Read Lamnso Jov 22 Bible Online

Jov 22 - Lamnso bible

Jov 22

¹Á bèy, Elifas woo wír woó Teman nèn a bìnèr e Jov, a suúy jii:

²«A dzə̀ wìr yiì ka e Nyùy, é bo kí sə́ Nyùy? A wìr fə̀m kér a dzə̀ vifií, bo kee shooy ki kù sə́ a dzə̀ wun.

³A wìr fə̀m dzə̀ là jay, bo vijuŋ ve Ŋgaà Vitaàví Vidzə̀m vi dzə̀ ka shó. A vinyo vé vi dzə̀ là nsem, bo séʼ və dzə̀ ka?

⁴À kwaʼ ji wù sər wò e vinyò a dzə̀ bìʼ fo à ghvə́m wun à? Mo wù səŋ wò e kibàʼ ke nsaʼ a dzə̀ bìʼ fo à yúnin wun a?

⁵Bó yòʼ dzə̀ bìʼ liì wò kisaŋ wo wù gháʼti ghàʼtín a? Bó vinyo vé ve bi ví yòʼ kù ramtìn ràmtìn a?

⁶Kí wò‑oò foor afə́r vé mbàm, koó vifá vév kisáŋ? Jòkìnyàʼ, kweey ndzə̀y fo áwuné wùn, aá goʼ kinshóʼ.

⁷Wò‑oò ŋwéy mendzə́v fo wìr, a wù dór, kilòŋ kí wáa yum, ŋwéy viyíkìr fo wìr, a jìŋ yár wun.

⁸Ké ki kù dzə̀ jii, nsay dzə̀ á ye ntav, ceʼ wìr faasì, wù yòv, a dzə sho.

⁹Wò‑oò lo, à jùm vikǐy ŋkfə, á wàa dùkìr e wóo kisáŋ, e laàr ntom ye wón ŋkfəə kì yíi a lùŋ fo fo.

¹⁰Bìʼ bey, alíŋé gìŋ ne wò, e tàr, fáne sásín, e sùm wò.

¹¹Ndzə sə̀n ne wò, e làŋsìn fo à yén kirə́ʼ. Ŋgeʼ si nəə́ wò mo kúŋ nə̀ə́ e kirə̀ʼ.

¹²«Bó Nyùy yòʼ kù dzə́ e ntoò yùv, bíʼti, leey mejiy medzə̀m mo mè sə́ŋé, a shí fə̀m sòv feé a?

¹³Aà néŋ ké, maʼ a dzə̀ lám ji Nyùy kì ka a? A dzə̀ wù tòsín mbàʼ ye sənér é le, e bóo saʼ nsaʼ wíri?

¹⁴Mbàʼ sùm ne wun, a bó yòʼ dzə̀ wù dzəə yèn kifá, a wù kù sí ghán a dzə̀ é nsə̀ŋ yeé yuv.

¹⁵«À kù yíi a jùmrì a dzə̀ liì wo bi a? Liì wo wír ve á méŋ Nyùyi kérí à?

¹⁶Ndzə́ví‑iì lo kùŋ wír ve á méŋ Nyùy, á kpúkír, a bó yòʼ sì ghán, kinsə̀ŋ ke vé‑eè wayin ji á baʼrì dzəʼə̀m yév shó ki láy.

¹⁷Vé‑eè té lám e Nyùy jii, ‹Kíŋrí fo věr ghaŋ,› kfə̀n keŋ jii, ‹A dzə̀ Ŋgaà Vitaàví Vidzə̀m yiì ka e vèr?›

¹⁸Kù dzə̀ wun woo Nyùy wo wù rúner melav mev e vifá ve juŋ vi, a bó yòʼ dzə̀ féyì m yuùrí ntir wìr ve á méŋ Nyùy.

¹⁹Wír ve á yú Nyùyi yén kinjòʼsì kév, á yù a dzə̀ vijuŋ, a wír ve á dzəə̀n là njòó shéʼ áwune shéʼén, suuy jii,

²⁰‹Rúrú, á laàr ne aŋgaà vér vibàn, bùʼ wov réŋ mo tòn və́y.›

²¹«Jov, ku koò viŋkar vi vèn Nyùy, e yàr kighvəvrì ki. À yii bèy, é wù fó wò vishí ve juŋ vi.

²²Kii wò, ku yuùrí ntir se sí fəə́ fo wun shuù, e lèm jí sə́ sí e wò shiliv.

²³Aà kfə̀n fo Nyùy woo Ŋgaà Vitaàví Vidzə̀m, bo wù yíi siìr vijuŋ vé fo. Kí dzə̀ ji à ku kìír a kinyo ke bi kí fo wò laʼ,

²⁴e màʼày kisha ké ke mbàm ke baar kí é kibvə̀r, e kù màʼ keé Ofir e vilan veé sar ndzəv.

²⁵A Ŋgaà Vitaàví Vidzə̀m yíi a dzə rú ji kisha ké ke mbàm ke baar kí, a dzə kisha ké ke mbàm ke fəvír keé kilùm,

²⁶bo à yíi a yu vijuŋ ve Ŋgaà Vitaàví Vidzə̀m, a nàn sí, a leéy wun woo Nyùy e shiliv she juŋ shi.

²⁷À yíi a bùnrì Nyùy, é wù wáa yu bunrì yé, áà wáa runér aŋkàʼmé ve wò‑oò kàʼàn wun sho.

²⁸À yíi sìysì kinyo, tá mban sho, bo kí kù sí tíy fo, é ráné kú a kàʼày kirə́ʼ kidzə̀m ke à tiir kiwuú ké sho.

²⁹A wíri màʼ wír, à tóŋ ké ji Nyùy ku nàn a ŋgaàŋ e yuv, bo wù kù yíi lùŋèr woo shó wo wù yòʼ yén kitú kfə́.

³⁰A dzə̀ sá wù bòyìr wír wo wù kér njò, wù lùŋ bìʼ wò, wò wo bó à yòʼ wáy kiwó ké e kinyò ke bi kí.»