Read Lamnso Jov 35 Bible Online

Jov 35 - Lamnso bible

Jov 35

¹Elihu ku shaà fo mbìy, a suúy jii:

²«Jov, à yén ji kinyo ke à suuy ki dzə̀ réŋ á? À suuy ké ji à yòʼ kér njò e Nyùy si.

³À kfən lò, a bivír lám jii, ‹Aà sà jày kinyo e Nyùy, kí sə̀ʼsì wun e gha á? Aà sà baamè jay, bo séʼ wò dzə̀ ka á?›

⁴Màʼtìi, m lo, e yeʼéy wò, e yeʼéy vèn à ŋkar sé sìn si.

⁵«Màʼ síi é yuv, áà yén. Rúrú, áà yén mbàʼ, mbàʼ a yì dzə̀ é yuv kwaʼda.

⁶Aà jày kinyo, bo kee shooy ki kùm Nyùy e gha? A vinyo vé ve bi ví dzə̀sì wún, kee shooy ki yiì ka e Nyùy?

⁷Aà yii vinyo vee tìítiy, bo à fó ka e wun? Kifá feyì ke dzə̀ wù sə̀ fo wò ki dzə̀ ka?

⁸Liì wò kisaŋ kù koó a dzə̀ wír moo wò, a yii yé ye réŋé kù sə́ a dzə̀ wír ve səné.

⁹«Á lóo tay wíri, á wàa toŋ bìʼ ŋgeʼ se á yén sinín sinín, á tóŋ ji Nyùy sə́ áwune fo antaví wo.

¹⁰Yii bèy, wìr yòʼ kfə̀n dzə́r ji Nyùy woo Ŋgaà Mbóm wom bèé? Wun woo Nyùy wo ŋgeʼ si nəə wír, wù wày luŋ e ŋgaàŋ shuù, wù wàa yòv.

¹¹Dzə̀ wun wo wù yéʼey vèsən, aá kiiy vinyo, shaa nyám se kwaʼ, yii, a vèsən fiir, shaa menə́n me mè féŋ e yuv.

¹²Áwune vísə, aá tóŋé, a bó Nyùy yòʼ yú tóŋ yév, bìʼ fo á ŋaʼà, buʼtì vinyo.

¹³Rúrú, Nyùy yòʼ yíi a yuurí tóŋ yee kisáŋ, a bó yòʼ dzə̀ Ŋgaà Vitaàví Vidzə̀m wàa lì kee shooy ji kinyo.

¹⁴«Jov, fə̀m mo à suuy ji bó à yòʼ yén wun, kinyo ké ki kù dzə̀ a dzə̀ e wun kiwo, aà kù kér fó a yuurí a dzə̀ wun.

¹⁵Aà kfə̀n suuy sa jii, ‹Nyùy yòʼ maʼ a ŋgeʼ e wíri ji wun shwiiy a kilòŋ, a bó wù yòʼ leey kinyo ke wíri buʼtì.›

¹⁶Jov, à mvəʼ ké shuu, fəər a dzə̀ kisúŋnìn kee là mvə́m, aà kù rə́si rer vinyo, a bó ví yòʼ kér vifií.»