Read Lamnso Jov 37 Bible Online

Jov 37 - Lamnso bible

Jov 37

¹M gwarìr kinyo kìn, tímé wàa buʼ mo búʼún, a buʼ, a dzə mo yí‑íì túm tumén.

²Vèn ku yuùrí mo jì Nyùy wámkir moo kishèv. Vèn yuúrí mo yì kokìrì.

³Nyùy lo, wù tsə̀nsí kishèv, kí wàa ŋwàŋkìr, a səy fo yuv, a bàvkìr buú se ndzə sidzə̀m.

⁴Kí bavkìrì, jì rə wàa nyàmkìr, a wamkír e mvəm wó. Jì rə súŋninè, kishèv ki wàa ŋwàŋkìr, a dù e virə̀ʼ.

⁵Jì rə lo, yì wàmkír é dzəə ye tavín, wù wàa yiì viŋgaʼnìn ve vinyò e dzəə ye bó yòʼ dzə̀ vèsən kìíy.

⁶Wù lo, wù fò sáʼ mbàʼŋkfəə́mé wàa fə̀fə̀, a wur e njà mentiy, e fò sáʼ ji kiŋkò ke wuu kí wáa keèsì.

⁷Wù nèn tìír lim ye wíri lim e sum, wìr msòŋ e dzə̀m meèmè, a gwàrìr mo lím Nyùyi dzəə̀n.

⁸Nyám se kwaʼ si lìr sá e mbvə̀ʼ si, e kù gòʼ, a neŋnín aáwuné virə̀ʼ vé kilìr.

⁹Kinsəm ki wàa kàr, a koʼ fo tsən, kidzə́r kí wàa səy fo mbìv wòŋ yee fó kùy.

¹⁰Nyùy yoy yòyìn, kiyoy kfə́ kí fə̀ə́r kintòn, yoyì, ndzə́v sí wùr é kiyuy.

¹¹Nyùy lo, wù yiì, wuú rùn é mbàʼ se sənér sí, e tàʼár kishèv, kí wàa njàʼàm e mvə̀m mbàʼ.

¹²Wù wàa dànèr mbàʼ, sí wàa kar, a bìnkìr, a wù yii bèy ji sí kú a yiì a kinyo ke wun taʼà, virə́ʼ vidzə̀m mo kitú ke nsay ki duùn, e jòʼsì.

¹³Nyùy tsə́nsi wuú, yí wàa lo e kitu ke nsay. Wù lo, wù tsə̀nsí yímóʼó ji wun din á koŋ rə́ e wíri, lo, wù yiì, yímóʼó wàa keèsì ji wun maʼ á ŋgeʼ e wíri, a kù kì wun mo wù yii vinyo vìn.

¹⁴Éè Jov, ku yuùrí kin ki. Dzə̀ʼə̀m ji nyaáŋ, e kwàʼtì lim se ghaʼtín se Nyùy yiìn sí.

¹⁵À kì mo Nyùy lo, wù ghàn, e bó a dànèr mbàʼ, a yiì, kishèv ki wàa njàʼàm fo mvə̀m mbàʼ a?

¹⁶À kì mo mbàʼ lo, yì ghàn, e bóo sàŋrì wún é yuv á? Kù dzə̀ viŋgaʼnìn ve lìm ve Nyùy, a wù kér vifií, e dù màysì.

¹⁷Shwér woó tsəné lóo shaà, virə́ʼ ví wàa riʼ riʼín, à wàa fiʼsín fiʼsín é mvə̀m vikùm.

¹⁸A dzə̀ à sə̀ Nyùy, e sàŋrì yúv, wú vèmèn, a shwinín kisha ke á shèŋrìn, kí wáa bàvkìr a?[30]

¹⁹Jov, yiì ri, é vèr kiíy kinyo ke dzə̀ vèr sùúy e Nyùy. Vèr dzə̀ kér e dzə̀ne, a bó yòʼ dzə̀ vèr wàa ker kinyo kée fèr.

²⁰A dzə̀ rú, m lò a dìy ji bo á kì yiì, vèr Nyùy súŋnín a? Bo dzə̀ ji wìr jìŋ fo fo e le, e bó a tàʼ ji Nyùy laar wun?

²¹Lèn, a shwéri fee mbàʼ fo yuv, ráne wàa njàʼkìr fo fo, a to e wìr si, a bó yòʼ dzə̀ wìr kfə̀n yù fó a leéy yúv.

²²Nyùy sə́y fó taa e viwìr vi, njaʼkìr moo *kisha ke mbàm ke baar kí, a vikuʼùy və́ ví dzə̀ viwíy, a wìr lèéy, shúu kù mà wun.

²³A dzə̀ Ŋgaà Vitaàví Vidzə̀m, bo bó yòʼ dzə̀ vèsən mèʼ wun, vitaáví və́ ví kùʼ e ŋàŋ, a wù tínen nsaʼ a kù dzə̀ é nsànloŋ, a bó wù yòʼ yii nyavrì e wíri.

²⁴Á kinyo ke kí yiìn, é bo wìr msòŋ e dzə̀m wáa ghvəm, a fàn wun. Lóo dzə wír ve á yén a dzə̀ vév vee vitú ji afií, bo Nyùy yòʼ yén áwune.