Read Lamnso Nsùyrì Nyùy 105 Bible Online

Nsùyrì Nyùy 105 - Lamnso bible

Nsùyrì Nyùy 105

¹Vèn wáa fo vibeerì e NYÙY TÀR, a kwa wun, a sàmèr vinyo ve wù yii e vitúm vi vidzə̀m.

²Vèn wáa yòv luŋ si, a burí wun sho, a fìʼtì viŋgaʼnìn ve lìm ve wù yii vidzə̀m.

³Vèn kú a tuy shwín bìʼ NYÙY TÀR, wù dzə̀ e ránén. Wìr dzə̀m wo wù kóʼti e wun si kú a seŋ, a sàvnìn.

⁴Vèn wáa tiír vifií e NYÙY TǍR wùn, wun wo dzəə̀n vitaáví vén, a koʼtí e wun si ghán sidzə̀m.

⁵Ven vee rám Abraham woo ŋgaà lìm və, ven vee wón Jakov ve wù‑uù shoʼon, vèn kuúmé lim se ghaʼtín se NYÙY TÀR‑iì yiìn sí, viŋgaʼnìn ve vinyò ve wù‑uù dìnèn, a kuumé vinyo ve wù‑uù tinen fo wun shuù.

⁷Dzə̀ wun NYÙY TÀR, wun woo Nyùy wòsən. Sáʼ rəə́ dzə̀ kitú ke nsay kidzə̀m.

⁸Wù kù yii tíy e wun *mensàŋ me wù‑uù gwàrìn, ghán sidzə̀m, a bó yòʼ dzə̀ féyì, viyá viyá là may, wù làysìn ŋkàʼmé woo shooy.

⁹Kù dzə̀ mensaŋ me wù‑uù gwàrìn wùn Abraham, ŋkàʼmé wo wù‑uù kàʼàn Aysi sho, e lìʼ,

¹⁰e bìnsí e Jakov ji sáʼ ye kù foon wun, e kfə̀n bìnsí e wír veé Israyi ji mensaŋ mee là may.

¹¹Wù‑uù kàʼ e Jakov jii, «M wíy fo woŋ Kanan e wò, é vèn à wón véné yí fó ji vitsə́ʼ vén.»

¹²E ghan fóo fèy, áwune‑eè dzə̀ə́ wír ashàr, là ndzə̀n, aá kfə̀n dzə̀ viŋgwìy e wòŋ foo fèy.

¹³Vé‑eè ján fo wòŋ wúmóʼó, du e wúmóʼó, lo fo fòn wùmǒʼ kitum, du e ké wùmòʼ kí,

¹⁴a bó NYÙY TÀR yòʼ‑oò lo fò kintóʼ ji wìr nəʼsi áwune. Wù‑uù kantì afon bìʼ áwune, suuy jii,

¹⁵«Lá wìr yòʼ làʼ kiwó e wír vém ve m yoʼoné kitu. Wìr wáa yen fóo yiì kinyo ke bi kí aàŋgàa ntum vémé.»

¹⁶NYÙY TÀR nèn lò, e màʼ jíŋ e wòŋ foo fèy, e yiì, yì kiíví ŋkaà se kiban sidzə̀m.

¹⁷A wù kì tsə̀nsí ne wír fo wír vəə́ mbìy e Ejiv, Joosev wo áwune‑eè fiìnèn ji kwàn.

¹⁸Vé‑eè kùr wuú rə́ aàsháŋé, yí sòrkìr, e kfə̀n wày fáŋ yee kisha e kilòŋ wó,

¹⁹e dù, e mèé e ghan se kinyo ke wù‑uù suuyin kí‑iì gheenen, e meé e ghan se jì NYÙY TÀR‑iì dìnèn suuyrú və.

²⁰Fòn tsə́nsí toóy ji á fəə́r á Joosev. Taà saʼ vitum fəə́r wun fo sháŋ.

²¹Fòn nèn lèm wun ji taà saʼ woó ntoʼ, e lèm sa ji taà saʼ woo wun wòŋ,

²²wù wáa tir a wón ntoʼ mo wù kòŋèn, a yeʼéy a atǎr wòŋ, aá wáa ker vifií.

²³Á bèy, Isray wìy e Ejiv, wun woo Jakov beè e nsay Ham.

²⁴NYÙY TÀR yiì, wír vəə́ wáa dzəə́ wón nyanyày, a ker vitaáví, a shaà aŋgaà vév vibàn.

²⁵Wù bínér melív me wìr veé Ejiv, á wáa bàn wír və́, a woŋ wuú aŋgaà və́ lìm.

²⁶Wù tsə́nsí Mooser woo ŋgaà lìm və é Ejiv, wùn Aaron wo wù‑uù shoʼon.

²⁷Áwune dìn visəəm vé vitaaví vé Nyùy e wír veé Ejiví mvəm, a yiì viŋgaʼnìn ve vinyò e nsay Ham.

²⁸NYÙY TÀR suúy, woŋ Ejivi sə́n ji dzə̀v, la wìr yòʼ yù fóo shaʼnín kee shoon gheéy.

²⁹Wù bìnèr ndzə́v sév, sí kfə́n mensə́ mensə́, e yiì, sə́ sév sí kpúkír.

³⁰Vishàm vi gbú, e rùn woŋ wóv, e gbù, e rùn à ntoʼ sho.

³¹NYÙY TÀR suúy, merə́rəʼ mè kò, wùn à mebvə́m mè sə́tí fó e dzə̀m.

³²Wù tiír wuú, e màʼ a dzə̀ mentíy, kishèv ki wáa ŋwàŋkìr woŋ Ejiv e dzə̀m.

³³Wù béʼtí vitiír vé *vayin fo fo, e kfə̀n bèʼtí sa vicí vév vé *fig, vicí veé wòŋ Ejiv vi kiíví vidzə̀m.

³⁴Wù suúy, ŋguùmé sí wìy, wùn à rámé shó nyanyày.

³⁵Sí ndzəə́y kifá ke kí‑iì teʼ e wòŋ kidzə̀m, e yì kifá kidzə̀m ke vé‑eè lìmèn é sum.

³⁶NYÙY TÀR kfən yùyrí wón mbìyi veé wòŋ Ejiv, wón vév mbìyi vee vilum adzə̀m.

³⁷Wù nèn fə̀ə́r wír veé Isray fo fo, aá kér vifá vee *kisha ke mbàm ke baar kí wùn à ke fəvír kí, wìr dzə̀m kfə́n a ghan kitávín là yàsí.

³⁸Wír veé Ejivi‑iì shèʼrí lo yév. Vé‑eè sí fan wír veé Isray fánen.

³⁹NYÙY TÀR sáŋrí mbàʼ ji kikiŋ ke won veé Isray, e kfə̀n fò və́y, wú wáa kàʼày áwune vitsə́ʼə́.

⁴⁰Á dzə́r nyám, wù tsə́nsí menə́n mee búmér, e yìír áwune e vifá ve yi ve ví loòn fó yuv ví.

⁴¹Wù waá kilán, mendzə́v mè wáa mee fo fo, a leŋ ji ndzə́v ye kuʼùné, a tosín wóʼ.

⁴²NYÙY TÀR‑iì yii vinyo vìn, kuúme ŋkàʼmé woo wun shuù, ŋkàʼmé wo wù‑uù kàʼàn Abraham woo ŋgaà və lìm sho,

⁴³e nèn fə̀ə́r wír və́ fó Ejiv, á wáa sheʼrí, wír və́ vé ntayi wáa yòv, a sàvnìn.

⁴⁴Wù nèn fò áwune nsay ye vitúm vímóʼ ví‑iì dzə́ sho, áwune yòv vifá ve vitúm vi‑iì ndzə̀ʼnìn, e lìm.

⁴⁵Wù‑uù yiì bey ji á bóo fíʼ a yunín a sáʼ rə́, a yiì mo nsər sə́ sí dzəə̀n. Búríi wáa dzə fo NYÙY TÀR.