Read Lamnso Jov 27 Bible Online

Jov 27 - Lamnso bible

Jov 27

¹Á bèy, Jov shaà fo mbìy e wun kisuŋnìn, a suúy jii:

²«Mo Nyùy woó yuv dzəə̀n shó, a wù jívír ne fo á tínén kinyo kém é nsànloŋ, mo wun woo Ŋgaà Vitaàví Vidzə̀m ndzəʼərin ne tím yém ndzəʼərín,

³mo m kù dzəə́ ŋeʼè, a Nyùy yii, a m yoyì,

⁴bo bó yòʼ dzə̀ féyì m yiì sùúy kinyo ke bi kí, a bó shuu wómé yòʼ yíi boʼtí kimboʼtì.

⁵Bó yòʼ dzə̀ féyì feyì m yiì yòŋ ji ke vèn suuyin kí dzə̀ réŋ. E meé mo m wíy kpu, bó yòʼ dzə̀ m wìy neèr suuyrú wo m gharin, e kpù shó və̀n.

⁶M ghàr ne yii yém yee réŋé, e kpù shó, a bó yòʼ dzə̀ féyì m màʼtì, kifá ki sə̀ʼ. Mo m wíy a dzə sho, bó dzə̀rkìtu yòʼ wíy a koo mo fó kinyò kímóʼ kí.

⁷«Ké ŋgaà wom vibàn kí kú a dzə moo wír wo wù méŋ Nyùy, é ké wìr wo wù sə́ kóy vèr wun ki wáa dzə moo wír wo bi.

⁸Nyùy sher dzəʼə̀m wìr wo wù méŋ wun, bo bèr ka e ŋgaàŋ? Nyùy li kiyoy kfə́, wù kfə̀n a yòy, a tiír a dzə̀ é gha?

⁹Ŋgeʼ si dzər e wun kitu, Nyùy kfə̀n dzəə yù tóŋ rə́ á?

¹⁰A dzə̀ wù dzə́ə a yu vijuŋ ve Ŋgaà Vitaàví Vidzə̀m a? A dzə̀ wù dzə́ə a toŋ e Nyùy ghán sidzə̀m a?

¹¹«M yíi yeʼéy ven mo vitaáví vé Nyùy vi dzəə̀n. M yòʼ yíi lìtì kinyo ke Ŋgaà Vitaàví Vidzə̀m kér e shiliv fo vèn.

¹²Rúrú, ven adzə̀m yèn ne vinyo vìn. Vèn kfə̀n súŋnin kiyúŋ kiyúŋ bìʼ ka?»

¹³«M lo, a naàrì kinyo ke Nyùy lèmèn ji ké wìr wo wù méŋ wun, a dzə̀ vitsə́ʼ féyì ve Ŋgaà Vitaàví Vidzə̀m fó e wír ve á nəʼsì ámóʼoó.

¹⁴A Nyùy fə̀m fò wír wo wù méŋ wun wón, e dzə̀sì, bo á kù wíy a yuyrí e shùu rər, a bó yòʼ dzə̀ wón vəə́ wìy a yikír, a kur.

¹⁵Wìr bér fo áwuné mvəm, é yàsí ku teè teèn, a bó yòʼ dzə̀ vikìy véví yù fó dìy kpú yév.

¹⁶A wìr wo wù méŋ Nyùy fə̀m bàʼtí *kisha ke mbàm ke fəvír kí é shintuʼ, e yàvtí ndzə̀y, sí wáa fum fumén,

¹⁷a wù fə̀m yàvtí e le, bo kù wíy a màʼ wír ve á yú Nyùy, áàlànjòó jav kisha kfə́ ké mbàm ke fəvír kí.

¹⁸Lav rə ye wù bomen kù dzə̀ ji tàŋrì tàŋrì moo láv taàŋgám, a dzə moo táv wo nshìy tuyin.

¹⁹Wù wàa neèm, a kù sì kàŋ bàm wo wù neem ji wun ŋgaà mbàm, yì wàa jàv, a bùʼ və ŋeémé ne, e lày.

²⁰Fane lo, yí sàsìn, e sùm wun, kù moo ndzə́v ye yí kuŋen vifá. Kinsəm ki meé vitsə́ʼə́, kí bèʼèy wun, e dù sho.

²¹Shwéri lo, wú kòʼ fó ròŋ, e nèn lì wun, a dù sho, e nèn kù fèér wun feérín fo wun laʼ.

²²Wú kàrìr wun e vitaáví ví, a bó yòʼ dzə̀ wú bàvtí, wù nèn kù a ŋaàyì, a nyeŋ ji wun sà‑áà boy fó fo a.

²³Wíri yíi a kaarí, a kwaʼ wó e wìr wo wù méŋ Nyùy kitu, a beèmè wun béemen é kirə̀ʼ ke wù dzəə̀n shó.»