Read Lamnso Jov 26 Bible Online

Jov 26 - Lamnso bible

Jov 26

¹Á bèy, Jov nèn a suŋnín e Bildad, a suúy jii:

²«Ŋwày, a kì dzə̀ wàa tavír wò wír wo wù siìn là kitar à? A vitaáví ví mày fo wìr wùn a ví máy ne, yiì tàvír wò ŋgaàŋ à?

³Ábáy, à dzə̀, aà tír wír woo là vifií féyì feyì. À dzə̀, aà yéʼéy wíri mo á wáa tiír kiwuú, a fìʼ. Wír feyì nyanyày.

⁴Sə̀ la wò e jí se à fəər fo shuù sìn si? Wày la jí sìn e wò shuù ji à wáa meér?

⁵«Viyoy vee aŋkfəə́ wòŋ vi dzə̀, a ví kù yaʼ yàʼàn e Nyùy si. Veé sar ndzəv ví yaʼà, a veé mvə̀m ndzə̀v ví yaʼ sa.

⁶Wóŋ aŋkfəə kù dzə̀ é ŋgèŋgèr e Nyùy si, a kirə́ʼ ké ŋgeʼ ki kù dzə̀ tèéter e wun si.

⁷Wù‑uù sàŋrì yúv é kitu ke kirə̀ʼ, a fóo dzə̀ kisáŋ, e tìír kitú ke nsay e kirə̀ʼ, a kifá ki yòʼ tómé.

⁸Wù lo, wù kùr wuú é mbàʼ ye sənér, yii bèy, la yí yòʼ dzə̀r, e ghàʼ mbàʼ fo yì keérí.

⁹Wù yii saŋrì mbàʼ e wun kitu ke kàvàʼ, litì fo wìr shóv é si.

¹⁰Wù‑uù sə̀ŋ ne nsə̀ŋ[21], yì kaárí kitú ke ndzəv, e jàvsìn shúy fo ndzə vitsə̀ʼ.

¹¹Nyùy lóo wam sáʼ fo yuv, vitóm veé yuv ví wàa sə̀ʼsì.[22]

¹²Wù tìír ne rìbà ndzə̀v[23] e vitaáví və́ ví, wù wáa tiy kirə́ʼ kimòʼón. Wù sàʼtì kigàgǎʼsòŋ kee Rahav[24] e vifií və́ ví.

¹³Nyùy‑iì fèr mbàʼ férín, yúví rán, e sòv kigàgǎʼsòŋ keé ndzəv e kiwó kfə́ kí, e shùʼ.

¹⁴Á bèy, vin vi dzə̀ə́ vimfìʼsìn fo viŋgaʼnìn ve vinyò ve wù yiìn ne. Vèsən kù yù cáʼ a dzə̀ menyorìn meshàr me wù yiìn. Yii bèy, a dzə̀ ké kiíy ki, bo dzə̀ kìíy la mo Nyùy tavin, e mèé.»