Read Lamnso Jov 34 Bible Online

Jov 34 - Lamnso bible

Jov 34

¹Elihu ku nèn shaà fo mbìy, a suúy jii:

²«Ven vé vifií, vèn yuúrí kisúŋnìn kém kí. Ven ve á kiìn vinyo, vèn yuúrí kinyo ke m suuy ki.

³Vituʼùr ví kù yii sháv jí sé a yuurí, réŋréŋ mo shúu yùtí viyíkìr.

⁴Vèsən ku tàr kinyo kee réŋ vèsən vèsən, é ku kìíy vèsən ke kí dzəə̀n kijuŋ.

⁵Jov suuy ji wun yòʼ kì fó kinyò, a bó Nyùy yòʼ biíme ji á tínén á kinyo kfə́ é nsànloŋ.

⁶Wun suuy a dzə̀ á suuyrú, aá kù yoŋ wun a ji ŋgaà kimboʼtì, fə̀m mo wun yoʼ jày kinyo, Nyùy kù wày á ne kileémé ke biibí kí e wun wùn.

⁷Wìr dzə̀ rú shó wo a dzə̀ wù wàa dzə moo Jov a? Wír, a wù kuu Nyùy, kuu fo tèr mo wìr nò mendzə́v.

⁸Wír, a wù shém ŋgoo wìr ve á yii vinyo ve bi ví, suúsin wùn à wír ve á méŋ Nyùyi.

⁹Ŋwèrín ŋwáy ŋwayín jii, a wìr lò a yiì vinyo ve Nyùy koŋè, bo séʼ dzə̀ ka?

¹⁰«Bìʼ bey, ven ve á yii kiiy jeéyjeéy fó vinyò, vèn yuúrí kinyo kém kí. Bó yòʼ dzə̀ féyì Nyùy wàa yiì liì kisaŋ, a bó yòʼ dzə̀ Ŋgaà Vitaàví Vidzə̀m yiì kinyo kintéŋ.

¹¹Wù kù yii laʼ wír, a dzə̀ mo lim rəə́ dzəə̀n, yii, a wìr kooy kifá, a dzə̀ mo liì və dzəə̀n.

¹²Rúrú, bó Nyùy yòʼ dzə̀ wù yiì liì kisaŋ, a bó yòʼ dzə̀ Ŋgaà Vitaàví Vidzə̀m wìy bvə̀vír kinyo keé nsànloŋ.

¹³Dzə̀ la wo wù‑uù foon Nyùy vitaáví, é bo wù wáa saʼ kitú ke nsay? Wìr dzə̀ shó wo wù‑uù shoʼon wun, é bo wù wáa leéy kitú ke nsay kidzə̀m à?

¹⁴A Nyùy lò, e wày ji wun sə́ kiyoy ke wìr e bàm, kiyoy ke kí yii, é bo wìr msòŋ wáa ŋèʼ,

¹⁵bo wìr dzə̀m kù‑úù tátí, e kpù ghàn mòʼón, bo wìr msòŋ e dzə̀m kù‑úù tátí, e kfə̀n é nsay.

¹⁶«A vèn kì rú jeéyjeéy fó vinyò, vèn yuùrí kin ki. Vèn ku yuùrí jí se sí fəə́ fo mǒ shuù si.

¹⁷A dzə̀ Nyùy wàa bàn kinyo kee tínén é nsànloŋ, e kfə̀n a saʼ kitú ke nsay à? A dzə̀ wìr roòmè wun woo Ŋgaà Vitaàví á? Wun woo Ŋgaà Vitaàví, a wù dzə̀ là njò.

¹⁸Dzə̀ wun wo wù lo, wù yòŋ áàfone ji kinyè kí dzə̀ ka e vèn, a yòŋ aàtǎr laʼa ji á dzə̀ á wír ve bií.

¹⁹Nyùy yòʼ kì medzə̀jeéy fo atǎr wòŋe, a bó wù yòʼ yén ji ŋgaà mbàm shaà a ŋgaà kitàn, kù‑uù bòm wun wír vìn adzə̀m.

²⁰Á dzə̀ kév, a ndzə sə́n, laŋsìnè, kpúu tò, e gèr áwune, Nyùy wàa sə̀ʼsì wíri, a laàr, a yuyrí atǎr saʼ e kiŋkoòvì ki.

²¹«Wù kù túyti sí e wìr msǒŋ njiìn, kaʼày mo ghán rəə́ dzəə̀n.

²²Kirə́ʼ kí yòʼ dzə̀ ke a dzə̀ ambùʼtìvìnyòo lìr fó, a fə̀m dzə̀ vitsə́ʼə́, a fə̀m dzə̀ ndzə ye yì sə́n, beéme.

²³Bó yòʼ yii sháv wír ghán símóʼ sí, lemè, ghán se dzə̀ wù tìím e Nyùy si e kibàʼ ke nsaʼ.

²⁴Nyùy lo, wù bvə̀ʼtí atǎr saʼ, a bó wù yòʼ li ghán, tírí, e nèn dzə̀ʼə̀r ámóʼó aáwuné antaʼ.

²⁵Wù yii sə́ sáʼ fo atǎr saʼa vitsə́ʼə́. Wù sə́, wù fòtì áwune, bìʼ fo wù kiìn mo áwune lóvti.

²⁶Wù lo, wù màʼ ŋgeʼ aáwune bìʼ yii yév ye bií, e màʼ bèn e ŋgèŋgèr e màŋgòŋ si,

²⁷bìʼ fo vé‑eè bìnèn ndzə̀m e wun, e tèn fó a ghan e wun mbòv.

²⁸Áwune‑eè táy aghéʼncey, aá tóŋé, a Nyùy yú tóŋ yév, bìʼ fo wù kù yii yú tóŋ wìr ve á yén ŋgeʼ.

²⁹A Nyùy fə̀m dzə́, e làa yòʼ a ghay, a dzə̀ roòmè la wun? A wù bìn ndzə̀m e wíri, a dzə̀ yèn la wun? Yii bèy, kù kér wun wír, a kù kér wun kitúm,

³⁰a kiŋsìn wun woŋ fo abìnbìnteʼnsə́mé wáa saʼ, kiŋsìn fo á wáa neèr kitám ji wíri wáa lì sho.

³¹«Jov, à tuùné ne shuu wó e Nyùy à? À kàʼ ne ji bó à yòʼ dzəə́ wìy jay kinyo à?

³²Ku lòn ké ji Nyùy din á jay wo à jayin. Wù dinè, áà ku kàʼ ji bó à yòʼ dzəə́ wìy mùm.

³³A dzə̀ Nyùy laàmé wò mo à taʼà e le, aà tén ne fó a jùmrì dzə́ə rə? Kù kér fó shoʼ wò ke à shoʼon, bó yòʼ dzə̀ shòʼ mo gheéy. Bìʼ bey, ku sùúy ke à kiìn kí.

³⁴«Lóo dzə wír ve á kiìn jeéyjeéy fó vinyò, aàfií ve á yuúri kinyo kémé, á kù sùúy e mò jii,

³⁵‹Bó Jov yòʼ suuy kinyo ke kí kér mvəʼ, a bó jí sə́ sí yòʼ kér vifií.›

³⁶La á kù sí ri bònen tàr kinyo ke Jov à? Wù binèr kfə́ kinyo moo wír ve á méŋ Nyùy.

³⁷Jov sə́ kóy wùn Nyùy, dzəsì jay və shó. Wù tiim e věr si, wù wàa te lám e Nyùy, a rəsí, a rèr vinyo, a toy Nyùy sho.»