Read Lamnso Jov 5 Bible Online

Jov 5 - Lamnso bible

Jov 5

¹Búʼ rə́ə lèn, wìr sà‑áà wáa dzə sho wo dzə̀ wù sə̀ wò a? Nshìylav Nyùy yìmòʼ dzə̀ ye à yoy, tiir e wùn wó à?

²Rúrú, a kiyúŋ kí shwiiy kilòŋ, bo a dzə̀ dòʼshwiíy yùyrí wun, njìʼ wáa yu nyár wìr, bo yí kù‑úù yúyrí wun.

³M yèn ne kiyúŋ, a kí méŋ Nyùy kù tsəətìn tsəə̀tìn e bùʼ, yii bèy, m sásín kém, e mèŋ kéŋ rə́ rən méŋén.

⁴Dzəʼə̀m won vəə́ lév a dzə̀ é kitu ke koŋ, áwune tiim e kibàʼ ke nsaʼ, bo á kù gbu nsaʼ, a wìr wóo bòyìr áwune yòʼ dzə̀.

⁵Wù lim kifá, vé jiŋe ndzə̀ə́y ndzəəyín, e ndzə̀ə́y à ke kí kúy e mvə̀m njoŋ si kí shó, vé mesə́ŋé faàsì kéŋ rə́.

⁶Ŋgeʼ yòʼ yii fəə́ a dzə̀ fó nsay, a bó nyári yòʼ yii dzəm a dzə̀ fó kibvə̀r.

⁷Rúrú, á yii dzəə wír, yii rəə́ kù wìy a dzə̀ e ŋgeʼ si, réŋréŋ mo və́yí lóo shwi, mesásáy mè wàa koʼ e yuv.

⁸A kì dzə̀ mo, bo m kì yíi a mbaà a dzə̀ Nyùy, a way kinyo kém kidzə̀m a dzə̀ e wun kiwo.

⁹Wù yii viŋgaʼnìn ve vinyò, a bó yòʼ dzə̀ wìr kìíy, vinyo là mfìʼ, a wìr leey, shúu mà wun.

¹⁰Wù lo, wù tsə̀nsí wuú, yí wàa lo e kitu ke nsay. Yí lóo lo, ndzə́ví wàa borír súm sí.

¹¹Wù yii kóʼor alàghay, kaayì, kfə̀n kiŋsìn wír ve á diy lèn.

¹²Wù lo, wù bvə̀ə́r antaŋ ve afií bá, a bó yòʼ dzə̀, á bá ntaŋ, wù fəə̀sín é kinyò.

¹³Wù koó afií, a kù dzə̀ é kitam ke koʼorin áwune, bvəər menàŋ mev, a mè lay kisáŋ.

¹⁴Ndzə lo, yì sə̀n áwune e shùy, á wàa ghaà virə́ʼ e ntìntìn shùy, kù mo sì vitsə́ʼə́.

¹⁵Nyùy ku nèn fə̀ə́r vé kitàne fo wír vìné menàŋ, aá luŋ, e bòy fo antaví wo.

¹⁶Á bèy, é vé ŋgeʼe wáa yòy, a tiír a dzə̀ e Nyùy wùn, a wù sə́tí ne shúu wìr ve bií, fo á koó vé kitàne, e kfə̀r.

¹⁷Rúrú, bòŋ ké wìr wo Nyùy naarì jay və. Nyùy woo Ŋgaà Vitaàví Vidzə̀m lóo sə̀r wò, lá à yòʼ a ŋway ŋwayín.

¹⁸Nyùy lémer wír, wù kfə̀n kùr kileémé, dzəv, kív kirə́ʼ, wù kfə̀n kùv.

¹⁹Nyùy yíi a kìŋsìn wò fo ŋgeʼ akàŋ akàŋ, a sí fə̀m gìm wò e le, bo bó kifá ki yòʼ yíi sə̀ʼ wò.

²⁰Jìŋ koó, é wù táŋ wò fo kpúu. Rə́r sí lóo màʼ, é wù kiŋsin wò fo á gwar.

²¹Nyùy wíy kìŋsìn wò fo wír ve á tóy vinyo e wò bàm kisáŋe. Wù wíy kìŋsìn, á lóo laàr wíri, é la à yòʼ a fàn.

²²Mentaàshì mè gháʼá, kìn wiy melaà, áà wáa sheʼ ké shéʼén, a bó à yòʼ wíy a fàn sa nyám se bi sí.

²³Súm se à lim si yòʼ wíy a ker vilán, a bó nyám se kwaʼ si yòʼ kfə̀n wíy a taamé wò ji sí koó.

²⁴Shilív shé shi yòʼ wíy a buʼ bìʼ kinyo kímóʼ kí. À wíy a ker nyaáŋ e wò kibàn ke à dzə́ sho. À lóo leéy kéŋ yé, áà yén, a bó kifá ki yoʼ sə̀ʼ.

²⁵Rám yée wíy a dzə nyanyày, é wón vée wáa dzə moo viŋgà ve ví teʼ virə́ʼ vidzə̀m.

²⁶Mo saárí yii bíy, é bo á wáa tin, bo à kù wíy dzə̀n bèn, e koŋrí, e bóo kpu.

²⁷Rúrú, vèr dzə̀, aá tár kinyo kìn, e yèn ji kí dzə̀ rú. Yuúrí ri, e lèm e wò vifii.