Read Lamnso Nsùyrì Nyùy 107 Bible Online

Nsùyrì Nyùy 107 - Lamnso bible

Nsùyrì Nyùy 107

¹Á kú a beèrì NYÙY TÀR, bìʼ fo wù dzəə̀n e juŋ. Koŋ ye wù koŋ wír vəə́ yòʼ wíy mày.

²Wír ve NYÙY TÀR tinen fó ŋgeʼe kú a ruvtí jí sìn, áwune ve wù bòyìrìn fo aŋgaà vév vibàné wo,

³e bàʼtí fo buu se ndzə sidzə̀m, fo mbìv yee fo shùy yii tó, à fó mbìv yee fo shùy yii nəə, à fó kùy, à fó tsən.

⁴Ámóʼó‑oò ján e woʼ, e làa yòʼ yen ŋkàlaʼ yé a dzə sho.

⁵Jìŋ wáa yar áwune, kilòŋ kí wáa yum, áwune yú ntéŋ, e wèvrì.

⁶Áwune nèn tòŋ e NYÙY TÀR é mvə̀m ŋgeʼ fèn, wù fəə́r áwune fó nyar yee shooy.

⁷Wù dànèr áwune é dzəə yee tìítiy, e dù, e mèé mo vé‑eè meen é ŋkàlaʼ yé a dzə sho.

⁸Áwune kú a beèrì NYÙY TÀR bìʼ koŋ ye wù kér fo wíri, a beèrì wun bìʼ viŋgaʼnìn ve lìm ve wù‑uù yiìn aáwune.

⁹Wù‑uù nòór wír wo kilòŋ kí yúmé, buù kpú, e yìír wír wo jìŋ yárí e vifá ve juŋ vi.

¹⁰Ámóʼó‑oò dzə́ e ndzə vitsə̀ʼ kirəə́yín, kóm aghàghir aàsháŋ ve vé‑eè kurin áwune shó,

¹¹bìʼ fo vé‑eè tenen fóo yunín jí Nyùy, e ŋwày ntir Nyùy woo Taà Vitu ŋwáyín.

¹²Wù nèn yiì, á wáa tuŋ akwiiròn, aá fiʼ wìy a neŋ, a yu a dzə̀ fo wun. Wù máʼtí, áwune wáa gbùkìr là ŋgaà sə.

¹³Áwune nèn tòŋ e NYÙY TÀR é mvə̀m ŋgeʼ fèn, wù fəə́r áwune fó nyar yee shooy.

¹⁴Wù fəə́r áwune fó ndzə vitsə̀ʼ, e tsə̀ʼ rəə́y fo áwuné si, e tiìné asháŋ ve vé‑eè kurin áwune shó.

¹⁵Áwune kú a beèrì NYÙY TÀR bìʼ koŋ ye wù kér fo wíri, a beèrì wun bìʼ viŋgaʼnìn ve lìm ve wù‑uù yiìn aáwune.

¹⁶Wù‑uù kìv shúu lav wo á fèrìn e kisha ki, e bèʼtí fáŋ ye vé‑eè táʼ sho, aá fér e kisha ke baar kí.

¹⁷Wír ámóʼó‑oò joyì, bìʼ yii yév ye bií, kfə̀n yén ŋgeʼ e ŋàáŋàŋ, bìʼ vinyo vév ve bi ví.

¹⁸Áwune tén kfəə́ se vifa ve yi sidzə̀m, e nèn a koʼtí, e sə́r sày.

¹⁹Áwune nèn tòŋ e NYÙY TÀR é mvə̀m ŋgeʼ fèn, wù fəə́r áwune fó mvə̀m nyar foo fèy.

²⁰Wù súŋnín, á bónén, e tìn áwune fó kpu ye yí‑iì yíi lì áwune.

²¹Áwune kú a beèrì NYÙY TÀR bìʼ koŋ ye wù kér fo wíri, a beèrì bìʼ viŋgaʼnìn ve lìm ve wù‑uù yiìn aáwune.

²²Áwune wáa yiì cu yée beèrì wun sho, a yòv luŋ se kisheʼrì, a fìʼtì lim sə́ shó.

²³Ámóʼó nəə́ é kikoŋ, e dù e rìbà ndzə̀v, a kavnín wáy fó.

²⁴Áwune‑eè yèn lim se NYÙY TÀR, viŋgaʼnìn və́ vé lìm e rìbà ndzə̀v.

²⁵Wù‑uù sùŋnín, kinsəm ki wíy, a yiì, ndzə́ví wáa tsəynín,

²⁶a meér kikóŋ e yuv, a səʼə́r e nsay. Áwune wáa fàn fóo lày e ndzə̀v, tímé kpú áwune.

²⁷Áwune wáa fenkír, a bàyrìn moo wír ve meluʼ mè koon, a bó á yòʼ kfə̀n kì kinyo kée yiì bìʼ akíghàʼ vév vin.

²⁸Áwune nèn tòŋ e NYÙY TÀR é mvə̀m ŋgeʼ fèn, wù fəə́r áwune fó nyar yee shooy.

²⁹Wù‑uù yiì, kinsəm ki tiím, tsə́ynín ye rìbà ndzə̀v‑iì tsə́yninèe kpúrín.

³⁰Áwune wáa sheʼrí ndzə́v ye yí‑iì kpurin. NYÙY TÀR nèn lì áwune, e dù sho e shùu ndzəv fo vé‑eè taʼ, e dù.

³¹Áwune kú a beèrì NYÙY TÀR bìʼ koŋ ye wù‑uù kér fo wír vəə́, a beèrì wun bìʼ viŋgaʼnìn ve lìm ve wù‑uù yiìn aáwune.

³²Áwune kú a wùʼsì wun e mvə̀m kintatì ke wìr və́, a burí wun fo atǎr saʼa tárí.

³³NYÙY TÀR lo, wù bìnèr ndzə́v sí, sí kfə̀n é woʼ, binèrì, ntòŋ sé ndzəv sí yùmkír,

³⁴nsay ye borín ghùy, a kù dzə̀ bìʼ liì kisaŋ wìr ve á dzə́ sho.

³⁵Wù lo, wù bìnèr wóʼ ji visə̀m, e bìnèr nsay ye yumér ji ntòŋ sé ndzəv.

³⁶Wù lo, wù lèm vé jiŋe, á wàa dzə fo. Á lóo dzə, á nèn a bàʼrì ŋkàlaʼ yev fó, a dzə sho.

³⁷Lo, á wàa lìm súm, a bìy vitiír vé *vayin, a koóy vifá fo nsay, ví wàa jamtín jamtín.

³⁸NYÙY TÀR kù a səə̀vì áwune, á wàa dzəə́, a kùʼ, nyám sév sí wàa kùʼ sa.

³⁹Á ton wír və́, shoorì, lóo nə̀ʼsì áwune, á wàa yen ŋgeʼ,

⁴⁰NYÙY TÀR wàa nyàysì aŋgàa vibàn vév, a yiì, á wàa ghan, a jan e woʼ.

⁴¹Yii bèy, a wù nèn fəər vé kitàne fo áwuné ŋgeʼ. Wù fəərì, dzəsì kfə́ə yév, yii, a yí dzə́ nyanyày,

⁴²a wír ve melív mev mè dzəə̀n tìítiyi yéné, shéʼri, a kí sə́ti shúu vé yìi kisaŋe sə́tín.

⁴³Wìr wo wù kér vifií kú a rə̀tì vinyo vìn. Wìr msòŋ kú a kwàʼtì koŋ ye NYÙY TÀR kér fo wír vəə́.