m. Vilaʼày və́ ví kù wíy a dzə vinyo ve ví yòʼ kér mvə́m.

³²Wù kù wíy shèsìn, a wù dzə̀ə́ e wun vinsùm, é kinyo kidzə̀m ke wù táŋ ki lay kisáŋ.

³³Wù wíy a dzə moo kitiír ké *vayin ke báŋ si gbu sibór, a dzə moo kicí ké *oliv ke kí buy, nèn kù kuuyì.

³⁴«A ké wìr ve á méŋ Nyùy, á kù wíy kfən aàkár. Və́yí wíy laàr láʼ sév, láʼ, aá báʼrí a dzə̀ e mbàm se kinshwìv si.

³⁵Wír vìne juur kighèʼ e bvə̀m, á dzə̀ə́ a dzə̀ ŋgeʼ, a kinshwìv ki kù sì wóov woo wán wo á juur aáwuné bvə̀m.»