Read Lamnso Nsùyrì Nyùy 10 Bible Online

Nsùyrì Nyùy 10 - Lamnso bible

Nsùyrì Nyùy 10

¹Éè NYÙY TÀR, à tíy kwaʼda bèn ji ka? À lo, à wàa lìr fo věr si e ghan sé ŋgeʼ bìʼ ka?

²Wír ve á méŋ Nyùyi ŋaʼ e ŋàŋ, wóŋ wuú aŋgàa kitàn. Kí bòŋ ji áwune ku lì e vitam ve koʼorin áwune.

³Wír ve á méŋ Nyùyi saa wún ji kév kí kù dzə̀ á ke mensə́ mev mè taʼà. Á búri vé bòŋáyimoó, ŋwáy NYÙY TÀR ŋwáyín.

⁴Wír ve á méŋ Nyùy vìne ŋaʼ e ŋàŋ, a bó á yòʼ kfə̀n taʼ Nyùy gheéy. Á kù sí yii vinyo vév ji bó Nyùy yòʼ dzə̀.

⁵Áwune lo, á kù a ker kifá ke á koŋè ghán sidzə̀m. Éè NYÙY TÀR, áwune yòʼ gháy vinyo ve à tínenè, ví dzə̀ kwaʼda fo áwune. Wìr lóo kìnèn kinyo kév, á wàa sheʼ ŋgaàŋ shéʼén.

⁶Á suuy e vitú vév ví jii, «A dzə̀ kfə̀n wìy sə̀ʼ ka ver? Mo ŋgwàʼ si wíy a dzə, bó yòʼ dzə̀ vèr wìy yèn ŋgeʼ gheéy.»

⁷Kinyo ke kí fəə́ fo áwuné shuù ki kù dzə̀ ji lòné shóv wír. Á bóʼti kimboʼtì, nyavrì e wíri. Kisúŋnìn kév kí kù dzə̀ ji á gheʼ wír, e ròʼ.

⁸Áwune lo, á làáy é ghaa ntèʼ sí, a nyaʼtí, a yuyrí alànjò. Á wooy wír ve á yòʼ kér wír ve á sə́ áwune,

⁹nèn téʼ e virə̀ʼ vé kilìr vi moo abvərə̀ʼ, téʼ ji sà dzə̀ á koòrí aŋgàa kitàn a. Lóo koorí, á nèn a sə̀ŋ, a dù sho moo nyám ye á koon é lálán.

¹⁰Antavi nyavrì aàlànjòó, aá néŋ afotìn.

¹¹Ntav suuy kfə́ jii, «Nyùy làysìn ne, e lìtì sí rə́, a bó yòʼ dzə̀ wù dzəə yèn mo.»

¹²Éè NYÙY TÀR, éè Nyùy, ŋáʼáy, e nàn kóy wóo, lá à yòʼ làysìn wír ve á nyavrì shoo.

¹³Àshè, wír ve á méŋ Nyùyi kù dzə́, shéʼ wun sheʼén bìʼ ka? Á kù kwaʼtì kév ji Nyùy yòʼ wíy màʼ ŋgeʼ aáwuné vitu à?

¹⁴Yii bèy Nyùy, aà kù yén, kfə̀n səəm wír ve á yén ŋgeʼ, dzə́ e mendzə̀n, aà dzə̀ kibáʼtín ghán sidzə̀m móo sə áwune. Áwune kù kiʼ a dzə̀ wò, aá yòʼ kér wír wùmòʼ wóo beè. Kù dzə̀ wò wo à yii sə́ wón tsə̀.

¹⁵Sə́ʼə́r kóy wìr ve á méŋ wò, gheʼ wírií. Kú a kiv njò yev, a kiv, e dù, e mày.

¹⁶Rúrú, NYÙY TÀR dzə̀ fon viyá viyá là may. Wír ve á ghvə́m anyùy kisaŋe kù wíy lò fo wun nsay.

¹⁷NYÙY TÀR, à yù ne rú tóŋ wìr ve á bórkir e wò si. À kù yii távir melív mev, teer kituʼùr ké, yuúri tóŋ yév.

¹⁸À yíi tinén nsaʼ wón tsə̀ wùn à ye wìr ve á nyavrì shoo, e fo aáwune, é lá wìr woó nsay yòʼ dzəə wìy màʼ melaà, a bemér áwune.