Read Lamnso Jov 18 Bible Online

Jov 18 - Lamnso bible

Jov 18

¹Á bèy, Bildad woo wan wìr Shu nèn bìnèr e Jov jii:

²«À yíi suúy vinyo vìn njèʼèr njèʼèr bèn, e dù tiír a dzə̀ feé? Jàŋ vifií vé vi é bàm, é bo wòsò yiì a suŋnín.

³Jov, bìʼ ka mo à liìn ver ji nyám si, a yen ver ji anèy?

⁴Wò wo à lo, à wày kileémé é wùn bìʼ dòʼshwiíy, à kwaʼtì ji a dzə̀ wíri lò fó kitu ke nsay bìʼ wò à? À kwaʼtì ji a dzə̀ kilán ki meènè, e fəə̀, e gbù bìʼ wò à?

⁵«Rúrú, dzəʼə̀m wìr wo wù méŋ Nyùyi kù yíi ndzəmén moo kikaʼày, é wù wáa dzə moo və́y wo wú ndzəmen.

⁶Lav rə kù sí sə́n sənén ji cùm, a kikaʼày ke kí yii sə́ŋ e wun lav ki ndzə́mén ne.

⁷Á fàr ne ntàm se wù‑uù rə́si sar vitaáví vitaáví, a ntir ye wù‑uù rə́si fó e wíri kòʼór ne wun, e shìy é nsay.

⁸Wù tàm ne lálán, e kfə̀n tò shó, wù wáa yaʼáy bií, e nèn kù gbù sho.

⁹Kitám ki koó wun fo nsən kiwuù, líŋ sír wun, a bó fóo wàʼ yòʼ dzə̀.

¹⁰«Á tàm ne njoy e nsay, e kilìr, a sì kitám ke á yíi koo wun sho fo wù shaa.

¹¹«Vé kinjuyrìi bémer wun vitóŋtóŋ vidzə̀m, nyoorì wun ji á koó.

¹²Jìŋ rèŋèr ne vitaáví fó wùn wó, ví máy. Ŋgeʼ si kù sí néŋ, shiy wun shíyin ji wù bayrin, e tò shó.

¹³Yàsí kfə̀r ne wun, wúné wáa fòy. Yàsí wo bi bàm ne kóy si wùn à shwín sí fó fo.

¹⁴Á sə̀ŋ ne wun, e fə̀ə́r fo lav fo wù‑uù kiŋsìn kitú kfə́, a tsəəné, a dù sho e kisəə.

¹⁵Wír ve á dzə́ e wun lavi dzə̀, a wo wù ràmèn fo wun yòʼ dzə̀,[16] aá tón ne kifá ke kí baári moo mekàŋ, e *kfə̀mrí lav sho.

¹⁶Wù sì moo kicí ke gháŋé yumen ne e mvə̀m nsay,[17] tám si soóy fó yuv, e mày.

¹⁷Wìr msòŋ woó kitu ke nsay e dzə̀m làysìn ne wun, a bó wìr yòʼ dzəə́ kiiy wír wùmòʼ ji wun.

¹⁸Nyùy jùm ne wun fo ndzə ye ranén, wù dú e ye sənér, e kù jùm wun júmen fó kitu ke nsay.

¹⁹Bó wù yòʼ kér wán, kìn njìlaʼ e wír vəə́ mvəm, a bó wìr yoʼ bèr fo wù‑uù dzə́.

²⁰Wíri leey kishiíy kfə́ ké kpu, a wúné beéme áwune. Fáne yúyri wir dzə̀m, à veé mbìv fen, à veé mbìv fésəə.

²¹Rúrú, á mo kimaysì ké wìr ve bií kí dzəə̀n kév. Kù dzə̀ kíwun ke kí kooy wír wo wù méŋ Nyùy e dzə̀m.»