Read Lamnso Nsùyrì Nyùy 103 Bible Online

Nsùyrì Nyùy 103 - Lamnso bible

Nsùyrì Nyùy 103

¹[120] M yíi a burí NYÙY TÀR shilív shém shidzə̀m, a burí wun vitaáví vém vidzə̀m, a wùʼsì yír rə́ ye ranéné.

²M yíi a burí NYÙY TÀR shilív shém shidzə̀m, a bó yòʼ dzə̀ m làysìn vinyo ve juŋ ve wù yii.

³Wù rə́si laysìn vinyo vém ve bi ví vidzə̀m, rə́si fer ayàsí ve m joy adzə̀m.

⁴Wù kim dzəʼə̀m yém fo kpúu, buʼ mo e vijuŋ vi mo wù din koŋ rə́ ye wiyí e mò, shám mo.

⁵Wù nə́ʼsin mo e vifá ve juŋ vi, kù mo m dzə́ sho e tin, a m goʼ e wánwan, táv moo lùŋ wo wiy.

⁶NYÙY TÀR bin kinyo ke alàghay. Wù kim ghay wóv, yii kinyo kee tìítiy aáwune.

⁷Wù‑uù bà ntaŋ və, e dìn e Mooser, e yiì, wír veé Israyi yén viŋgaʼnìn və́ vé vinyò.

⁸NYÙY TÀR kér mendzən, kfə̀n shám wíri, lo ji weè e dòʼshwiíy, din koŋ rə́ ye ghaʼáné e wíri.

⁹Wù yòʼ yii sáʼ wír və́ fó fó, a bó wù yòʼ yii shwiiy kilòŋ, du, joʼsì.

¹⁰Wù yòʼ yii maʼ ŋgeʼ e vèsə́n kitu mo á yii, a bó wù yòʼ laʼ vèsən mo vinyo vesən ve bi ví dzəə̀n.

¹¹Mo yúví dzəə̀n kwaʼda fo nsay, bo dzə̀ mo koŋ ye Nyùy kér fo wír ve á ghvə́m wune dzəə̀n e wíy bey.

¹²Mo mbìv yee fo shùy yii tó fo fo dzəə̀n kwaʼda fo mbìv yee fo yì yii nəə, bo dzə̀ sá réŋréŋ mo wù lo, wù shaʼàr ajay vesən, e lèm, á wàa dzə kwaʼda fo vèsən.

¹³Mo kitàr kí yii géŋsin e wón vəə́, bo dzə̀ sá réŋréŋ mo NYÙY TÀR géŋsin e wír ve á ghvə́m wune.

¹⁴Wù kì mbom yèsən, a wù kì kijuŋ ji vèsən dzə̀ á nsay.

¹⁵Wìr dzə̀, a dzəʼə̀m rəə́ dzə̀ moo viŋgà, lo, wù wàa kuy, a bòʼrì moo kibuushì keé kwaʼ.

¹⁶Shwéri shaa, karì, kí yúmé, kí nèn sòóy, sooyì, bo kí kù lày ne, la kisəə́né kí yòʼ kfə̀n a dìn.

¹⁷Yii bèy, ké wìr ve á ghvə́m NYÙY TÀR kí dzə̀, a wù din koŋ rə́ ye ghaʼáné aáwune, du joʼsì, din kinyo kfə́ kee tìítiy e ŋgwàʼ sév sí sidzə̀m.

¹⁸Wù din aáwune ve á lem *mensaŋ mvə, kfə̀n yúnin ntò sə́ sé yeʼéy.

¹⁹NYÙY TÀR tùúy ne kàvàʼ və é yuv, a wìr dzə̀m dzə̀ e wun sar saʼ.

²⁰Viŋgáʼ ve nsheèlav se NYÙY TÀR, vèn wáa burí wun. Ven ve á yúnin nsər sə́, vèn wáa burí wun, Ven ve á yuúri kinyo ke wù suuyì, vèn wáa burí wun.

²¹Ven vee vé rər və́, vèn wáa burí wun, ven vee aŋgàa lìm və́ ve á lim mo wù koŋè.

²²Kifá kidzə̀m ke NYÙY TÀR bomen kí wáa burí wun, a burí wun kirə́ʼ kidzə̀m fo wù sáʼá. M kù yíi a burí NYÙY TÀR shilív shém shidzə̀m.