Read Lamnso Jov 31 Bible Online

Jov 31 - Lamnso bible

Jov 31

¹«Mò‑oò yì ne kilìʼ, e sə̀ntì, dzə̀ m kfə̀n ghàn é le, e bó a leéy wánlè ŋgòn e sí yímóʼó.

²Nyùy wíy lòo jàv kijav fo yuv, e tsənsí kém a dzə̀ ka? Wun woo Ŋgaà Vitaàví Vidzə̀m wíy tsənsí vitsə́ʼ vém fó ntoò yùv a dzə̀ ka?

³Bó ké wìr ve á kér liì kisaŋ ki yòʼ kù jòʼsì ŋgeʼ, ké wìr ve á buʼtì vinyo nyár à?

⁴Bó Nyùy yòʼ kù yén yii yém e dzə̀m à? Bó m yòʼ kù shóʼ kiwuú, a wù baʼ kiwó à?

⁵«A dzə̀ rú ji mò‑oò yiì ne toòmé kinyo ke kisaŋ ki, e lìy, e shèm a dzə̀ é kimboʼtì,

⁶Nyùy kù tìnén nsaʼ yem é nsànloŋ. Tínenè, é wù yén ji m dzə̀ á rú là kiloʼ.

⁷Wáa dzə ji mò‑oò bìn ne e dzəə ye bi, kìn ji mò‑oò yú a dzə̀ fó kinsiimè ke sí yémé yii, a m siíme, kìn ji mò‑oò wày kiwó e kinyò ke bi kí,

⁸ké ru kí, m wáy kifá e nsay, bo wìr wo sən kù‑úù káv. Rúrú, bo Nyùy kù‑úù bívír kifá kidzə̀m ke m wayin é nsay.

⁹«A dzə̀ ji shilív shém shí‑iì yiì ne, a baŋrí wiiy wìr, e bàŋrí, m du ŋkiy e ŋgaà wom shweèsí shùu lav,

¹⁰yeè lav wom kù a jò kibán a dzə̀ ké wìr wo sən, é vilum ámóʼó wáa shiíy sho.

¹¹Bìʼ fo kee shooy ki dzəə̀n liì kisaŋ, rúrú, kee shooy ki dzə̀ jay feyì, jay wo dzə̀ á kù wày é kibàʼ ke nsaʼ.

¹²Dzə̀ və́y, a dzə̀ wú lòo shwi, wú bìvír mo bívírín, e lòo shwi, wú laàr kéŋ yém e dzə̀m.

¹³«Wáa dzə ji kwàn wóm woo lumèn, kìn woo wiíyi‑iì yiì ne dìn jay wom, a dìn, m wáa tàʼ kinyè kév ntéŋ,

¹⁴bo Nyùy yíi bìnkìr, e kìʼ mo, é m yée le? Wù lóo tàr kinyo kém, é m biner shó ji ka?

¹⁵Bó yòʼ kù‑uù bòm Nyùy vèr áwune adzə̀m à? Wun woo Nyùy, wo wù‑uù yiìn, é bo yè wor tiím bvəm yém. Bó yòʼ kù‑uù fèr wun woo Nyùy vèr áwune adzə̀m, aàyìy vérí bvə̀m à?

¹⁶«Ghéʼncey‑iì yiì ne, a ker shií é kifa, m ŋwéy a? Mò‑oò yiì ne màʼày wiíy ŋkfə, wù wáa sòv kitú là ŋgaà sə a?

¹⁷Mò‑oò ghàn ne, a yikír vèr mòʼón, a wàn tsə̀ kpú jíŋ e mǒ ghaŋ a?

¹⁸Nyaa mò, m kù‑uù liy kém wón tsə̀ líyin, leey fo vikǐy ŋkfəə, e kèʼ fo meterí.

¹⁹«A dzə̀ ji mò‑oò yèn wír, a wù sí kpú kitan ke ndzə̀y, e yèn ghéʼncey, a wù búŋ kifá kée sətí kinshóʼ sho,

²⁰e làa yòʼ fo ndzə̀y se á baan e wúy njiì womé shó, e fo sho, é wù beeri mo,

²¹wáa dzə rú ji mò‑oò nàn kiwó kém, e kìʼ wan tsə̀ shó, kiiy ji vé wòŋe yíi a tom mo, é lav nsaʼ,

²²a kí‑iì kòóy rú bey, kóy wómé kù kìvín, e kìvín bèn, e shòʼóm, à fó nsəʼ yeé mbèʼ sho.

²³Àáy, mò‑oò fan kém laar ye Nyùy laar wíri fánen. M kù‑uù fan Nyùy ji fon wo ghaʼán.

²⁴«A dzə̀ ji mò‑oò wáy vifií a dzə̀ é kishà ke mbàm ke baar kí, yoŋ e ke á shèŋrìn ne ki ji dzə̀ fo m yoy, tiirì,

²⁵a dzə̀ ji mò‑oò yú vijuŋ ji bùʼ wom dzə̀ e nín, kìn ji kifá ki nəə e mǒ kiwo kinín,

²⁶a dzə̀ ji mò‑oò li ghán, shwéʼ shúy mo yì báné, kìn ŋwee mo wú bán, du ji rèéŋ,

²⁷wáa dzə ji vifá vìn vi‑iì bìn, e sə̀ŋrì vifií vém, e yiì, m gvə́ʼə́m, a ghvəm vifá vee shooy,

²⁸bo kù‑uù dzə̀ sá kinyo ke bi kí, ke a dzə̀ á kù tìír mo é kibàʼ ke nsaʼ, bo kù‑uù dzə̀ ji m mèŋ á ne Nyùy wo wù dzəə̀n é yuv.

²⁹«Vé‑eè ghàn ne sèn ŋgaà wom vibàn, m wáa seŋ a? Ŋgeʼ si‑iì ghàn ne nəə́ wun, m wáa sheʼrí a?

³⁰Ké ru kí, bó kinyo ke bi kí yòʼ‑oò lo fəə̀ fo mǒ shuù, a bó m yòʼ‑oò lo mvə̀ʼ shuu, e yòŋ ji á shóv ŋgaà wom vibàn.

³¹Bó wír ve á dzə́ vèr áwuneé yòʼ‑oò yiì ne yòŋ jii, wìr kì ghàn mo, m tén fó tar ŋgaàŋ.

³²Kiŋgwìy ki yòʼ‑oo wíy ne, e shìíy e kwaʼ. Shuu wóm lavi kù yii tíy e rə́ fo abeèshàa.

³³«M yòʼ‑oò lo sə̀tí jay wom moo Adam, e lìtì vinyo vém ve bi ví mo wìr lìtì kifá e vikum.

³⁴Bó m yòʼ‑oò ló a fàn kinyo ke màŋgòŋ yíi a suúy e mò. Bó m yòʼ‑oò ló a fàn nshéʼmé wo vitúm vi yíi a sheʼ mo, e bóo lìtì kinyo kém, e sətí shuu wóm, é kí gháʼ fo m fəə́ kishwáŋ.

³⁵«Éè mò, la m kù sí ri a ker wír wo wù yú kinyo kém á? M neèr ne kisúŋnìn kém, e dòn. Nyùy woo Ŋgaà Vitaàví Vidzə̀m ku fò mo binèr. M kì koŋ ji bo ŋgaà wo wù roomè mo kì sàŋ á njò yem é ŋwàʼ.

³⁶Rúrú, bo m kì yíi a beʼ e mbèʼ, é wìr dzə̀m wáa yen. Bo m kì yíi sòv e kitu moo ntáráʼ.

³⁷M kì yíi kwèʼ kinyo kidzə̀m, e fèr e Nyùy e naáy naáy, a tiy e si wo moo wan ntoʼ, e làa yòʼ a fàn kifá.

³⁸«A dzə̀ ji nsay ye m kérí‑iì bìnkìr, e koò mo, nsàn se vibvəə̀ si wáa dzə mo wìr diy kpú,

³⁹a dzə̀ ji mò‑oò kàv vifá fo fo, a yi là laʼ, e yiì, vé lìme yén ŋgeʼ, e kpùkír,

⁴⁰kí koóy bey, bo bòŋ é sáŋé búŋ, é wáa kuy vikwiíy vé njoŋ vi, é saárí búŋ, é wáa tèʼ kiv.» Kisúŋnìn ke Jov ki nen sèéy fèn.