Read Lamnso Jov 16 Bible Online

Jov 16 - Lamnso bible

Jov 16

¹Á bèy, Jov nèn bìnèr jii:

²«M yù ne kfə́ə vinyò ve vèn taŋrin vin vinín. Ven adzə̀m, vèn dzə̀ vé kinsham ve kisaŋe.

³Bó yòʼ dzə̀ vèn mèy kfə̀nkfə́n fo věn kilàmrì à? Elifas, domsì ka wò ji à wáa bìʼtì wòsò.

⁴A ŋgeʼ sìn si kì kòóy a dzə̀ ven, bo kù dzə̀ mo a kì dzə̀ m wàa suŋnín e vèn mo vèn súŋnin e mò. Bo m kù kì yíi a te lám, a sày ven, a dzə̀v kiwuú é nsay.

⁵A kì dzə̀ m wàa tavír ven a dzə̀ fó shuù, a làmrì làmrìn ji m rəər nyár yén.

⁶«Yii bèy, a m fə̀m súŋnin bèy, bo kee shooy ki yòʼ rəər nyár yém. A m fèn gòʼ kisə́sə, kee shooy ki rəə̀r nyár yém é gha?

⁷M dzə́ bèn, a Nyùy rèŋèr ne vitaáví fo mǒ wùn. Wù laàr ne kfə́ə yém e dzə̀m.

⁸Nyùy tsə̀m ne mo e ŋgeʼ, a wíri sí yén ji lòné koò á kiwuú kém. M yùm ne moo shiŋkúnŋkun, aá kù yén ji lòné dzə̀ á woo mǒ kibàm.[15]

⁹«Nyùy ban mo féyì, saʼtì mo e wun mvə̀m dòʼshwiíy mo nyàm sàʼtì kifá, ŋéyti sóŋ, taáme mo shó. Ŋgaà wom vibàn menrì sí, leey mo shó.

¹⁰Wíri leey mo, ŋaŋ shuu, lem e rə́. Á yúy kindzəv e mǒ bubúʼ ji á ku shòór mo. Á tàtí ne adzə̀m, e suùsín, e kìʼ mo.

¹¹Nyùy wày ne mo e wír ve bií kitam, e shwèy mo e wír ve á méŋ wuné kiwo.

¹²Mò‑oò dzə́ dzə́ yee nyaáŋ, Nyùy ghár mo, e bvə̀ʼtí. Wù tsə̀m ne mo fó asìʼ, e foòsì mo. Wù lì ne mo ji kidaànè kfə́,

¹³e fò, aŋgàa vibàné gíŋ mo, a màʼ e mvəne. Wù‑uù tè mo fó buu bvə̀m, e tòsín, a bó wù yòʼ rə́r mendzən. Wù‑uù tòʼ shibúv shém, shí leém é nsay.

¹⁴Wun woo Nyùy kù wáy kileémé e mǒ wùn akàŋ akàŋ, gim mo moo koóbáŋ wo wù yòʼ fó kintóʼ e shùu rər.

¹⁵«M kù màʼ ne a dzə̀ ndzə̀y sé kpu e wùn, aá sò ne mo ŋkuuŋkùŋ, m wáa ser a dzə̀ é kibvə̀r.

¹⁶M dìy ne, sií bínkír, a she mo sheén. Síi kòʼkír ne mo, a səəné, a virə́ʼ ví beéme beèmén.

¹⁷Yii bèy, bó m yòʼ fə̀m‑eè lo bùʼ rə́mrə́m kinyò, m kù‑uù bunrì Nyùy shilív shimòʼón.

¹⁸«Éè nsay, m sì moo wír wo á yuyrin, á yen fóo sətí mensə́ mem. Á yen fóo sə̀r mo, fo m wáa toŋ e Nyùy ji wù tínén kinyo kém é nsànloŋ.

¹⁹Rúrú, fə̀m lèn, njen wom kù dzə̀ é yuv, a wìr wo wù yíi bìn nsaʼ yem kù dzə̀ a dzə̀ é taa wo.

²⁰Ŋkar sém sí jaʼ mo, a m kù tóŋ, kan a dzə̀ Nyùy ji wù sə́ á mo.

²¹La wànŋkfə̀wìr kù sí ri neèr kinyo kfə́ e Nyùy si, a buʼnín sho mo wìr bùʼnín kinyo ke ŋgaà və shuù lav à?

²²M sí maʼ kfəə̀, a dar bám, e bǎm shintàm, é m du ghán ye bó kfə́nbàm yòʼ kfə̀n dzəə̀n.»