Read Lamnso Jov 2 Bible Online

Jov 2 - Lamnso bible

Jov 2

¹Kfə́n a dzə e kishiíy kímóʼ kí, nsheèlav se Nyùy si báʼtí e NYÙY TǍR si ji sí duŋrì a vitú vév, Satan shém sá aáwuné ŋgoo ji wun duŋrì a kfə́ kee kitú.

²NYÙY TÀR dzə́r shó jii, «À kì ghán ké fèé?» Satan bìnèr sho jii, «M kù ghán yá woŋ, du e mbìy, kfə́n e bàm, kóʼ e kùy, sə́y e tsən.»

³NYÙY TÀR kfən dzə̀r e Satan jii, «À shoóshí ne ŋgaà lìm wom woo Jov, yée kiíy ji wìr yòʼ dzə̀ shó e kitu ke nsay wo wù dzəə̀n là shilóm, tíy e suuyrú, ghvə́m mo, kfə̀n bin ndzə̀m é kinyò ke bi kí moo wun a? Wù kù tíy e mǒ wùn, a wù lùm ne, e kpù shó. Mo à fə̀m ghíʼ mo ji m ku màʼ wun là njò.»

⁴Satan bìnèr e NYÙY TÀR jii, «Nyár wìri kù lò mo ŋgaàŋ yú. Wìr yíi lì kéŋ rə́ e dzə̀m, e kav dzəʼə̀m rə́ shó.

⁵Yii bèy, aà lò lèn, e màʼ yàsí e Jov wùn, bo wù kuu wò e wò si.»

⁶NYÙY TÀR nèn sùúy e Satan jii, «Yuúrí, m fò ne wò vitaáví ji à yii kinyo ke à koŋè e Jov, yii bèy, ku bàvtí dzəʼə̀m rəə́.»

⁷Á bèy, Satan nèn lò fo NYÙY TǍR si, e dù, e tsə̀m Jov e viváv ve ví nyár e ŋàŋ ví, ví sə́ wún və́ e dzə̀m, e kèʼ fo kitu, e sə̀y, e mèé e wuù.

⁸Jov nèn sèsín e kibvə, e lì kimbvə́ʼ ke kìŋ, a kwaà wún shó.

⁹Yeè lav və nèn lò kfə́, e sùúy sho jii, «Vinyo vi rə́si kooy wò bèn, aà kù rə́si tíy e Nyùy wùn shilív shimòʼón à? Kuù Nyùy, e kpù.»

¹⁰Yii bèy, Jov ku bìnèr e yeè lav və jii, «À suuy kinyo a dzə̀ ke a kì dzə̀ sùúy kiyúŋ ké wiíy. A dzə̀ wòsò kù a səəsí a dzə̀ kinyo ke juŋ ki fo Nyùy, e làa yòʼ səəsí ŋgeʼ à?» Mo vinyo vìn vi‑iì kooyin Jov, bó Jov yòʼ‑oò lo jày, a sày Nyùy.

¹¹Jov wáa ker ŋkar sə́ símóʼ sí sitaár, a sí dzə̀ jii, Elifas woo wir Teman, Bildad woó Shu, e lì Tsofar wo yì‑iì dzəə̀n wír woó Naamat. Áwune yú ŋgeʼ se sí nəən Jov, e nèn kàʼ ntàsín ji á du, e shàm á wun. Wìr nèn lò fo wun kirə̀ʼ, a wìy. Á tárnín, e nèn a dù,

¹²e yiì lòo màʼ sí, e yèn Jov, aá dzə̀ə́ fo shintàm, e làa yòʼ dzə́ə kiíy wír woo shó. Á nèn waàmé a dzə̀ tóŋ, e sàtì vikúm fó wùn, a dìy, a kuúy kibvər, a waŋ e yuv,[6]

¹³e nèn lò dzə̀ʼə̀m wùn à Jov. Á dzə̀ʼə̀m kishiíy saàmbà, à shùy, à vitsə́ʼə́, aá kù sér a dzə̀ fó nsay, a bó wìr yòʼ suuy kinyo sho, bìʼ fo vé‑eè yenen ji ŋgeʼ sə́ sí dzə̀r a ŋàŋ.