Read Lamnso Nsùyrì Nyùy 106 Bible Online

Nsùyrì Nyùy 106 - Lamnso bible

Nsùyrì Nyùy 106

¹Á wáa burí NYÙY TÀR. Á kú a beèrì NYÙY TÀR, bìʼ fo wù dzəə̀n e juŋ. Koŋ ye wù koŋ wír vəə́ yòʼ wíy mày.

²A dzə̀ fèr la viŋgaʼnìn ve vinyò ve NYÙY TÀR yii? A dzə̀ bùrí la wun mo kì dzə̀ á bùrí?

³Bòŋ ké wìr ve á yii kinyo là kiloʼ, jumrì a dzə̀ liì wo juŋ ghán sidzə̀m.

⁴Éè NYÙY TÀR, à lóo yìi sham wír vé, kii wò, à kù kuùmé mo. À lóo lùŋèr áwune, à lùŋèr sá mo.

⁵Ku lùŋèr mo, é m fiʼ kfə̀n yèn vikuʼùy vé wìr vé. M yéné, é vèr áwune wáa sheʼrí adzə̀m, a ker sa kiŋkoʼòrwùn moo wír vé bèy.

⁶Vèr jày ne, kù mo atàr vérí‑iì jáyí. Vèr kù‑uù táv a dzə̀ kitú, buʼtì vinyo ve bi ví.

⁷Atàr vérí‑iì dzə́ e Ejiv, a bó á yòʼ‑oò ló a yen viŋgaʼnìn ve vinyò ve Nyùy‑iì yii, sí yéví wáa run. Áwune yòʼ‑oò ló a kuumé mo wù‑uù rə́si din koŋ rə́ aáwune. Á ku nèn a tsəy kóy wùn à Nyùy e shùu Rìbà Ndzə̀v wo Baar.[125]

⁸Yii bèy, wù ku lùŋèr áwune mo wù‑uù kàʼàn, e lùŋèr ji wíri fiʼ yèn vitaáví və́ ve ghaʼán ví.

⁹Wù wám rìbà ndzə̀v, wù ku nèn yùm. Wù túmér áwune, a sì é nsay ye yumér.

¹⁰Wù nèn sə̀ áwune fo wír ve á ron wuú yéví, e sə̀, á bóy fo aŋgaà vév vibàné wo.

¹¹Ndzə́ví leér aŋgaà vév vibàn, la wìr mòʼón yòʼ bèr.

¹²Wír vəə́ nèn wày shilív e wun aŋkàʼmé, e wày, a yòv luŋ, a burí wun.

¹³Yii bèy, áwune‑eè tàv làysìn vinyo ve Nyùy‑iì yiìn, e làysìn, e làa yòʼ dzə́ə a yuurí ntir sə́.

¹⁴Áwune wáa ker liì kishwaa e kirə̀ʼ ké woʼ kí, kù mum Nyùy múmen.

¹⁵Wù fó áwune kifá ke vé‑eè kér shií shó, e kù màʼ yàsí wo biibí aáwuné wùn.

¹⁶Á wáa dzə fo áwune‑eè bee e woʼ, wíri nén a leéy Mooser ntéŋ, a ghèʼ Aaron, Aaron wo NYÙY TÀR‑iì shoʼon ji ŋgaà lìm və woo jeéy.

¹⁷Nyùy nèn yiì, nsay mvə́ʼə́m, e mèy Datan, e dzəə̀mè Abiram wùn à ŋgoo rə.

¹⁸Wù tsə́nsí və́y fó yuv fo áwune‑eè dzəə̀n, wú tòn wír ve á méŋ wun.

¹⁹Wíri nèn lò, e fèr shibvə̀m e Gwan Horev[126], aá fér a dzə̀ wan nàʼ woo visha ve tonèn ví. Á fér, e nèn a ghvəm ji Nyùy.

²⁰Á shaá Nyùy woo Ŋgaà Vitaàví Vidzə̀m, e nèn a cù a dzə̀ shibvə̀m shee nàʼ. Nàʼ, a dzə̀ kifá, a kí yii yí a dzə̀ vikwiíy.

²¹Áwune láysín Nyùy woo ŋgaà lùŋèr wov, wun wo wù‑uù yiìn viŋgaʼnìn ve vinyò e Ejiv,

²²e yiì viŋgaʼnìn ve vinyò fo, e nsay Ham[127], e yiì sa e Rìbà Ndzə̀v wo Baar, vinyo ve wìr leéy, é shúu má wun.

²³Nyùy suúy ji wun yíi laàr a áwune, Mooser wo Nyùy‑iì shoʼon ji ŋgaà və lìm tiím. Wù tiím, e bùʼ wó e Nyùy, Nyùy màʼày dòʼshwíiy və, e làa yòʼ dzə́ə laàr áwune.

²⁴Áwune ló fó fo, e tèn fóo nəə́ e wòŋ wo juŋe, bìʼ fo bó á yòʼ‑oò lo biìmé kinyo ke Nyùy‑iì kàʼàn áwune shó.

²⁵Áwune wáa ghvə̀vrì fo áwuné tàv se tamén sí, e tèn fóo yunín jí NYÙY TÀR.

²⁶Bìʼ bey, wù kàntì áwune, e lìʼ jii, wun yíi yiì, aáwune kpúkír é kirə̀ʼ ké woʼ kí,

²⁷e taʼár a rám yév e vitúm ví mvəm, aá sáŋrí é vitum foo fèy.

²⁸Áwune meé é Peor, e nèn a ghvəm a dzə̀ nyùy woo *Baal, a yi vifá ve ntàŋrí ve vé‑eè cu anyùy kisaŋe shó.

²⁹Áwune‑eè yii bèy, tínsin NYÙY TÀR e liì wov kisaŋ. Wù ku nèn màʼ yàsí wo biibí aáwuné wùn.

³⁰Finehas ŋáʼáy, e sə̀r liì kisaŋ və̀y, Nyùy ku nèn siìr yàsí və̀n e bàm.

³¹Á nèn a kuumé lim Finehas ye juŋe, aá kù wíy a kuumé bèy, e dù, e jòʼsì.

³²Áwune meé é ndzəv seé Meriba, e mèé, e yiì, kilòŋ kí shwiíy Nyùy. Mooser nèn lò, e nə̀ə́ e ŋgeʼ,

³³bìʼ fo vé‑eè yiìn, tímé wáa sav wun sávín, a sav, wù wáa fam vinyo là yú.

³⁴Ké vitum ve NYÙY TÀR‑iì suuyin ji á laar, bó á yòʼ‑oò lo laàr vitúm vee shooy gheéy.

³⁵Vilum nèn a cem vikìy fó vitum ve bó ví yòʼ kiiy Nyùy, nèn biʼnìn liì, a dzə̀ wóov.

³⁶Áwune nèn a cù mebvə̀m me vitúm vìy vi cu, wáa dzə kitám mo áwune liìn shó.

³⁷Á wáa lì wón vév vee vilum wùn à vee vikìyí, a lì áwune, a cù viyoy ve ví ghán ji anyùy sho.

³⁸Áwune‑eè yúyri wón vév, yúyri, a bó wóné yòʼ kér njò, li áwune, cu mebvə̀m meé Kanan sho. Á bèy, kinjuyrìwìr kìn ki yií, nsay bír.

³⁹Áwune lór vitú vév e liì wov kisaŋ, liì wov wáa beemé e Nyùy si, kù moo wo sàkì.

⁴⁰Dòʼshwiiy NYÙY TÀR ŋáʼáy e wír vəə́ wùn, wù bán áwune vee vitsə́ʼ və́, á wáa koʼóy wun koʼoyín.

⁴¹Wù shwéy áwune e vitúm ví wo, á wáa yu sáʼ a dzə̀ fo vitúm vìn vi.

⁴²Aŋgaà vév vibàné wáa nyàvrì aáwune, a kàn, á wáa yu sáʼ a dzə̀ yév.

⁴³Wù‑uù sə̀ wír və́ fo aŋgaà vév vibàné wo akàŋ anín, á kú a tsəy kóy tsəyín wùn à Nyùy e vinyò ve á yii, vinyo vév ve bi ví máʼ áwune é nsay.

⁴⁴Yii bèy, Nyùy ku yòʼ yù tóŋ yév, e nèn lò, e rə̀r mendzən mev.

⁴⁵Wù kuúmé *mensaŋ me wù‑uù gwàrìn wun áwune, e siìr dòʼshwíiy və é bàm, bìʼ koŋ ye wù kér fo wír vəə́.

⁴⁶Wù yiì, wír ve vé‑eè koon áwuneé wáa rər mendzən mev.

⁴⁷Éè NYÙY TÀR, Nyùy wor, lùŋèr ver. Báʼtí ver fó vitum, e siìr ver e věr wòŋ, é vèr wáa beèrì wò woo Ŋgaà wo Ranén, a sheʼrí lim yé, a burí wò.

⁴⁸Á wáa burí NYÙY TÀR, Nyùy wìr veé Isray. Á wáa burí wun, viyá viyá là may. Wìr dzə̀m bínsí jii, «Amen.» Á wáa burí NYÙY TÀR.