Read Lamnso Jov 30 Bible Online

Jov 30 - Lamnso bible

Jov 30

¹«Yii bèy, lèn və̀n, á lò ne, a te lám e mò, a kù té wír ve dzəə̀n wónlè fo mò. Wón, a mò‑oò nyaysì atàr vév nyáysin, a bó áwune yòʼ‑oò lo mèʼ jwí sém, yé a shìy njiì wom.

²A yì‑iì dzə̀ áwune sə̀ mo é gha, aá dzə́n ne, e kòŋrí, vitaáví ví wéʼ.

³Vé‑eè dzə̀ kév, aá ghíy ghiyín, toóŋe jíŋ, jiŋkìr e woʼ, síy vifá, kfə́rí.

⁴Vé‑eè síy viŋgà, síy vav se vici, kfə́rí, túŋ gháŋ sé a kfər[26], a kù jòʼsì sé kici ke á ton, kí fò káy.

⁵Vé‑eè jùm áwune fo wíri mvəm, jum rəə́me mo á rəə̀mé shóŋ.

⁶Á nèn dù, a dzə a dzə̀ é nsər se viwoóy, a shiíy e bii sí, a shiíy e vilála.

⁷Á lo, á wàa toŋ fo vighìn moo nyám se kwaʼ, a baʼtí wún é sar se wuùndzə̀.

⁸Vinjìŋ ve wìr, a bó neèrka yòʼ dzə̀ aáwune. Wír, a vé‑eè fə̀ə́r fó kitum a dzə̀ e ŋgwàne.

⁹«M lò ne lèn, e kfə̀n ji kifá ke wón véví wáa yòv luŋ, a tinsín sho. Rúrú, m dzə̀ kifá kév ké nshéʼmé.

¹⁰Áwune nyáŋsi mo, ter wún fo mǒ wùn, á yòʼ ndzəy fó a sam mentíy e mǒ si.

¹¹Mo Nyùy màʼàn ŋgeʼ, yì réŋér mo, á kòóy ne kintóʼ ke dzə̀ á yiì kinyo ke á koŋè e mò.

¹²Fo m kì yéʼti ji vitaáví vém, vé melàa ghíʼ mo fó ghiʼín, ghíʼ bèy, sen mo fó wuù, kóʼor vitám ji á koó mo shó.

¹³Áwune sə̀tí ne dzə́ə, a bó yòʼ dzə̀ m dzəə yù fóo leʼ. Á kòóy ne kintóʼ kée laàr mo shó, a bó wìr wo wù sər áwune yòʼ dzə̀.

¹⁴Áwune kìv ne kirə́v ke kí kiŋ mo, a kar moo kinsəm, a guùtì mo ji á neer.

¹⁵Fane sùm ne mo súmen. Á yií, ghvə́m yémé ŋeémé, e lày, vikuʼùy vém ví shaá moo mbàʼ.

¹⁶«Lèn və̀n, m sí du duùn é sày, bìʼ nsòvkìtu, a bó ŋgeʼ si yòʼ biíme ji m mey shintíy.

¹⁷Ndzə sə́né, vighvə́r ví wàa shwaʼsín mo shwáʼsín, nyári wàa woʼ mo wóʼón, là rəsìn.

¹⁸Nyùy màʼ ne wó ye tavíné e mǒ wùn, m kúvsín sə́nín, e tsəə̀mé mo fó asìʼ, kù mo kám vilòŋ ve kikum mo.

¹⁹Nyùy màʼ ne mo é kishàʼàr, m kfə́n ji kibvər, e kfə̀n ji kibvə́.

²⁰«Éè Nyùy, m tóŋ e wò, a bó à yòʼ kwe, m túm, a tiy e yuv, aà kù leey mo leéyín.

²¹À bìnkìr ne, a nyarnín wòsò nyárnín, e lì vitaáví vé, e màʼ ŋgeʼ sho e mò.

²²À yiì ne, shwéri wáa feér mo, a dù sho, kinsəm ki wáa kàrìr mo, a dù sho e mbìy, a kfən sho e bàm.

²³M kì ji à sí yìi lì mo, e dù sho aàŋkfəə́ wòŋ, é m du, a dzə fo wìr dzə̀m wíy kpu, e dù a dzə.

²⁴Ábaáy, a dzə̀ à kfə̀n nàn kiwó, a dzə̀v ŋgaà gòn shó à? Wír, a ŋgeʼ si gháʼ ne, wù wáa toŋ ji á sə́ wun.

²⁵Bó m yòʼ tóŋ bìʼ wír wo wù‑uù yén ŋgeʼ à? Bó m yòʼ‑oò ló a rəə́y bìʼ aghéʼncey a?

²⁶Mò‑oò lóo shìy kinyo ke juŋ ki, kù a wìy ke bi kí. Lóo shìy rán, kù a wìy ndzə vitsə̀ʼ.

²⁷Shilív shí kù sí baári mo baárín, a fó meèmè yòʼ kfə̀n dzə̀. Shí baári, a vishiíy vé ŋgeʼ vi kù nyoorì mo nyóorin.

²⁸M kù dzə́ e nsòvkìtu, diyì, là shúy ye yì yii, é m luume, tóŋ fo vé wòŋe tínen nsaʼ ji wìr ku sə̀ mo.

²⁹Éè mò ey, wan ŋkfə wìr sì ji wan yìy à koosàʼ, a dzə ŋgaà ŋgoo màshìnə̀n shee *ostrish.

³⁰Jùv wùn sə̀nrí ne mo, e lò, e kèʼ, a yuùvì, a m koó kinjàʼ kinjàʼ, a wúné shwí mo shwiín.

³¹M kù sí kum lúŋ rú, diy a dzə̀ kpú sho, tóŋ loŋ, a dzə̀ lúŋ kpu.»