Read Lamnso Jov 4 Bible Online

Jov 4 - Lamnso bible

Jov 4

¹Á bèy, Elifas woo wír woó Teman nèn bìnèr e Jov jii:

²«A m lò, a tàʼ ji wòsò dzəmnin, é kí tén rú wò a? Yii bèy, a dzə̀ sə̀tí la shuu fó a suŋnín.

³Ké ru kí, à tìr ne wír anín. À tàvír ne melív me alàmbòv.

⁴Jí sé si siìr ne wír wo wù jáy dzə́ə, wù wáa ghan e Nyùy mbòv. À tìír ne alàmbòv aáwuné shwin.

⁵Kí kòóy ne wò lèn, à wáa yaŋyáŋ. Ŋgeʼ si gbú lèn e wò kitu, à wéʼ.

⁶A wìr ghvə́m Nyùy, la vifií və́ ví yòʼ kù a tiy a dzə̀ é wùn wó à? A wìr tíy wùn Nyùy, la wù yòʼ kù tìír a dzə̀ wun fo mbìy à?

⁷Kuúmé ó, wìr woo là njò wo Nyùy‑iì yiìn ne yiì, wù nəə́ é ŋgeʼ dzə̀ la? Wìr woo là nsem wo Nyùy‑iì yiìn ne laàr dzə̀ la?

⁸Ke m yenen kí dzə̀ jii, wìr lim kinyo ke bi kí, wáy ŋgoòy melaà, bo wù kù‑úù káv a dzə̀ kíwun.

⁹Nyùy yoy yòyìn aáwuné wùn, bo á kpùkír ne, dòʼshwíiy və ŋáʼáy, bo wù laar áwune láarin.

¹⁰Áwune dzə̀ moo bvərə̀ʼ, bvərə̀ʼ wo wù tóŋ, nyamkìrì, á wàa fàn fànèn, a Nyùy lo, wù kòtì sóŋ sə́,

¹¹wù kpù jíŋ, wón vəə́ tàʼrí, a jan janén.

¹²«Wìr‑iì nyàʼtí, e sə̀mrì kinyo e mò, wù sə́mrí, kí tó e mǒ kitùʼùr.

¹³Vinjeenjèm vi wíy e mǒ si vitsə́ʼə́, a dzə̀ é ghan se wíri yii buúne, tónenè,

¹⁴e yiì, wúné wáa beemé mo, m wáa yàʼ, yaʼà, a vighvə́r ví shwáʼsin fo mǒ wùn.

¹⁵Kifá ki wíy é njà shwer, e shaà e mǒ si ji ghaàr, nə́ŋ si wáa tiynín fo mǒ wùn tìítiy.

¹⁶Kí shaá, e tìím, e làa yòʼ a wàʼ. Yii bèy, la m yòʼ kìíy ji sà dzə̀ ka á? Kifá ki‑iì tíy e mǒ si, kér mbom, a virə́ʼ ví dzə̀ ji nyoòŋ. M yú mo jì sàsìn, e wìy, e dzə̀r e mò jii,

¹⁷‹A dzə̀ wìr msòŋ wàa dzə là jay e Nyùy si à?[8] A dzə̀ wù wàa tiy ji wun dzə̀ kiránén e ŋgaà mbóm və́ si a?[9]

¹⁸Mo Nyùy lo, wù fə̀ə́r shilív fo vé lìm vəə́ wùn, lo, wù yèn jay e kinyò ke nsheèlav sə́ sí yii,

¹⁹bo ké wìr msòŋ wo Nyùy bomen a dzə̀ e nsay ki dzə̀ é le? Wír a dzə̀ kifá kisáŋ, kibvər fo kibvə̀r, aá bvə́ʼ fo tèr moo mbvə̀njàŋ.

²⁰Wìr lo, wù wàa dzə e tin kijàvndzə, yì wàa ji, a kpúu yáv ne, la wìr yòʼ a gwàrìr.

²¹Wù kpú, bo wù màʼtì ne bùʼ wo wù kérí, a kpu bèy, a bó wù yoʼ fə̀m kìíy dzə́ə ye Nyùy yii yii vinyo və́ shó.› »