Read Lamnso Nsùyrì Nyùy 104 Bible Online

Nsùyrì Nyùy 104 - Lamnso bible

Nsùyrì Nyùy 104

¹M yíi a burí NYÙY TÀR shilív shém shidzə̀m. Rúrú, NYÙY TÀR woo Nyùy wom, à dzə̀ e gháʼtín. Ndzə̀y sé si kù dzə̀ viwìr vé wùn à vikuʼùy vé vi,

²rán yée súm sá wò bèy. Wò‑oò bòm yúv, e nàsì moo kibàn ke tamén kí,

³e bòm láʼ yé e mvə̀m mbàʼ,[121] e nèn lì mbàʼ ji kiténtén ké, a feŋ sho e shwer,

⁴shwéri wáa lò ntum sé, wuú wáa bàvkìr, a yiì lim yé.

⁵Wò‑oò tùúy kitú ke nsay, kí wáa dzə, a bó yòʼ dzə̀ kifá ki sə̀ʼ.

⁶Wò‑oò fə̀ə́r rìbà ndzə̀v é kitu ke nsay, wù sə́tí nsay mo á sə̀tí a dzə̀ e ndzə̀y sí, ndzə́ví súm agwan.

⁷Yii bèy, wò‑oò wàm ndzə́v sí, sí yú jí yè, e kìír wún,

⁸a leŋ, a yaʼáy agwan, a to viwoóy, a dù e kirə̀ʼ ke wò‑oò lèmèn ji yí wíy a leŋ fo.

⁹Wò‑oò jàv bìíy ye dzə̀ la ndzə́ví yòʼ yàʼáy, e kfə̀n é bàm, e sùm kitú ke nsay.

¹⁰À yií, ntòŋ sé ndzəv sí wáa fəə fo viwoóy, a leŋ e nsàn se agwan,

¹¹a noór nyám se kwaʼ sidzə̀m. Vimbèʼbìy vé kwaʼ vi wáa rəə̀r sa kilòŋ,

¹²menə́n mè wáa bàʼrì láʼ sév é ghaŋ se ndzəv fen, a toŋnín fo tam se vici.

¹³À lo, à tsə̀nsí wuú fó yuv, yí wàa lo, aàgwane shó, nsay nèn rùn wùn à vifá ve juŋ vi.

¹⁴À lo, à yiì, yí nyàme wàa kuy, e kfə̀n yiì, vifá veé sum ví wàa kuy sa, a kuy, é wíri bóo fíʼ a koóy viyíkìr fo nsay,

¹⁵a koóy meluʼ mé a no, é wúné wáa tekír, a koóy meŋgvə́r mé a sòr, é síi wáa yaané, a koóy vifá vé a yi, é wúné fíʼ a dzə kitávín.

¹⁶Vicí vé *sidar veé Lebanon vi kér mendzə́v féyì. Dzə̀ vicí vé NYÙY TÀR ve wù‑uù bìyìn.

¹⁷Menə́n mè lo, mè wàa bàʼrì láʼ sév shó, a vilìmbìy ve ŋguùmé ví[122] baʼrì láʼ sév é vici vé *dzəʼə̀y.

¹⁸Bvə́y se kwaʼ[123] si wàa ghan a dzə̀ é vitu ve agwan, áàkùvi wáa dzə kév é nsàn se vilan.

¹⁹À lèm ne ŋwee, wú wáa dìn ghán seé kiya, a shùy nəə e ghan se yì kér fó a nəə́.

²⁰Kù yii yii wò, bo ndzə wáa sən, é vitsə́ʼ ví wáa dzə, a dzə̀ ghán sin se nyám se kwaʼ si fəə́kir, gháné,

²¹a wón bvərə̀ʼə́ nyamkìr, taʼ kifá kée koo. Á kiʼ viyíkìr vév, a kù dzə̀ fo wò.

²²Shùy tó, á nèn a kfən e bàm, a kfən aáwuné mbvə̀ʼ, a neŋ fo.

²³Wìr nèn a dù kfə́ e wun shùu lìm, a lìm, e dù, e meé e ŋkuùr.

²⁴Rúrú, NYÙY TÀR, lim yée kùʼ e ŋàŋén. Wò‑oò bòm vifá vidzə̀m, a dzə̀ mo vifií vé vi dzəə̀n vishoón. Kitú ke nsay ki kù rún e vifá ve wò‑oò bomen ví.

²⁵Rìbà ndzə̀v və̀sə e kuukùʼùn, néŋ ji moòr, a vifá vi ghán sho, a bó yòʼ dzə̀ á tàŋ, à ve kuʼkìn ví, à ve terí ví.

²⁶Vikóŋ vi vísə, a ví ghán e kitu ke ndzəv, a nyàm ndzə̀v yee Leviyatan[124] láʼá, nyám ye ghaʼtín ye kù‑uù bomen wò.

²⁷Vifá vìn vidzə̀m vi kù kiʼ a dzə̀ wò, ji à fó áwune vifá ve yi e ghan se gheenén sí.

²⁸Á yí kifá, a dzə̀ ke fó wò aáwune. À mvəʼ wó yé, á nèn yìkír, e kùr.

²⁹À bin ndzə̀m aáwune, á nèn mèŋ fóo dù. Aà lì kiyoy kév, á nèn kpùkír, e kfə̀n é nsay.

³⁰À tsə́nsi kiyoy ké, kifá kidzə̀m ki wàa dzə kibómén, bo à fìyír ne kitú ke nsay.

³¹Vikuʼùy vé NYÙY TÀR ví kú a dzə, e dù, e jòʼsì. NYÙY TÀR kú a yu vijuŋ e wun lìm ye wù‑uù lìmèn.

³²Wù leey kitú ke nsay leéyín, kí wàa sə̀ʼsì, kum agwan, á wàa cu və́y, a fam kindzə́ʼ.

³³M yíi a yòv, a sùyrì NYÙY TÀR, e dù, e meé mo m wíy kpu. Mo m dzəə̀n e tin, m kù yíi a yòv, a burí Nyùy wom.

³⁴NYÙY TÀR ku yiì, é kwaʼtì yémé wáa dzə e juŋ fo wun, bìʼ fo vijuŋ vém ví lo, a kù dzə̀ fo wun.

³⁵M lón ji á ku laàr wír ve á yii vinyo ve bi ví fó kitu ke nsay, lá á yòʼ màʼtì, é wír ve á méŋ Nyùyi goʼ atin. M yíi a burí NYÙY TÀR shilív shém shidzə̀m. Á kú a burí NYÙY TÀR.