Read Lamnso Jov 9 Bible Online

Jov 9 - Lamnso bible

Jov 9

¹Jov nèn a bìnèr, a suúy jii:

²«Rúrú, m kì ji á mo kí waà yii dzə́. Yii bèy, a dzə̀ wìr ghàn é le, e bó a dzə là jay e Nyùy si?

³A wìr koŋ a bìʼ mbìʼ wùn Nyùy, a dzə̀ Nyùy dzə̀r kinyo nsə̀kì, a bó yòʼ dzə̀ wìr bìnèr kimòʼón.

⁴Nyùy fìír feyì, a wù kfə̀n tàv é ŋàŋ. Yì‑iì tàv ne la kitú wùn wun, kí lím?

⁵Kilòŋ kí shwiiy Nyùy, wù bìnèr agwan tsə̀ə́tsəŋ, a bó yòʼ dzə̀ wìr msòŋ kìíy.

⁶Wù lo, wù yiì, kitú ke nsay ki wàa sə̀ʼsì, a sə̀ʼsì, à vitóm vi shó.[12]

⁷Nyùy lo, wù sə̀r shúy fo yì tó, e sə̀tí mejiy fo mè wáa ban.

⁸Kù‑uù bòm wun yúv, e sàŋrì fo, e sə̀r rìbà ndzə̀v fo wù wáa tsəynín.

⁹Wù‑uù fèr mejiy, e sə̀ŋ é yuv e vikám vikam, kímóʼ kee kikámkám, aá yoŋ ji Bear, kímóʼ kí ji Orion, kímóʼ kí ji Pleyades, e bóo lì melalav meé wòŋ tsəné.

¹⁰Yòʼ dzə̀ vèsən kìíy vinsətìshuù ve vinyò ve wù yiìn ne, a bó yòʼ dzə̀ á tàŋ viŋgaʼnìn ve vinyò ve wù yii.

¹¹«Yii bèy, a Nyùy kì shaa, bo yòʼ dzə̀ m yèn, wù wáa shaà e mǒ ghaŋ, la m yòʼ a gwàrìr.

¹²Rúrú, a wù lò a faàsì kifá, jìvír la wun, a dzə̀ dzə̀r la shó ji ke à yii kìy ki dzə̀ ka?

¹³Bó Nyùy yòʼ wíy neèr dòʼshwíiy və. Wù‑uù bvə̀ʼə́y aŋgàa ŋgoo kigàgǎʼsòŋ kee Rahav,[13] e bvə̀ʼə́y, e tìír wuú rə́ aáwuné kitu.

¹⁴«A dzə̀ m yiì tàr jí sée tunér kitú kém shó e le? A dzə̀ m yiì bìnèr sho ji ka, e bóo bòy?

¹⁵Mo m fə̀m dzəə̀n, a m yòʼ kì fó kinyò, yòʼ dzə̀ m kìíy kinyo kée bìnèr e wun, m kù yíi a lon kém wun lónén ji wun woo ŋgaà saʼ wom shám á mo.

¹⁶A m fə̀m‑eè lò, a mbaà wun, wù biímé, la m yòʼ a kwàʼtì ji wù yíi yu a kinyo kém.

¹⁷Wù lo, wù tsə̀y mo, e bàʼ e kinsəm ki, e dzə̀sì vileémé vém fo kisáŋ ki.

¹⁸Bó Nyùy yoʼ biìmé feyì ji m mey shintíy, wù kù dzəsì ŋgeʼ sém, a sí dzər du duùn fó mbìy.

¹⁹A dzə̀ ji vitaáví, ké ru kí, bo wù kérí, wáa dzə ji kinyo kee tinén é nsànloŋ, bo dzə̀ wày la wun e kibàʼ ke nsaʼ?

²⁰Mo bó m yòʼ fə̀m kiìn fó kinyò, bo shuu wómé kù wíy yuy mo. Mo m fə̀m dzəə̀n là njò, bo Nyùy kù wíy dìn liì wom kisaŋ, bìʼ shuu wóm.

²¹«M dzə̀ là nsem, a bó m yòʼ yén kitú kém, m kù sí lón a dzə̀ kpú.

²²M yén kém ji kidzə̀m ki kù sì kinyo kee shó kimòʼón. Nyùy lo, wù tàtí alànjò wùn à wír ve á méŋ wune, e laàr.

²³A kinshùʼùm ki sàsìn, e gbù, wíri wáa kpukír, Nyùy wàa sheʼ wír ve á yòʼ kiìn fó kinyò mo á yén ŋgeʼ.

²⁴Nyùy wày ne ndzə e wír ve á méŋ wuné wo, e sə̀tí sí atǎr saʼ. A dzə̀ la yii wun kin kee kinyo, kfə̀n yiì la?

²⁵«Vishiíy vém ví sí léʼ cércér, shaa mo a kì dzə̀ ŋgaà kinyeŋ, wù nyèŋ. Ví sí léʼé, a bó kinyo ke juŋ ki yòʼ kfə̀n dzə̀ə́ e mò gheéy.

²⁶Ví léʼ shaa ji vìív, é njà kikoŋ keé ndzəv, féŋ moo lùŋ wo wù sə́ʼəy, e koo kifá.

²⁷Éè Nyùy, a m lò, e sùúy ji mo‑óò yar fó a ghvə̀vrì, a m lò, e wày ji mo‑óò tsəʼ mendzən fo si, e bvə̀tì vishí vém,

²⁸bo m kù yíi a fàn nyár ye à yíi tsənsí e mò, bìʼ fo m kiìn ji à yòʼ yíi tunér mo.

²⁹Nyùy, mo à yíi yiì, é m gbu nsaʼ, m kfə́n a kàtìr, a tunér kitú kém fó gha?

³⁰A m fə̀m sù wún e mendzə́v me mè rèŋèn fó mentiy mè, e rànér wó yém e kisə̀n ki,

³¹bo à kù maʼ mo é bií kishàʼàr,[14] é ndzə̀y sí wáa koʼóy koʼoyín fo mǒ wùn.

³²«Nyùy yòʼ dzə̀ wir msòŋ moo mo, é bo m wáa bìnèr kinyo sho, a bìnèr, é kí koóy ji vèr wun wáa dù e lav nsaʼ.

³³Wìr wo dzə̀ wù tìím e vèr Nyùy nsàn yòʼ dzə̀. Wír wo a dzə̀ wù ghìʼ ver ghíʼín ji á tar kinyo kér yòʼ dzə̀.

³⁴M lón cáʼ ji Nyùy ku tsə̀ʼ ŋgwàn fó a wuŋ mo shó. Lá wù yòʼ dzə́ə a bemér mo, é m wáa fàn wun.

³⁵Kí kooy bèy, é m nèn a suŋnín sho là fan, yii bèy, a bó kém kí yòʼ fə̀m sì bey.»