Read Lamnso Jov 39 Bible Online

Jov 39 - Lamnso bible

Jov 39

¹À kì ghán se meshùy mè yii dzə́ə a? Njà‑áa ghán ne a dzəə́, aà yéné a?

²A dzə̀ à kìíy ŋwee se nyám sìn si juur bvəm, mo à kì ghán se sí yii dzəə́kirì a?

³Sí lo, sí nyàʼtí fó nsay, e bó a dzəə́ wán fo wù túm tumén, sí nèn kù dzə̀ə́ kiŋgoòy kév bey.

⁴Wón véví lo, á wàa kuy e kwaʼ, a kuy, a ker vitaáví, kúykir, maʼtì viyìy, la á yòʼ dzəə wìy kfə̀n é bàm.

⁵Yì‑iì yiì la, é bo kimbèʼbìy keé kwaʼ ki wáa ghan a dzə̀ é kwaʼ? Yì‑iì bvə̀tì la sháŋ və, é bo kí wáa ghan, a dù duùn?

⁶M fò ne kirə́ʼ ké woʼ ji láʼ rə́, e fò nsay ŋgaŋ ji kirə́ʼ kfə́ ké dzə.

⁷Kiyor ke melaà ki lóo koʼ fo mvə̀mlaʼ, kí wàa sheʼ kfə́ sheʼén. Wìr wo wù danèr nyám si, lóo wamnín, la kí yòʼ fə̀m a gwàrìr.

⁸Kí kù rə́si a dzə̀ é vitu ve aŋkoŋ, ghán, taʼ vikwiíy ve shoòŋ vé a yi.

⁹A dzə̀ nyar, wù wàa lìm fo wò à? A dzə̀ wù yù fó a shiíy e wò kibìn ké nyàm à?

¹⁰A dzə̀ nyar, à kúr, wù wàa sə̀ŋ kisoó à? A dzə̀ wù wàa yunín wò, a kom súm wó à?

¹¹À yíi a yòy, a tiír a dzə̀ é wùn wó ji bìʼ fo wù tavin é ŋàŋ a? À yíi shwèy lim ye yí gháʼ wò, e fo a dzə̀ shó à?

¹²À yíi a tiír rú vifií é wùn wó ji wù yíi a beʼ sáŋ ye à tinen fó kwaʼ, e kfə̀n a beʼ ye à buʼun é riimé a?

¹³Màshìnə̀n shee *ostrish lo, wù wàa dzə̀vtì vav e viwìr vi, yii bèy, a bó yòʼ dzə̀ á fìʼsìn vav sə́, kìn fəə e sé kilìmbìy si.

¹⁴Shí yii maʼ wúm, shí sə̀tí é nsay, yí wàa riʼsín e mvə̀m kibvə̀r,

¹⁵a bó shí yòʼ kiiy ji a dzə̀ kifá ki nyèŋ, e bvə̀ʼə́y, nyàm kwaʼ kòʼóy shó, yí bvə̀ʼkír.

¹⁶Shí lo, shí wàa nyàvrì e wóné, kù mo bó yòʼ‑oò kày wun, a shí yòʼ fə̀m cí fo ŋgeʼ sə́ sí lay kisáŋ.

¹⁷Kù‑uù ŋwèy mo woo Nyùy vifií fó fo, e yiì, la shí yòʼ dzə́ə a ker ghay wó a kiíy jeéyjeéy fó kinyò.

¹⁸Yii bèy, shí ŋáʼay, lóo leʼ, shí tàtí nyamŋkoʼ wùn à ŋgaà koʼ, a sheʼ sheʼén é kileʼ.

¹⁹Jov, nyàmŋkoʼ kér vitaáví ben, a yì‑iì fò wò à? Virəv vee nyàmŋkoʼ ndzə̀m ví yii gbu bèn, a yì‑iì fò wò à?

²⁰Yì‑iì yiì wò, é bo nyàmŋkoʼ wáa liy moo ŋguùmé a? Nyàmŋkoʼ fér yúy, wúné wàa beemé wíri beemén.

²¹Yì lo, yì wàa tuŋ nsay e wuú, a dìn vitaáví ve yì kérí, a nəə́ e shùu rər wùn à vitaáví ví vidzə̀m.

²²Yì shéʼ kfə́ kimbemèr shéʼén, mvəʼ sí, e làa yòʼ a yen kifá. A wìr kìʼ wun e nyùy rə̀r, bo bó yòʼ dzə̀ yì bìn ndzə̀m.

²³Ŋkòʼ mvə̀n ye ŋgaà koʼ bárí lo, yì wàa shuʼ fo bàm, kǒŋ rərí wàa bàvkìr, à yé njàʼa shó.

²⁴Yì ŋáʼay kileʼ, yì wàa laané virə́ʼ laanén, yú sóŋ rər, la yì yòʼ kfə̀n yù fóo tiím.

²⁵Á tóŋ sóŋ rər, yì shèŋrì shéŋrin ji eèheé, yì lo, yì nèn kù a yu rə́r é mensə, a yì dzə̀ə́ kwaʼda, a yu kiléŋléŋ mo amfòómeé wám shúu rər.

²⁶Jov, yì‑iì yèʼéy wò kilùŋ mo kí wáa feŋ e ntoò yùv, a sàŋrì vav sə́, a feŋ, a səy e tsən a?

²⁷Yì‑iì fò wò sáʼ ji lùŋ wo wiy wáa feŋ, a koʼ, a bàʼrì láʼ rə́ é vitu ve virùmèn à?

²⁸Lùŋ wo wiy yii baʼrì láʼ rə́ a dzə̀ é nsàn se vilan seé ntoò gwan, baʼrì e kitu ke kilan ke shovtín kí, kí wàa kìŋsìn wun.

²⁹Lóo dzə fo, wù wàa shweʼ kifá ke wù‑úù koó, sí rəə́ wàa yen virə́ʼ, a dù kwaʼda.

³⁰Wón vəə́ lo, á wàa no mensə́, kifá ki kpú fèé, bo wù kù‑úù wáa dzə fo.