Read Lamnso Jov 19 Bible Online

Jov 19 - Lamnso bible

Jov 19

¹Á bèy, Jov nèn a bìnèr Bildad, a suúy sho jii:

²«À yíi nə̀ʼsì mo ben, e dù meé e le? À yíi tuŋ shilív shém e lámé, e dù meé e le?

³À kuù ne mo akàŋ anín, a bó dzə̀rkìtu yòʼ koó wò fo à wáa lovtí e mò ben à?

⁴A fə̀m dzə̀ rú ji m jày, bo jay wom kù dzə̀ e mò.

⁵Aà fə̀m lò, a yen kitú ké ji à shaà mo, a lì ŋgeʼ sém ji kitám keé koo mo shó,

⁶à kù a kiíy ji kù yiì Nyùy, é bo m tó é kinyò, e tàm lálán və, e kaàrí mo shó, e tàr.

⁷«Rúrú, m tóŋ, rəə́me ji kpú èy, la wù yòʼ a kwè. Tóŋ feyì, nan jí, la wù yòʼ fə̀m a nəə́ e mǒ kinyò ji á tínén.

⁸Wù sə̀tí ne dzə́ə yem ji lá m yòʼ kfə̀n yù fóo shaà, e lèm mo é ndzə vitsə̀ʼ, m wáa ghaà dzə́ə gháan.

⁹Wù tàtí ne kéŋ yém, e kweèy e dzə̀m, e dzə̀n ntáráʼ fo mǒ kitu.

¹⁰Wù bvə̀ʼə́y ne mo ŋkuuŋkùŋ, a kém kí yòʼ kfə̀n dzə̀ə́. Wù dzə̀n ne kifá ke mò‑oò tiir vifií shó mo á dzə̀n kicí.

¹¹Wù lèéy ne mo, dòʼshwiíy wáa kiv wun, wù wáa lì mo ji ŋgaà və vibàn wùmòʼ.

¹²Wù tsə̀nsí ne akoóbáŋ və́ ji á ghíʼ mo, aá kaàrí ne láʼ yém, e tàr, a runsí sə́m wo mò‑oò tuŋen.

¹³«Nyùy jàvsìn ne vèr aàfə́rí, á wáa dzə̀nìn, m kfə́n ji kiŋgwìy ŋkuuŋkùŋ fo wír ve á kiìn moó.

¹⁴Afə́r vémé kù màʼày ne mo, ŋkar sém sé tim sí láysín mo sidzə̀m.

¹⁵Vé kiŋgàn ve á wiy, shiiy vèr áwuneé kù sí méŋ mo méŋén. Wónlě vikìy ve á lim e mǒ lavi kù sí káy mo káyín ji tókíshwáŋ. Wìr dzə̀m kù sí li mo ji wir kitum.

¹⁶M jaŋ wánlè lìm wom, wù tèn fóo ghay, fə́m lón e le, kí kù ghàʼ gháʼán.

¹⁷M yoyì, kirəm ki wàa ghaʼ yeè lav wom. M kù sí rəm wón vém rə́men.

¹⁸A fə̀m dzə̀ wón ve terií, bo á kù sí shéʼ mo shéʼén. M ŋáʼay, lóo kaarí, á kù a te lám teén e mǒ wùn.

¹⁹Ŋkar sém sé tim sidzə̀m si kù sí nyaysì mo nyáysin, a vém vé ŋkòŋmée bínkír ne, e kfə̀n taàmé mo.

²⁰Vighvə́r vém ví tàtí ne tátín e mǒ wùn, m bóy fó kpu ji cóʼ.

²¹«Éè vèn vee ŋkàr sem, vèn shám mendzən mem mè, vèn ku shàm mendzən mem mè. Nyùy dzə̀v ne mo e kiwó kfə́ kí, e màʼ e nsay.

²²Nyùy nyavrì e mò, a vèn nyavrì sa sho bìʼ ka? Vèn yóʼ ne kfə̀r virim e mǒ bàm, e dòr a?

²³«La kí sí ri a dzə ji vé‑eè sàŋ kisúŋnìn kém á? La kí sí ri kòóy ji vé‑eè sàŋ é ŋwàʼ, e lèm a?

²⁴Yì‑iì yiì ka féyì fo kí koóy ji vé‑eè toòŋé jí sém é wǔn kilan, é sí goʼ fó ŋkuuŋkùŋ. Bo vé‑eè toòŋé e kisha ki, e rùnsí nsáŋtí e làm wo wú kér nshòme.

²⁵«Yii bèy, m kì ji wìr wo wù wíy bìn nsaʼ yem dzə̀ á e tin, a kù wíy suúy wun jí kinjòʼsìbàm kùm mo é kitu ke nsay fèn.

²⁶A nyári fə̀m rèŋèr wún wóm, wú may, bo m kù yíi yen Nyùy, a m dzəə́ ŋeʼè.

²⁷M kù yíi yen wun feyì e sí yémé, a m yíi a yen wun moo wír wo m kiìn. Tímé kù sí túm mo túmén.

²⁸«Vèn ghàn kén é le, e bó a suúy jii, a dzə̀ vèr fìnèr nyár e wun wùn. Bó lòn vəə́ yòʼ ghàn a dzə̀ kiwó kfə́ a?

²⁹Ven vin, vèn ku yòʼ a leéy sa Nyùy, a fàn ŋgeʼlàʼ. Nyùy shwiiy kilòŋ, wù màʼ ŋgeʼ e wírí kitu bìʼ jay wov, maʼ feyì, aá fíʼ kiíy ji dzə̀ á wun wo wù tínen nsaʼ.»