Read Lamnso Jov 36 Bible Online

Jov 36 - Lamnso bible

Jov 36

¹Elihu kfən siì shaà fo mbìy, a suŋnín, a suúy jii:

²«Lò ji weè wòsò, é m din e wò, e dìn ji vinyo vi dzə̀ə́ ve a kì dzə̀ m wàa suúy mo suuy Nyùy.

³M yíi lì vifií a dzə̀ fó virə̀ʼ jeéy jeéy, a binsí ji Ŋgaà Mbóm wom kù yii yii a vinyo və́ réŋ.

⁴Rúrú, jí sém sí yòʼ dzə̀ sé kimboʼtì si, a wìr wo wù fiirin é ŋàŋ sì vèn wun.

⁵«Yén ri, Nyùy tàv é ŋàŋ, yii bèy, a wù yòʼ yii ŋwáy wír. Wù tàv é ŋàŋ, a kiíy ye wù kiiy jeéyjeéy fó vinyòo shaà vitaáví.

⁶Wù yòʼ yii darìr dzəʼə̀m wìr ve á méŋ wun. Yii bèy, wù kù yii tínen kinyo ke wìr ve á nyavrì sho a dzə̀ é nsànloŋ.

⁷Wù yòʼ yii rə́ʼ sí rə́ fo wír ve á yúnin wuné wùn, wù lo, wù kòʼór áwune kóʼórín é kàvàʼ moo afon, e kù dzə̀ʼə̀r áwune fó bèy, á wàa dzə fo ŋkuuŋkùŋ,

⁸Á lóo yen, aá wáy ne wíri é sháŋ, e yiì, ŋgeʼ si dzə́r aáwuné wùn,

⁹bo dzə̀ ji Nyùy sí din áwune vinyo ve á jayin, vinyo ve á koʼorin wún, a bùʼtì.

¹⁰Nyùy lo, wù mvə̀ʼtì vituʼùr vév ji á yuúrí á kinyo ke wun suuyì, e kàntì áwune ji á bin á ndzə̀m é kinyò ke bi kí.

¹¹Aáwune yùnín, a ghvəm wun, bo áwune wíy a màysì dzəʼə̀m yév, aá bún bunén é vikùʼùy, a beʼrí viyá, a neŋ neŋén é vijùŋ.

¹²Yii bèy, aáwune lò, e làa yòʼ a yunín, bo á kù wíy kpu kpú mensəə, e kpu, a bó á yòʼ kì jeéyjeéy fó vinyò.

¹³«Wír ve á yòʼ yú fo Nyùyi kù biy kév dòʼshwiíy bíyin é wùn. A Nyùy fə̀m kùr áwune é le, bo bó yòʼ dzə̀ á wàa toŋ ji wù sə́ áwune.

¹⁴Á lo, á kù kpù, aá dzə̀ə́ abór, a dzəʼə̀m yéví kú ne rèŋ, e mày e joòně kineŋ.[27]

¹⁵Yii bèy, a Nyùy li ŋgeʼ, sə́ vé ŋgeʼe shó səə́n. Wù biíme ji ŋgeʼ si koóy áwune ji á fiʼ yuùrí kinyo ke wun naarì.

¹⁶«Kù dzə̀ sá mo Nyùy‑iì sə̀ŋrìn wò, à bóy fó nəə́ e ŋgeʼ. Wù‑uù tìír wò e kirə̀ʼ ke bó kifá ki yòʼ jívir wò, aà fómer kitú ké e vifá ve yi ve ntay vi.

¹⁷Ké lèn ki, nsaʼ wìr ve á méŋ Nyùy koò ne wò, Nyùy tìnén ne ji à kù kér fóo yen ŋgeʼ, a bó yòʼ dzə̀ à bàʼàr.

¹⁸Á yen fo dòʼshwiíy yii, áà wáa sə kóy vèn Nyùy. Lá à yòʼ a kwàʼ ji dzə̀ à tìn kitú ké, e kòyàr.

¹⁹Bó yòʼ dzə̀ tóŋ ye à tóŋée fə̀ə́r wò fo ŋgeʼ. Bó yòʼ dzə̀ vitaáví vé vi kìŋsìn wò.

²⁰Lá à yòʼ a dìy ji vitsə́ʼ ví wiy. Dzə̀ ghán se vitúm vi wíy sàsìn, e taʼrí, e lày.

²¹Á yen, ku bìn ndzə̀m e kinyo ke bi kí, bìʼ fo m yén ji à sí shóʼ a dzə̀ kee shoon, e shaà ŋgeʼ.»

²²«Rúrú, Nyùy dzə̀ e gháʼán, a móo fèr yòʼ dzə̀. Ŋgaà yèʼéy wo dzə̀ wù dzə̀v kiwó wùn wun dzə̀ la?

²³Wìr wo wù tirin wun ji á mo wù wáa yiì dzə̀ la? A wìr wo dzə̀ wù roòmè wun ji wù jày ne dzə̀ la?

²⁴Kú a kuumé, a burí lim se wù lìmèn sí, lim si, a wíri‑iì sí yov e lùŋ, suyrì wun sho.

²⁵Wìr msòŋ e dzə̀m yèn ne lim sìn, yii bèy, aá kù dzəə́ yén kwaʼda kwaʼda.[28]

²⁶Rúrú, Nyùy shaà vitaáví, a bó yòʼ dzə̀ vèsən kìíy wun, e dù màysì, a bó yòʼ dzə̀ vèsən kìíy mo wù shiiyin ne, e mèé.

²⁷«Wù lo, wù sə̀ŋ ŋweʼ, e kòʼ shó e yuv, e siìr, yí kfə̀n ji wuú,

²⁸yúví wàa səʼə́r wuú rən, yí wàa lo wíri, a lo nyanyày.

²⁹A dzə̀ wìr kìíy mo Nyùy yii saŋrì mbàʼ, kìn mo kishèv kee fo wù dzə́ ki ŋwaŋkìrì a?

³⁰Yén ri, wù yii, a kishèv ki ŋwaŋkìr, kaári fo wù dzə́, kfə̀n yii, a sár rìbà ndzə̀ví sə́n kfə́ ji cùm.

³¹Á mo Nyùy kér wír veé kitu ke nsay, fó áwune vifá ve yi nyanyày.

³²Wù lo, wù koò kishèv e wóo, e tùm ji kí dù, e tò fo wù taʼà.

³³Kí lóo baykír, kinsəm ki wàa wìy, lóo baykír, nyám si kìíy sá ji kí waà wiyì.»[29]