Read Lamnso Nsùyrì Nyùy 102 Bible Online

Nsùyrì Nyùy 102 - Lamnso bible

Nsùyrì Nyùy 102

¹[119] Éè NYÙY TÀR, ku yù bunrì yémé. Yú tóŋ yémé mo m tóŋ ji à sə́ mo.

²Lá à yòʼ lìtì sí fo mò lèn, lèn və̀n wo m dzəə̀n é mvə̀m ŋgeʼ. Yú tóŋ ye m tóŋ e wòo. M tóŋé, ku wìy cér, e sə̀ mo.

³Vishiíy vém ví sí dunìnè, ŋeéme, lay moo kindzə́ʼ, a wúné sí shwí mo shwiín moo kimbiirìn ke və̀y.

⁴M dzə̀ moo jíy ye yí yumen ne, a bvəʼə́y, shuu wómé kpú fó viyikìr.

⁵Mo m rə́si yú nyár, fér tóŋ, wúné kfə̀n ne mo vighvə́r vighvə́r.

⁶M sì moo kilùŋŋgùrúʼ keé woʼ, a dzə moo kiŋkfə̀y ke kí dzə́ e vifə̀m.

⁷M kù sí néŋ, kiʼ kìʼìn, moo kighvəŋ ke kí jáʼ e kitu ke lav, jáʼ wùn mòʼón, tóŋé.

⁸Aŋgaà vém vibàné səʼ mo, à e shùy, à vitsə́ʼə́, li yír yém, shur wíri shó.

⁹M shaà ne vifá ve yi, a yi a dzə̀ kibvə́, a shwir mensíy e kifa ke m nó. A kù yiì ŋgeʼ ye à màʼàn e mò bìʼ dòʼshwiiy wò. À shùr ne mo é yuv, e màʼày mo wìr màʼày kifá.

¹¹Vishiíy vém ví sí mayì moo kindzə̀ə́ndzəm keé kintoŋrìshùy, a m sí yóvri moo viŋgà.

¹²Yii bèy, NYÙY TÀR, à kù dzə̀ ji Fon ghán sidzə̀m, a ŋgwàʼ se sí kóʼ si kù wíy a yòŋ yír yé ghán sidzə̀m.

¹³Rúrú, à yíi nàn sí yé, e sham Sion. Sì ghán se à ku shàm Sion, a sí ghèén ne mo wò‑oò sìysìn.

¹⁴Vé lìm vée koŋ Sion, fə̀m mo á laàrìn ne fó. Mendzən mè rə́r áwune bìʼ saʼkìr ye fóo sàʼkìn ne.

¹⁵Vitúm vi wíy a ghvəm yír NYÙY TÀR, áàfon veé kitu ke nsay adzə̀me wáa leéy vikuʼùy və́, a fàn,

¹⁶bìʼ fo NYÙY TÀR kfə̀n wíy bàʼrì Sion, é vitúm vi yén vitaáví və́.

¹⁷Wù kù wíy yu bunrì aghéʼncey, e làa yòʼ ŋway kinyo ke áwune lón ji wù yii.

¹⁸Á ku sàŋ vinyo vìn, e lèm e ŋgwàʼ ye yì wiyì, é ŋgwàʼ ye yì kóʼó fiʼ wìy a burí NYÙY TÀR bìʼ kinyo ke wù‑uù yiìn.

¹⁹Wù‑uù màʼ sí fo wun kirə̀ʼ ké dzə e yuv, e lèéy kitú ke nsay.

²⁰Wù‑uù yuùrí mo vé sháŋé tóŋ bìʼ nyár ye á yú, e wìy, e bòyìr wír ve vé‑eè sí du sho ji á yúyrí.

²¹Bìʼ bey, á wíy a koʼór yír NYÙY TÀR é Sion, a burí wun e Jerusalem,

²²mo wíri wíy a wìy e Jerusalem, woŋ jeéy jeéy, a wìy vitúm vitúm ji á cu á NYÙY TÀR fó.

²³Fo kém kí, NYÙY TÀR màyìr ne vitaáví vém, e fàr dzəʼə̀m yém, a m dzə̀ə́ ntìntìn wìr.

²⁴Éè Nyùy wom, wò wo à dzə́ sho, e dù, e jòʼsì, lá à yòʼ lì dzəʼə̀m yém, a m dzə̀ə́ ntìntìn wìr.

²⁵Wò‑oò tùúy ne kitú ke nsay fo yàŋgùʼ, a kù‑uù tàm wò yúv e wó yée.

²⁶Yúv wùn à nsay wíy mày, aà kù wíy a dzə. Yúv wùn à nsay wíy dzə̀n, e shèʼkìr moo ndzə̀y, áà maʼay mo wìr màʼày ndzə̀y se sí dzə̀nèn ne.

²⁷Yii bèy, aà yòʼ wíy kuvsín. À kù wíy a dzə sho viyá viyá là may.

²⁸Wón wìr ve á ghvə́m wòo wíy a dzə là kinyo ké a fàn. Rám yéví wíy tuúy wún, a dzə e wò wùn.