Read Lamnso Jov 40 Bible Online

Jov 40 - Lamnso bible

Jov 40

¹NYÙY TÀR nèn kù shaà fo mbìy, a suŋnín e Jov, a suúy jii:

²«A dzə̀ wír wo wù biʼ mbìʼ wùn Ŋgaà Vitaàví Vidzə̀m, wù kfə̀n naàrì wun kinyo à? Wò wo à say Nyùy, bìnèr ri lèn.

³«Á bèy, Jov wáa bìnèr kinyo ke NYÙY TÀR, a suúy jii,

⁴‹Nyaa mò, m koó e gha? A dzə̀ m sùúy kém ji ka? M kù tsə̀m ne a dzə̀ kiwó e shuù.

⁵M kì sùŋnín ne e ŋàŋ, a bó m yòʼ kfə̀n‑éè wáa suŋnín.› »

⁶Á bèy, NYÙY TÀR nèn a suŋnín e Jov fo mvə̀m kinsəm, a suúy jii:

⁷«Kúr ndzə̀y sí, é sí táv moo lumèn. M yíi a dzətí vinyo e wò, áà wáa naàrì.

⁸À yíi a yòŋ rú ji m tìnén kinyo ké kintéŋ à? À yíi a yòŋ jay ji wóom ji à fíʼ tunér kitú ké à?

⁹Jov, à kér vitaáví moo mo a? A dzə̀ jì yè wàmkír é njà kishèv moo yéem a?

¹⁰A dzə̀ bey, à dìn ó ji à kér viwìr, kér vikuʼùy. Dìn ó ji à dzə̀ ceʼ wìr, aá ghvə́m wò.

¹¹Ku lèéy vé kiŋkoʼòrwùné, e shìʼír aáwuné wùn, e sèn áwune.

¹²Ku lèéy wir dzə̀m wo wù kóʼor wún, e sèn ŋgaàŋ, leéy, e bvə̀ʼə́y wír ve á méŋ moó é kileèmè.

¹³Tátí áwune adzə̀m, e dzəə̀mè e sày, e fìn áwune é sháŋ wo dzəə̀n woŋ aŋkfə.

¹⁴À yii bèy, bo m yíi a biimé wò, a binsí ji a dzə̀ à kù a yòv nsiì, bìʼ vitaáví vé.

¹⁵«Leéy ó kimà ké nyàm kee Behemot[33] ki, fèr mo wun, mo wo m bomen sá wò. A m fèr, yì wáa yi vikwiíy moo mbòŋ.

¹⁶Ku lèéy, shintáy shi dzə̀ fó fo shirúnén, a vitaáví ví din e wùn wó.

¹⁷Yì lo, yì nàsì kún və́, wú wàa tav ji ŋkǒŋ moo kicí ké *sidar, a gháŋ rəə́ yúŋsín jáv e vighvər.

¹⁸Vighvə́r və́ ví tàvkír moo kisha kee *brons, vikoy və́ ví wáa dzə moo kisha kee kilúŋgaŋ.

¹⁹«Nyàm rə̀n tíy mbìy fo vifa ve bomén ví vidzə̀m, a dzə̀ kù laàr ŋgaà mbóm və wun.

²⁰Rúrú, viyíkìr və́ ví kù yii lo a dzə̀ fó agwan, a dzə̀ fó, fo nyám se kwaʼ si kù yii léʼninè.[34]

²¹Nyàm rə̀n lo, yì wàa neŋ e mvə̀m vicì vé njoŋ vi, a neŋ e mvə̀m ŋkiʼ, ǎ vikwiíy ve ví kúy e kishàʼshaʼ vi.

²²Yì lóo neŋ, vicí vé njoŋ vi wàa fo wun kindzə̀ə́ndzəm, vicí ve ví kúy e ghaa ndzəv ví wàa kìŋ sa wun.

²³A dzə̀ ndzə́ví rùn, a tsəynín, a bó yòʼ dzə̀ kí wàa jivír wun. Yì yòʼ shám kinyo, fə̀m mo ndzə́ví rún, mee e wun shuù.

²⁴A dzə̀ wìr sùm sí rə́, e koò á? A dzə̀ wìr wàa màʼ lóv ji yí toʼ yúy fo fo, é bo wù koó á?»