Read Lamnso Jov 33 Bible Online

Jov 33 - Lamnso bible

Jov 33

¹«Jov, ké lèn ki, yuúrí kisúŋnìn kém kí kijuŋ. Yuúrí vinyo vidzə̀m ve m lo, a suúy vi kijuŋ.

²Rúrú, m sì kibáʼtín, a mo‑óò súŋnín lèn, a jí si rùn ne runén e mǒ shuù.

³M suuy kinyo ke m suuyì e shiliv she juŋ shi, suuy kinyo kidzə̀m, a dzə̀ ke kí kér vifií, là lóʼtín.

⁴Kù‑uù bòm Kiyoy ke Nyùy mo, a m dzə̀ shó, a dzə̀ mo Ŋgaà Vitaàví yii.

⁵A dzə̀ à tùnér kitú ké, à tùnér ri. Báʼtí kisúŋnìn ké ki, e tìím e mǒ si. Leéy kirə́ʼ kí, e tìím sho e mǒ si.

⁶M dzə̀ e Nyùy si réŋréŋ moo wò, aá kù‑uù bòm sá mo a dzə̀ e nsay si.

⁷Bo bó à yòʼ kér fó a fàn mo, é wúné wáa beemé wò, a bó m yòʼ yíi a nyàvrì e wò.

⁸«Ké ru kí, m dzə̀ a m yú kinyo ke à suuyin. M dzə̀ a m yú jí ye à suuyin, aà suuy ji

⁹à dzə̀ là shilóm, a bó à yòʼ kér a jay. À yòʼ kì á fo kinyò, a bó à yòʼ kér a kinyo ke bi kí.

¹⁰A Nyùy ku tàʼ a dzə́ə yée nə̀ʼsì wò sho, li wò ji ŋgaà və vibàn.

¹¹Wù wày á ne kibur e wò wuù, a shweʼ a mo ghán yée dzəə̀n.

¹²«À yoŋ bèy, a ke m yíi bìnèr e wò ki dzə̀ jii, Fo kin ki, à jày féyì, bó Nyùy yòʼ shaà wír à?

¹³À ghíʼ Nyùy bìʼ ka, e bó a yòŋ ji wù yòʼ binèr kinyo ke wìr msòŋ.

¹⁴Rúrú, Nyùy lo, wù sùŋnín é dzəə sí dzəə sí, yii bèy, a bó yòʼ dzə̀ wìr gwàrìr.

¹⁵Wù súŋnin e njèm, kìn é vinjeenjèm vitsə́ʼə́, a mbuùné sí súm ne wíri. Á buúne, shúu rəmè,

¹⁶wù nèn yiì, áwune kìíy vinyo, a dzə̀ sər ye wù sər áwune, a wún wóví beéme.

¹⁷A wù yii bèy, ji wun fiʼ bìnèr wir msòŋ fo wun njiìn wo bi, e kìm wun fo kiŋkoʼòrwùn,

¹⁸a dzə̀ ji wù faasì wír fo kpuú wo, kiŋsìn ŋgaàŋ fo wù kpú kpú mensəə.

¹⁹«Nyùy kfə̀n lo, wù màʼ yàsí e wìr wùn ji wun naarì ŋgaàŋ naárin. Ŋgaàŋ kù nèn a neŋ, a yu nyár ye tavíné, a vighvə́r ví sí wám wun wámén,

²⁰shúu kù a kpu wun kpuún fó viyikìr, a fə̀m dzə̀ ve wù yii koŋè, bo ví kù sí lo, a bir wun bírín.

²¹Wù lo, wù yùm, e kfə̀n ji shiŋkúnŋkun, vighvə́r ve bó á yòʼ‑oò yén vi fəə̀kír.

²²Ŋgaàŋ wàa dzə, a kìʼ a dzə̀ say, a dzəʼə̀m rəə́ kù sì a dzə̀ e kpúu wo.

²³«A vishí və́ ví bòŋ, tam nshìylav Nyùy wàa dzə ye a dzə̀ yì sə̀ wun. Nshìylav Nyùy fo see nsə̀kì si, a yì tíy e wìr wùn Nyùy nsàn, din mo a dzə̀ wìr wàa dzə tìítiy e Nyùy si.

²⁴A tàm é yì shám wun, a lon Nyùy jii, wù ku bòyìr a ŋgaàŋ fo wù du áàŋkfəə́ wòŋ. Wun yèn á ne kifá kée tin wun sho fo kpúu.

²⁵Yì lón bèy, kí fíyir ŋgaàŋ, wún vəə́ kfə́n ji wó wan wo bór, é wù wáa tuy mo wù‑uù rə́si túy e wun vinsùm.

²⁶Wù yií lóo bùnrì, é Nyùy wáa yu bunrì rə́, lóo yen vikuʼùy vé Nyùy, é wù wáa sheʼrí, bìʼ fo Nyùy siìrìn ne dzəʼə̀m rə́ é bàm, e tàŋ wun fo kpúu.

²⁷Á bèy, ŋgaàŋ yíi lòo leéy wíri, é wù wáa tunrí jii, ‹Mò‑oò jày ne, e jwìvrì kinyo kee tìítiy, a bó Nyùy yòʼ‑oò lo màʼ ŋgeʼ e mǒ kitu mo jay wom dzəə̀n.

²⁸Nyùy tìn ne kiyoy kém fo aŋkfəə́ wòŋ, a m kù yíi a dzə sho, e bonén, e yen vishiíy.›

²⁹«Rúrú, kù lim Nyùy vinyo vìn. Wù kù lim vinyo vìn e wìr akàŋ akàŋ.

³⁰Wù lim bèy ji wun fiʼ sə̀ŋ kiyoy ke ŋgaàŋ e bàm fo kí du áàŋkfəə́ wòŋ, é wù wáa dzə sho, e kfə̀n bonén, e yen vishiíy é nsay fèn.

³¹«Jov, ku fò vituʼùr ví, e yuùrí kinyo ke m suuy ki, dzə̀ʼə̀m ji nyaáŋ, é m súŋnín.

³²Aà kér kinyo kée suúy, à sùúy. Súŋnín, bìʼ fo m koŋ fó a yen ji à dzə̀ á là jay.

³³A dzə̀, a bó à yòʼ kér kinyo, à yuùrí, e dzə̀ʼə̀m ji nyaáŋ, é m yéʼéy wò vifií.»